رسائل الزمن المر

عبد المجيد راشد

الحوار المتمدن-العدد: 1766 - 2006 / 12 / 16 - 10:51
المحور: مواضيع وابحاث سياسية
    

عدت من أداء صلاة الجمعة لأجد رسالة الصديق الجميل و الشاعر الرائع ،أحمد شلبى ، المغترب جبرا و قهرا ، لمجرد أن يحيا وأسرته حياة بسيطة كريمة .
أثارت رسالتة شجون و ذكريات ، من أيام الجامعة ، و سنوات التفتح الفكرى و السياسى فى نادى الفكر الناصرى بجامعة المنصورة ، و هى أهم و أجمل سنوات العمر .
و كانت رسالته شعرا ، لم استطع مقاومة روعته و بلاغة تعبيره ، و فجر فى نفسى مخزون الشعر ، الذى آثرت الإبتعاد عنه لأسباب خاصة و عامة منذ عقد من الزمن .
و إليكم رسالته ، و الرد عليها :ـ
أولا :ـ الرسالة
**********
يااااه
مش معقول
طول عمرى بقول
مهما تفنطنا الزحمة
ويفرهد روحنا حر المشاوير
حتما من ضليلة صدفة
ترطب نسايمها الأحزان
تطبطب على قلبى القلقان
تراضينى
تدينى أمان
و الله زمان
و الله و أصبحتى زوجة و أم
و بقيت شقيان
ازيك
عايشة ازاى
فاكرة كباية الشاى
بتاعة جمعه
فى ساحة البدراوى فى الجامعة
تحت الشجرة
لما عملها العصفور و مخدتش بالى
كل التفاصيل صغيرة و كبيرة عايشة فى بالى
بتلعب جوايا و بتجرى قبالى
ريحة الوردة اللى اديتهالى
لما طلعت من السجن
كلمات الحب و الصوت الهادى
اللافتات و الهتافات و الصوت العالى
جميع ألوان الأحلام
الزرقا و الخضرا
الوردية و الحمرا
و اللون المجهول للحلم الغالى
طلع اغلى من كل الى حوشناه
و الله وحشنا
بس أكيد برضه احنا وحشناه
تسمحيلى اقولك وحشانى كل الأشياء
و لما تضيق بيا الدنيا باشتاق
لعبير الحضن الفواحببراحه وبرده الدافى
لرحيق الريق الشافى
نفسى تضمينى لما أخاف
نفسى أخبيكى جوايا لما تخافى
كترت آلامى
و التفت أسلاك اللبلاب الشايكة على جناحات أحلامى
آأأأه لو كنتى سمعتى كلامى
و وقفنا الوقفة
و همينا بالنفرة
و نفضنا كل الحسابات عن مسامعنا
مش جايز كنا قدرنا نحوط على معنى
يكبر وسطينا و يخضر
يفرع و يورق و يزهر
و يطرح ضليلة تبرد شيىء من أوجاعنا
احنا اتباعنا
بعد ما سرقونا ، غموا عنينا و ربطوا دراعنا
صرونا فى متاعنا
نادو علينا ف أسواق اللعنة
و اتشيعنا
على اصحاب الياقات البيضا
و العربيات السودا
و البصات الصفرا
اللى بياكلونا يوماتى
بالشوكة و السكينة
فى هدوء و سكينة
على السفرة
و يمنوا علينا باللى يفيض
من عضم ضلوعنا
لا كلنا و لا شربنا
جينا ناكل لما الجوع انتابنا
نزلوا علينا
بصولنا فى منابنا
أنا مقهور .. مقهــور .. مقهـــور
و اللى مخلى القهر ف قلبى
يعشش
و يبيض
و يفرخ
فقدنا للقدرة على حتى
إن احنا نصـــرخ
أنا مقهور
لكن عمرى ما هاكفر بالنور
خدى رقمى .. لو مفيهاش إحراج
و ابقى اتصلى .. و رنى علىّ
لو جاكى مزاج
" أحمـــد شلــــبى "
****************
ثانيا :ـ الـــرد
××××××××
يااااه
يا أحمد
فاكر لما كنا بنختمها بضحكة و بكره هتفرج
و قلوبنا كانت خضرا
لكنه القهر
أنا فاكر يا أحمد
رغم الأيام السودا و رغم العتمة كاتمة على صدرى
و مخليانى معجون بالشوق
رغم الحلم المشنوق
فاكر ناصر
فاكرعوض و فؤاد و مجاهد و شبانه و الأسمرومحمد راشد
فاكر حاتم
آآآآآآآآآآآآآه
حاتم أبو قلب أخضر
و لسان ما يطلعش العيبة
و عيون بتطل من الشباك على حلم بتنظيم الناس علشان الثورة
فاكر حاتم
أبو بسمة و محمد
يااااااه يا أحمد
أجمل ايام العمر
الأيام اللى الحلم ببكره كان قدامنا و بنجرى وراه
بنسابق كل الدنيا علشان نلقاه
مش نستناه
أو نترجاه
على فكره
أنا أول مرة أرجع لكتابة الشعر من ييجى عقد
يمكن كنت بحس ان الكلمة مش جد
لكن لما لقيتك كاتب كل اللى جواك و بجد
لقيتنى كده من غير اعداد بكتب
و عموما
فاتحة خير
يمكن بالشعر نقول كل كلام يوصل من قلب لقلب
من عقل لعقل
من حس لحس

#عبد_المجيد_راشد (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات