عبود أجا من القصر شايل مكنزيّه

محسن لفته الجنابي
كاتب عراقي مستقل
(Mohsen Aljanaby)

الحوار المتمدن-العدد: 4367 - 2014 / 2 / 16 - 21:28
المحور: كتابات ساخرة
    

طلع عدنا شقي جديد أسمه عبود فد واحد لوتي وشرس ويحب لغاوي العرس صار فترة ماخذ عالمنطقه , عنده فيكات وشقلمبات رهيبه تذكرني بأفلام سينما النجوم وأيام بود سبنسر وشامي كابور و ذاك الأصهب جاك نورس الله يرحمهم ويجعل قبورهم مثل حدايق الزوراء قبل هزيمة الأسد من القفص بعد أفتتاح ديلاب الهوى , عبود أخو أخيته , يجيب حقّه من حلكَ السبع و يگلب على البطانه كل فصيلة القطط من البزونه لحد النمر , أيده سكول سبانه بحيث هو الوحيد يگدر يفك براغي الجسر ويقطع شط العرب ويخلي البطريق يحفر مواضع بالقطب الجنوبي , عنده كلاوات تطلّع الحيّه من زاغورها ويخليها تردح و تلعب چوبي , وفوكَاها سوّى صولات مال الأول لمن كانت الزلم زلم ماتخاف من نسوانها , تخلي الواحد يفرك أيديه ويعيد أيام الطفوله ويهرول ياخذله نفس طويل من أقرب نرگيله , ذاك اليوم فلّش حياطين المنطقة وعافها مجطوله لأن راح بشغيله لمحلة العروبة لعب بيها طوبه , وراها بطح واحد سمين بالعلاوي خلّاه يطوطح يجر أذيال الخذلان بالفرران من بيروت الى عمّان و الجانب الأيمن من الموصل , فد واحد زقاقي ونقناقي يفرهد من الحافي نعل ودير بالك تنطيه عشرتالاف لأن ياخذها ويشلع وميرجع الباقي عنده شجاعة وقباحه وعياقه ما لها رداد فاقت لواتة جاكي شان ,وسوادة وحشي بفلم الرساله , بالفتره الأخيره لعب شاطي باطي ولمن واحد يندكَ بيه يفرها عليه ويرتكب بأن هو السبب في حرايق الشورجه , وأذا واحد أعترض على سوالفه يندار عليه ويشبعه بوكسات و رزايل , ياجماعة الخير هذا عبود طلع شقي المرحلة وأحنا كنّا غلطانين ماصرنا وياه من البدايه و التأخير لايفسد للود قضية والصلعه الموغفه على قلبك ومتگدر تتبارك بيها طخ عليها و بوسها على كَولة الحجيّه نوفه , بس كون يقبل يطببنا جوّه عباته , ومادام أحنا بيها حبيت أعتذر منه وأراضيه برساله :
أغاتي أبو العبد أسمح لي أعبر عن أعجابي بمهاراتك الحمنتليشيه
يامن نجحت للمرة المدري شگد بأن تخبطها وتشرب صافيها
وبهذه المناسبة يشرفني أن أكون أحد أتباعك وخادم زغيروني بجيبك
فقد تأكدت بأن بقية الشقاوات جوگه طراطير ما أسرّحهم بصخله سبيعيه
وين الله وتقرا هذا المنشور وتقبل بس المهم تكون مرتاح وطيورك طايره وتنطيني جنطة دبلوماسية مليانه شدّات وياها مسدس كلوك أبو الشعار وأحقق أمنيتي وأضرب طلقات براحتي لمن يفوز المنتخب العراقي
وبهذه المناسبة أسمحلي أهديك أغنية (عبود) لصديقة الملايه مع الممنونيّه أما البقية يطبهم حريشي خليهم يسمعون فراگيّات مال سعدي البياتي المهم راسك سالم يابعد خوالي وعمامي , عوفهم وأسمع الأغنيه :
عبود أجا من القصر شايل مكنزيّه
وشلون بصرك يخي بالحماقات السياسية
عيني عيني عبود علمنا وياك دكَ العود
مادام هيج الحچي ياعين موليه

#محسن_لفته_الجنابي (هاشتاغ)       Mohsen_Aljanaby#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات