سؤال وجواب مع حجي سعدون

حيدر حسين سويري

الحوار المتمدن-العدد: 7696 - 2023 / 8 / 7 - 00:19
المحور: كتابات ساخرة
    

حجي سعدون شخصية وهمية زنكلاديشية تجيب على الأسئلة بطريقة اجتماعية سلسة وساخرة، وعندما سألوا حجي سعدون بعض الأسئلة أجاب:
س/ لماذا لنا في كل موسم مشكلة؟ وخصوصاً في تموز؟
ج/ مو الناس تحمى، وتقارب على الانفجار واحنا يحكمونا توم وجيري وهذولي نادر ما يتصافون لذلك هم يلعبون واحنا الطايحين بيها.
س/ ما الفرق بين الجندرة والجندرمه والدوندرمه؟
ج/ الجندرة تعني النوع الاجتماعي، والجندرمة تعني البوليس الاجتماعي، والدوندرمه تعني الذوق الاجتماعي
وعمكم محتاج واحد الوان يسويله دوندرمه ترى مطككَـ
س/ حجي منو خرب الكهرباء؟
ج/ الفاسدين
س/ ومنو هم الفاسدين؟
ج/ الي خربوا الكهرباء
س/ حجي الظاهر انت لو تخاف لو ما تعرفهم؟
ج/ هي من ناحية ما اعرفهم فكل الشعب يعرفهم، اما ناحية أخاف فكل الشعب يخاف منهم حتى رئيس الوزراء
س/ ليش؟
ج/ بالمختصر المفيد ذيول الامريكان والسفارات ومن لف لفهم وهم لا يشعرون
س/ حجي ما تلاحظ وزن كلمة جندرة على وزن كلمة قندرة؟
ج/ ماكو فرق فالقندرة شيء جلدي مفتوح تضع رجلك فيه، والجندرة أيضا شيء جلدي مفتوح تحط ....... بيه
س/ حجي شنو سالفة الجاسوسة التي لزموها بالكرادة؟
ج/ اسألوا الذي خرب الكهرباء
س/ لماذا يحرق هذا المهووس المصحف الشريف؟
ج/ أولا هو يدور طشة والحصول على الجنسية السويدية ثانيا مثل ما يقول المثل (رب ضارة نافعة) وراح تشوفون شلون السويد والدنمارك راح تغير قوانينها بحيث يحاسب مثل هذا الاخرق.
س/ حجي هسه الوطنية وكالوا خربانة مدري انهجمت زين السحب اهلي ليش همين ماكو؟ معقولة هم الفاسدين خربوهم؟
ج/ والله بويه هذوله الفاسدين مثل حصان ابن طينان كل شيء يطلع منه.
س/ حجي تدري بأم قصر أخذوها الكويت؟
ج/ افه هذا الچنت خایف منه. گلوله: شلون؟ گلهم: ام قصر ترملت وهي بعدها صغيرة گتلهم زوجوها لأبو غريب ما رضوا وهای تالیتها المره نهبت... بس ابد، قصر خوش زلمه وهسه یردها. گلوله: حجی انت شگاعد تحچی!! گلهم: ولیداتي أنتم بعدکم تلامیذ کل شي ما تعرفون بدوالیب الدنیا.
س/ حجي شلون نتطور ونصير حالنا حال الدول المتقدمة؟
ج/ صيروا مسلمين. س/ لعد احنا شنو؟ ج/ أنتم مسلمين بس بالاسم؟ س/ شلون؟ ج/ الإسلام يقول: تنظفوا! وين النظافة عدنا؟! الإسلام يقول: ازرعوا، وحتى الرسول (صلى الله عليه واله) يقول: إِنْ قَامَتْ عَلَى أَحَدِكُمُ الْقِيَامَةُ، وَفِي يَدِهِ فَسِيلَةٌ فَلْيَغْرِسْهَا. ليش بلدنا انتشر بيه التصحر؟ الإسلام يقول: تعاونوا! وين التعاون؟ الإسلام يقول: حب لأخيك ما تحب لنفسك! احنا شيكَول المثل الي مطبقيه: (اشوفك زين تلعب روحي)! عمي إذا تريدون التطور عليكم بالنظافة والزراعة والتعاون راح تقضون على التلوث والامراض بعدها كلها تنفتح امامكم وخصوصا إذا تابعتوا المثل القائل: (قوم التعاونت ما ذلت). وشكراً لكم ... تعبت

#حيدر_حسين_سويري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات