عوده الى بوس الاحذيه والجزم....ساخر

جان نصار

الحوار المتمدن-العدد: 4060 - 2013 / 4 / 12 - 13:15
المحور: كتابات ساخرة
    

كنا زمان نقول ما في شيء من الغرب بسر القلب واليوم انا بقول انه ما في شيء من العرب بسر القلب وحتى الكلب لانه وضعه في الوطن العربي حدث ولا حرج. كل شعوب العالم تتقدم الى الامام في شتى المجالات الا الشعوب العربيه تتأخر في كل المجالات.العالم يقدم انجازات في العلوم والاخترعات والمواصلات والاتصالات والعلاقات .اما احنا العرب يا حبيبي تعال اتفرج على عجايب الزمان من ناحية العلوم والاخترعات ما النا فيها
حقوق الانسان الله يخليها .كان عندنا قضيه مركزيه اساسيه هي القضيه الفلسطينيه واليوم عندنا في كل بلد عربي قضيه. مجازر الثوره السوريه ومشاكل وقلائل حكومة الاخوان المصريه والصرعات الطائفيه العراقيه وكل بلد عربيه الها شي مليون قضيه سياسيه طائفيه دينيه اقتصاديه اخلاقيه .يعني المواطن مسكين مش عارف شو لازم يعمل صار محبط ومهموم.. فكر انه بعد هالثورات يمكن يكون الوضع احسن بس الوضع صار اسوء وبستين نيله وما بسواش بصلي.كل الوطن العربي بغلي وحاله تعباني والسعوديه وقطر نازلين بهالنفط يولعوها وياريت لحسابهم كلو علشان الانكل سام.
مذيع مثل توفيق عكاشه وعلى تلفزيون الفراعين وقدام الملاين بقولك اذا رجع مبارك راح نبوس جزمتو انا والشعب. يعني وصلت الحالي اننا نبوس الكنادر والاحذيه لعودة دكتاتور مثل مبارك. لماذا ؟لان الدكتاتور الجديد عامل الهوايل بالشعب المصري واللي عملو مبارك ب30 سنه عمل افظع منو مرسي باقل من سنه.فوضى بطاله افلاس مادي واخلاقي فلتان امني قتل على سحل غلاء اسعار انقطاع الكهرباء ووصلنا لحافة الافلاس ومصر من اكبر واعظم دوله عربيه صارت بجيبة اصغر دوله عربيه وتابعه للدوله القطريه.
في سوريا المواطن كمان تعبان وغلبان فكر انو بالثوره على دكتاتور مثل الاسد راح يخلص بس طلعلو 20 دكتاتور. يعني بعدهم صغار بس راح يكبرو ويعبدو العجل. وكمان في قتل وسحل ودمار وهجره وخراب ووصل المواطن يا بموت معارض او بموت مع النظام وعلى الحالتين مش خالصان شو المفروض انو يعمل يكون مع والا ضد...سوريا اليوم اصبحت حقل تجارب لاستعراض عضلات القوى الدوليه الامريكيه والغربيه والسعوديه والقطريه من جهه والروسيه الصينيه الايرانيه ا لعراقيه من جهه اخرى يعني المواطن مش راح يعرف يبوس حذاء مين مشان يخلص في الدوله السوريه.
المواطن العراقي يمكن انه بيتحصر على ايام صدام وممكن لا .لكن وضعه ايضا زي الزفت اللى كان يحكم اصبح اليوم محكوم ونهب وسلب على ودنو وصراع طائفي بيرفع الراس ويتخللها الكثير من المفرفعات والتفجيرات وسقوط الضحايا مع عدم استقرار امني لانه غير ضروري حاليا على اساس عدم الخروج من المزاج العربي العام.
لبنان على اساس ان حصة الاسد رايحه لقطر وعلى ما يظهر انه في شوية خلافات بين قطر والسعوديه طلعت التقسيمه من نصيب السعوديه.
المواطن في فلسطين مش عارف يبوس ايد والا جزمة مين. الاحتلال الاسرائيلي ونعمه عليه او الاداره الامريكيه والدول الغربيه والمعونات الماديه لتنويم القضيه وحديثا دخلت الاخت قطر على الخط ودعم لابو موزه لحماس والسلطه وشو لازم يبوس حذاء الامير حمد والا الصندل او البابوج (الشحاطه) وكلو بالاخر بوس..كان الواحد مفكر ان البوس هو للتعبير عن الحب والحنان لكن طلع غلطان هو يعبر ايضا عن الخنوع والذل والطاعه والتبعيه وهناك دورات تعليم البوس للاحذيه والمؤخرات لمن يرغب من المواطنين بأسعار خاصه.
اصبحنا اليوم تابعين اما للسعوديه او قطر لانو اللي بعطيني مصروفي باقولو يا سيدي.واللي ماخد امي عمي...بعد سنوات من مقارعة اعدائنا الخارجين صار صراعنا مع اعدائنا الداخلين وصب البنزين من الخارجين يعنى بدنا نقول صراع هجين..
هات حيكها واللي شبكنا يخلصنا فتاوي واتاوي ورشاوي ومشاوي.
كان المواطن في الماضي يسمع ان ايدا خفية تلعب في الداخل واليوم صارت اصابع تلعب بالداخل والخارج وكثرت القضايا ولذلك صارت الاصابع تلعب ودورها مهم وضروري .وبقولك سوف نقطع الاصايع . طب اذا قطعت كيف المواطن المسكين بدو يعبر عن رأيه وخصوصا اذا قطع الاصبع الاوسط.. له كثير من الاستعملات واحنا عارفينها.
هناك عدة اسئله مطروحه :هل تعشق شعوبنا جلاديها؟هل شعوبنا ما بتمشي الا بالجزمه او اذا كانت على رقابها ولذلك تشتاق لتقبيلها؟هل هناك حنين واشتياق لدكتاتورية صدام والقذافي ومبارك وعلي صالح وزين العابدين؟
هل اللي منعرفوا احسن من اللي ما منعرفوش؟
هل هذا حرامي سرق وشبع والقادم لسه بدو يسرق ليشبع افضل؟
مع الاسف على ما يظهر انه هناك الكثير من ابناء شعوبنا يفكرون بهذه الطريقه..
نحن بحاجه الى اعادة تأهيل وتربية الانسان على الدمقراطيه والحريه .
بصراحه طقم الزعماء العرب الجدد اللي افرزتهم الثورات خلوا الموطن يشوف الديك حمار.....وسليمولي عالحبايب سليمولي....

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات