إلى متى يا غثاء السيل

سليمان أبو موسى

الحوار المتمدن-العدد: 8039 - 2024 / 7 / 15 - 14:39
المحور: مواضيع وابحاث سياسية
    

كان عندنا حياة وبيوت وأشغال ومشاريع وعايشين ، صح مش أحلى عيشة بس كان في حيطان ساترانا وسقف مأوينا .
اجت الحرب وأخذت معها كل شيء حلو ، أحبابنا وبيوتنا وكل ما يمت للحياة بصلة راح .
صارت غزة مكان غير صالح للعيش .
في تسع أشهر من الحرب نزل على غزة كمية متفجرات تعادل مئات القنابل النووية.
لحد ما غيرت هالحرب كل معتقداتنا الي اتربينا عليها وكنا بنسمعها واحنا صغار وبنرددها طول أعمارنا.
كانوا بحكولنا
🛑 ما حدا بينام جوعان
لكن في غزة مليونين إنسان من تسع شهور بيناموا جوعانين ، حتى لو لقيوا شوية معلبات فهي بس عشان تقدر تظل على قيد الحياة وما تموت من الجوع.
وما وقفت عند النوم جوعانين ، بل أطفالنا ماتت من الجوع حرفياً.
عشرات الأطفال ماتوا من الجوع ومن قلة الأدوية والحليب والأكل النظيف .
مئات الأطفال صاروا هياكل عظمية مستنين دورهم في الموت جوعاً.
آلاف الأطفال أنهك أجسامهم المرض بسبب الأمراض المعدية وتلوث كل شي في حياتنا.
كنا كمان بنسمع زمان
🛑 ما حدا بنام بالشارع
لحد ما شفنا اليوم شعب كامل بنام بالشارع ، أطفال ونساء وشيوخ بناموا على جنب الطريق لأن ما في أي مكان يئويهم بعد تدمير 80% من بيوت القطاع .
موت بطيء لآلاف العائلات الي افترشت الأرض والتحفت السماء بدون وجود أدنى مقومات الحياة الآدمية أو حتى الحيوانية.
تسع شهور أقل عائلة نزحت فيها مرتين وتلاتة وعشرة.
هروب من الموت للموت
كمان كنا نسمع زمان
🛑 انو الدم ما بيصير مي
لكن اليوم وبعد 272 يوم من الحرب على قطاع غزة المحاصر المجوع الي ما وقف فيه القتل على مدار شهور أمام عدسات الكاميرات وتحت أنظار البعيد والقريب ، تحت نظر الأمتين العربية والإسلامية دون تحريك أدنى ساكن.
الدم صار أرخص من المي ، لأن المي صارت مفقودة والها قيمة .
تخاذل عربي ودولي عن حرب إبادة لم يسبق لها مثيل وسط عالم مزدوج ووسط عرب فقدوا أدنى معاني الرجولة والحمية .
عرب قال عنهم الرسول قبل 1445 سنة رح ييجوا هيك بشر بقول عنهم مسلمين وحيكونوا زيهم زي غثاء السيل.
الإنسان العربي المسلم في غزة بيموت كل يوم بكل أشكال الموت ، عائلات بتموت من القصف وبتم مسحها من السجل المدني ، وأطفال بيموتوا من الجوع والعطش والمرض.
قدام مسلمين الشريف منهم بنزل منشور تضامن ع الفيس أو ببعت شوية فلوس من طرف الجيبة عشان يسكن ضميروا الي بنازع.
وبرضوا كنا زمان نسمع
🛑 الرجال ما بتبكي
لكن شفنا بغزة دموع الرجال زي الشلال الي ما بوقف ، شفنا قهر الرجال الي بتعجز الجبال عن تحمله ، بغزة رجال بتدفن كل عيلتها تحت التراب ، وبغزة كمان رجال قاعدة جنب بيوتها الي نقصفت على أهلها وما قدر حد يطلعهم ، يعني وصل العجز إنك ما تقدر تكرم أعز الناس عليك وتدفنهم .
في غزة رجال بتشوف أطفالها بتموت من الجوع قدام عيونها وهما لا يملكون من أمرهم شيء ، وعاجزين انهم يوفروا الأكل لأولادهم ، في غزة الأباء بتهرب بعيونها عشان ما تيجي عيونهم في عيون أطفالهم ونسائهم عشان احساس العجز مر زي العلقم .
وهذا غيظ من فيض هموم ومعاناة ما الها حدود .
لكي الله يا غزة
لا بارك الله في عروبتكم
#هنا_غزة

#سليمان_أبو_موسى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات