عقول منتهية الصلاحية

شهد أحمد الرفاعى

الحوار المتمدن-العدد: 1910 - 2007 / 5 / 9 - 08:08
المحور: كتابات ساخرة
    

وقفت ببابى زوجة البواب( عنبة) سألتها الدخول..والجلوس..قلت لها ..

-: كيف حالك يا ست عنبة..وحال أولادك ..وحال زوجك المغوار..فأنا اعرف إنه معكِ دائم الشجار ؟؟؟

-: (بخير ..والولاد يبوسوا يديكِ..)

ضحكت حتى لاح المتبقى من أسنانها المتهالكة..سألتها السبب..!!

-: .يا ست ..أضحك ..إنتِ تنادينى يا ست عنبة..

-: ولا يهمك ست وست الستات كمان..

وبادرتنى تقول..

-: جوزى ..من البارحة ما جانا ومش عارفة طريقه؟ يمكن جت له سبوبة عيش..يطلع له منها بقرشين يساعدوه على كوم اللحم اللى عندنا..السابع جاى فى السكة.

-: .. كده .. الشوارع أصبحت زحمة يا عنبة..البلد أصبحت لحم على لحم وزحمة جداً يا ست عنبة..ولساكِ حامل..ما فى فايدة فى حضرتك؟!! مولود جديد يعنى مصاريف وخدمات جديدة يا عـــــــنبة.. صح.!!!

-: ..أعوذ بالله ياست.!!! كل عيل برزقه يا ست..والعيل يتولد ورزقه مكتوب على كفه.حتى ربنا قال.رزقكم فى السماء.

-: ..وتربيهم ازاى يا خالة أم العنب؟؟

ضحكت (عنبة).وكأننى أطلقت نكتة وتابعت حديثها ..

-: يعنى الواد يمسح سلم..يعمل مشوار للسكان..ولا صبى عند اى دكان..و اللى خلقه ما يسيبه يا ست؟؟وبعدين أبو العيال عاوز العزوة والولاد حواليه..أصله إتربى وحيد يا عين أمه.

لم أستطع كتمان سخريتى..

-: ننوس عين أمه ينبسط ..وتطلع عين البلد..!! ألم تجربى تنظيم الحمل يا تكعيبة العنب؟!! الحبوب أو الحقن ووو..أكيد تشاهديها فى التليفزيون؟الإعلانات ما شاء الله ماتركت شىء..والحياء إتمنع والحمد لله.

..وضاحكة ضحك الخجل الريفى البسيط ..

-: كتير والله يا ست!!..دول حتى ناقص يقولوا لنا ..ننام مع بعض إزاى..جربت وربى وربك جربت ..لكن الشريط كان يسف زى شريط الكاسيت..والاقراص طلعت منتهية الصلاحية..والحقن لخبطت الدنيا وخليتنى جبت توأم..
..والراجل كمان ..؟؟

وعندما سمعت هذه الجملة الآخيرة إنفجرت ضاحكة..

-: إيه الراجل منتهى الصلاحية !!! ..لا ..لا أظن يا عنبة ..ده الانتاج يشهد يا عنبة..كوم لحم وكوم نسوان.

و بسخرية الحنظل..

-: ياريت ياست .يا ريت ..لجل ما يبطل جواز ونسوان وعيال.. متجوز إتنين غيرى ومخلف كوم عيال من كل واحدة..وكل عيل يقوم بمصاريفه ومصاريف أمه.

-: كيف ؟ يا أم العيال؟كيف؟؟

-: والله ما أعرف ياست..

وبإستغراب أكملت ..

-: وايه موضوع الصلاحية دى؟؟ الأقراص الخاصة بتنظيم الحمل !!! منتهية الصلاحية!!معقولة يا عنبة!!!

-: الدكتور هو اللى قاللى كده..قال إن الأقراص اللى فى السوق آخر شحنة كانت منتهية الصلاحية..

-: شىء ممتاز يا عنبة.. والحقن ..بدلاً من ان تنظم لكِ الحمل ..جلبت لكِ طفل وعليه واحد هدية..ولصقة منع الحمل بتجيب القلب.!!

نظرت (عنبــــــــة)..وأطلقت تنهيدة طويلة طويلة أحسستها حارقة بحرقة ما تعانيه هذه المغلوبة على أمرها ..

-: يا ست هى دى بس اللى خربانة ..الغلا جامد قوى علينا.. طيب يا ست وبعدين إيه الحل..؟؟ نعيش إزاى وناكل ايه؟؟ والواد ابنى فى المدرسة من كتر العيال على الارض قاعد ..ولا فيه دروس ولا مدرسين ..وفى الامتحان يكتبوا الحل على السبورة..والشغل كمان الراجل يشكى ويقول مافيش..وووووكتير يا ست كتير..إيه الحل يا ست؟؟ إيه الحل؟؟

ومحاولة..زرع البسمة على وجهى..

-: تريدين الحل يا ست عنبة؟؟ رزقكم فى السماء..هل نسيتِ كلامك يا عنبـــــــة؟؟

-: لا يا ست ما نسيت..بس أعمل ايه..أنا مغلوبة على أمرى.. لو قلت لا.. يطردنى واروح فين بكوم اللحم ده..غير الشارع ..ولو قلت ايوه برضه..الشارع مستنى ولادى..أعمل ايه ..فهموا الراجل مش الست.

-: نظرت لها وانا بداخلى حيرة ما بعدها حيرة.. الحقيقة إن الحياة كده إنتِ خليتيها خل..وما فيها حل.!!

و..........

أعتقد إن الحل عند الحكومة الذكية..ولا يمكن عند الست زكية..عموما مش مهم الحل عند من؟ ذكية ولا زكية..المهم فين الحل؟

عموماً..أنصحكم بالإتصال بخط غير منتهى الصلاحية..دوت نت ..أو دوت كوم..أو 0900 أفضل.

ولكم الله من قبل ومن بعد..ولكِ أنتِ أيضاً يا عنبـــــــــــــة..

#شهد_أحمد_الرفاعى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات