حسن تويج
الحوار المتمدن-العدد: 2608 - 2009 / 4 / 6 - 09:53
المحور:
الادب والفن
الأخ ظافر الروازق عذراً لتقصيري معك هذه الكلمات خرجت بعفوية أرجو أن تتقبلها مني بيضاء وصادقة وأعتذر ثانيةً لتقصيري
توضّيت بنهر شوفچ ... ييمه
صلاتي بوسة چفوفچ .... ييمه
عله جدامچ سجودي كياني انتي ووجودي
أطوف بكعبة طيوفچ ... ييمه
***
جبينچ بالشـرف عـزّ ومناره
عسل طعم التعب رغم المراره
رغم عـوز الليالي الشرف ليره وتلالي
ثمنهه آهچ وأوفچ ... ييمه
***
نبع حبـچ دفگ طيبه وحنانه
يجف لا ما يجف والله بربانه
يطيبه ويا حنينـه تحت جنحچ ربينه
كبرنه أحنه وكبر خوفچ ... ييمه
***
عله ضيم الليالي شكد صبرتي
نذرتي أحله العمر لمّن نذرتي
يظل كلبـچ علينه عله انفاسچ غفينه
ننام بطيب معروفچ ... ييمه
#حسن_تويج (هاشتاغ)
كيف تدعم-ين الحوار المتمدن واليسار والعلمانية
على الانترنت؟