الرياضة في الغرب

حيدر الطائي

الحوار المتمدن-العدد: 4644 - 2014 / 11 / 26 - 08:29
المحور: كتابات ساخرة
    

يگولون الرياضة تحسن المزاج ولها فوائد كثيرة تعمل على رفع نسبة التيسترون
( هرمون السعادة ) في الدم وتخفض الكولسترول الضار وترفع الكولسترول المفيد…
لا وتذوب الكرش وتنشط القلب وغيرها الكثيرة من الفوائد حتى من ضمن الكثير يگلك مفعولها اقوة من التمر من تاكلة وانتو تعرفون التمر اذا اشتغل عدل شنو يسوي ما شاء الله كلكم تضربون تمر وعسل..
المهم بما اني مزعوج وضايج من اخبار العراق وعندي زيادة بالوزن گلت خلي اسمط عصفورين بحجارة هم اروح الضوجة وهم اذوب الكرش ..
لبست الشورت الستن الاحمر وبي خط ابيض وتكرمون البوتين الابيض حتى يتناسق وية الخط ولبست القمصلة الحبرية هاي الفرو يعني من جوه مصيف ومن فوك مشتي اسم الله عليكم مبراد اني ..
واطلعت اركض على كيفي اني وجاي اهرول على كيفي ما اشوف غير وحدة من امهات السحورة طلعتني بس شنو شلون البي ام من تطلع البيجو على السريع مال الرمادي… وهي غزال وگاعد يركض بصراحة اني صعدت عندي النزعة القبلية وگلت لا يولد شلون تطلعك هاي وانت رجال عيب ..
دست وراها وجيبة جيبة اني اركض والكيج مال التيسترون احسة صار فول ومركز على الشعر الاشگر ليگول حرير يتطاير اركض وهي تركض بس ما جبتها اركض ومركز واستمر الموضوع بس شنو اني مركز بالغزال الي گاعد يركض وصارت شغلة اعناد اليوم لازم الحك بيها وهاي شنو مرات تخفف لحد ما واصللها وتدوس ويصير الفارق جبير…
اخر شي وكفت ترتاح اكو محطة مال الباص كعدت بيها واني وراها وهم جيت كعدت بس عينكم لا شافت الجسم من ورة مال وحدة عمرها سباطعش سباطعش ونص يعني بالزايد اثمنطعش والشعر حرير بس يا جماعة وجهة مال وحدة خمسين سنة اني انصدمت وانخفض التيسترون وصعد الكولسترول الضار راساً گتلها شنو انتي تحوير طبعا احجي ويها بالعربي ..
ما فهمت ..
المهم اخر شي گامت كملت مشي اني صارت عندي انتكاسة فطست رجعت بالباص وعدل وگبل للمطبخ وحميت البامية البايته وثردت اربع كرص خبز وراس بصل وماعون طرشي وخضورات يگولون مفيدة للرجيم نفضتهن ومنا الادرياليين مرتفع والكولسترول معلك والتيسترون هبط لذالك حليت بنص كيلو بقلاوة وثنين نستلة تيوكس … ..وجني على بالي معلمات ومدرسات الرياضة بالعراق واجسامهن الرياضية ..
حيدر الطائي

#حيدر_الطائي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات