حوار مع صديقى الليبرالى جداً

حمدى عبد العزيز

الحوار المتمدن-العدد: 8232 - 2025 / 1 / 24 - 23:07
المحور: مواضيع وابحاث سياسية
    

- ياآخى مبروك للشعب السورى ، والله انا فرحانله ..
- وحضرتك على كده يعنى بتباركله على إيه وفرحانله فى إيه ؟
- انت يظهر مش متابع
الشعب السورى ثار واسقط بشار الأسد
- الشعب السورى برضه اللى ثار ، ولا مجموعة ميليشيات إرهابيه على ميليشيات عميله لتركيا وبمساعدة دول اجنبيه أستولوا على الحكم ف سوريا ؟
- مش مهم
المهم أن بشار سقط ، وانا كتبت بوست هنيت فيه الشعب السورى ..
- ياسيدى فى ستين داهيه بشار ، يغور هوه ماكانش يعنى لومومبا ولا سلفادور الليندى ، وعلى فكره فيه دروس كتيره نقدر نستلهمها من أخطاء تجربة آل الأسد .. بس دلوقتى دمشق بقت تحت رحمة المدافع الإسرائيلية اللى توغلت جوه الأراضى السوريه وطياراتها ليل نهار فوق دمشق بتعمل غارات وبتضرب فى مقدرات الشعب السورى ودمرت كافة الأسلحه والذخائر السوريه ودمرت حتى المراكز الاستخبارية اللى فيها المعلومات الاستخبارية الحساسه اللى مفروض بتملكها الدوله اللى هيه ملك للشعب يعنى عملياً نزعت سلاح سوريا نهائياً ..
طيب مش ملاحظ أنه مافيش تعليق واحد يوحد الله من الجولانى ولاشلته ولا حتى رئيس الوزراء الجديد ولا وزير خارجيته يرفض فيه الاعتداءات الصهيونية على الأراضى السورية واحتلال أراضيها ، ده حتى باعتباره اعتداء على سيادة دوله هما بقوا بيحكموها أو حتى عاوزين يحكموها ؟
- مش مهم ..
كل ده يتداوى بعدين فيه الأهم ،
والأهم هو أن الشعب السورى ظفر بحريته ..
- طب هيه فين حريه الشعب السورى ، وسوريا على أراضيها خمس جيوش اجنبيه منهم تلاته بيساندوا الحكم الجديد واتنين بيتفرجوا ، واتنين من التلاته الأولانيين عمالين ياكلوا فى الأراضى السوريه ؟
- كل ده مش مهم دلوقتى
المهم إن الشعب السورى انتصر وانتزع حريته ؟
- طيب هايعمل إيه بالحريه والدولار تخطى الاتناشر ألف ليره سوريه ، والسوريين مابيقبضوش بالدولار ، الشعب السورى مش هياكل حرية ، فين الفكر الاقتصادى اللى ممكن يعمل تنميه وينهض بالاقتصاد السورى ويرجع سوريا ذى ماكانت فى تمانينيات القرن الماضى زراعه وتجاره وصناعه ومعدل دخل فرد كان عالى بالنسبه لمعدلات دخل الفرد فى بلاد كتير فى المنطقه ومنها مصر على سبيل المثال ؟
- مش مهم
المهم الديمقراطية ، وبعدين ياآخى الأكل مش كل حاجه ، ماالقطط فى الشوارع بتاكل .. المهم الحرية ياأستاذ .. ليس بالخبز وحده يحيا الإنسان .
- هوه الإنسان اللى مش عايش عيشه كريمه ممكن يعمل إيه بحريته ؟ أول حاجه هوه مش هاممكن يسلف رأيه لغيره مقابل ضمان لقمة عيش ، وممكن قوى يبيع صوته فى الانتخابات للى هايديله كرتونة زيت ورز ودقيق وسكر وشاى ، أو يديله بون لأى مول أو سوبر ماركت ، ده فضلاً عن أنه لايمكن يقدر يرشح نفسه لأى انتخابات إلا لو كان مليونير وطالع لغاية مالتى ملياردير (وده طبعاً بالدولار مش بالليره)
وبعدين فى الآخر بقى منتظر إن دواعش هيئة تحرير الشام والنصره ممكن يعملوا ديمقراطيه وحريات ذى ماانت متصور ؟
- لأ .. بس المهم بشار سقط ..
- ياعم قولتلك فى ستين داهيه بشار أنساه خالص دلوقتى
سوريا ممكن تتقسم تلتميت حته واللى باقى من أراضيها يتاكل شويه تركيا وشويه اسرائيل وبعدين كل جماعه سوريه تعملها دوله ..
- لأ .. انشاء الله مافيش كده ، الشعب السورى انتزع حريته والثوره السورية انتصرت ..
- طيب هوه استبدال ديكتاتورية سياسية بديكتاتوريه دينيه فى عرفكم (ثوره) ؟
- آه .. هيه ثوره ، ومبروك للشعب السورى ..
- طب انت عارف يعنى إيه ثوره ؟
- اه .. يعنى إسقاط النظام ..
- طيب ده يادوب الخطوه الأولى لأى ثوره وممكن تبقى الخطوه الأولى كمان لأى فوضى أو انتكاسه وطنيه لأى بلد ليها محيط إقليمى بتسوده توترات وحواليه مطامع للهيمنه الاستعمارية ومستهدف فى إطار خطط إقليميه ودوليه للهيمنه ؟
- مش مهم مادام نجحت (الثورة)
- طب نجحت فى إيه ؟
- نجحت فى إسقاط نظام بشار
- طيب بس الثورة اللى نعرف عنها هى التغيير الشامل لتحقيق مشروع لمصلحة أغلبية السكان ، مشروع تقدمى بتحمله قياده تغيير من قلب الشعب ومشروعها ده بيلتف حواليه الناس ، وبيبقى متلخص فى مرحلتين واضحين قوى المرحله الأولى كيفية انتزاع السلطه ، والمرحلة الثانية كيفية إدارة الدولة .. هل جماعة الجولانى عندهم مشروع تغيير حقيقي لصالح المجتمع السورى ؟
- مش مهم
المهم ان الثوره نجحت وبشار مشى ؟
- ياسيدى انت ليه متصور انى كنت متيم ببشار ؟ ، مايغور فى ستين داهيه .. انا باتكلم عن سوريا والمنطقة ، واللى هايجرى لسوريا والشرق الأوسط كله نتيجة الكلام ده ؟
- مش مهم
كفايه بشار مشى
- انت مدرك الأخطار الجيوسياسية اللى مقبله عليها المنطقة العربية ؟
انت مدرك أن ترامب دلوقتى اللى بيقود أمريكا وبيحضر لتسويه كبرى (غالباً هاتبقى على أنقاض سوريا وعلى حساب أراضى الدولة المحيطه باسرائيل)
وامه التسويه دى هاتتزامن مع تسوية الحرب الأوكرانية ، وتدشين منطقة الشرق الأوسط كقاعدة أوسع للهيمنة الأمريكية وبحيث إسرائيل (الموسعة) تبقى قائدة للإقليم وتخلص أمريكا ولو لمرحله زمنية من صداعين بيشغلوها عن صراعها مع الصين ؟
- واحنا مالنا بالكلام ده؟ المهم بشار سقط والثوره السوريه نجحت ، وألف ألف مبروك للشعب السورى

#حمدى_عبد_العزيز (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات