دار الزمان وياي

علي كاظم

الحوار المتمدن-العدد: 2205 - 2008 / 2 / 28 - 04:05
المحور: الادب والفن

مرة ، أبذاك الوكت
من حفنة أسنين
أتذكر جنت بالهور
والهور ماي وعشك
وأحلام ونوارس
مردي وفالة ومشحوف
وجنت اغني ، أبطور داخل حسن
وبنفس بحة اشواكَه وتنغيم الحروف
و بنص الماي
داير مداير المشحوف
يركَص جان ، متونس الحذاف
والكَصب اخضر اوفرحان
يتمايل امن غناي
ويسولف للسمج ، من فالتي ليخاف
ولمن دار الزمان وياي
وهامت الروح
ياروحي اشتكَت لهلي ، وللحبايب رفن اجلاي
ينار المنقلة ، ويالمة العيد ومسامر الجاي
ودار الزمان وياي
ودورات الزمان اهواي
ولكيت ومالكيت اهلي
وشفت الذي مااكدر احجيه
ولاظنيت ابهذا الشكل ينشاف
وسألت الماي
ياماي الصريفة ، ولك ياماي
شجاها الناس
والبردي يبس ليش ياماي
وليش امهاجر الحذاف
رد علي وكَال يمعود
جان عدنه اهنا
بالقرية جلب اسود
وهذا الجلب بالظلمة فلك اسود
طول الليل ينبح
مرة ضبع ينكَلب ، ومرة ينكَلب ذيب
ومن تطلع شمس تموز ، يرجع مثل ماجان
هو هو إجليب
يهز ذيله ، ذليل ايكَوم يتلمض
ولمن دار الزمان وياي
ودورات الزمان إهواي
شفت قريتنا اشكثر بيها اجلاب
تنهش نهش وتعض
وجان إبعشيرتنا شيخ واحد
عنده كرش ، يتمختر ومهيوب
وإحنة رجلينة إمفطرة
ومن افطور رجلينة الشيخ مرعوب
و دار الزمان وردينه لهلنه اردود
اندورعل الدرب وينه
ياذاك الوكت وينه
ياكَهوة حمد ياسجة الريل
يبو ملكَة الحلو يمدورة عينه
لهنه فرحانين ردينه
ورجلينة بعدهي امفطرة
والكَاع طين
وضاعت علينه الكَنطرة
والسجة لكَيناهه بلايه اجروخ
والناس كل الناس صارت بالعشيرة اشيوخ
ودار الزمان وياي
ودورات الزمان اهواي
وشمايدور آنه ادور وياه
نوبة ابمهزلة ايحطني ، ونوبات اشوف الزمن ماساه

#علي_كاظم (هاشتاغ)

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل

كيفية إشراك-إيصال مواضيعكم أو مواضيع تهمكم إلى اكبر عدد ممكن من القراء والقارئات