كوفيد-19 والباي بولر

مصطفى التركي
شاعر
(Mostafa Eltorky)

الحوار المتمدن-العدد: 7184 - 2022 / 3 / 8 - 18:29
المحور: الادب والفن
    

لقّحت جسمي ينام على أسفلت أوضتي
وصحيت في ساعة
قبل ما شمس المرض تبقى عمودية
-فين السجاير؟ فين؟ وليه الأوضة هادية؟
إيه اللي حاصل؟ ليه الشوارع برضو هادية؟
يعني إيه؟ لازم امشي السكة دي وأجيب سجايري؟
ابن اخويا فين يجيبلي؟ خد وهات
عقلي شاط
إرتباط
قلبي حطوه احتياط
إيه اللي انا بقوله ده كله؟ جبت؟ هات.
بعد ما ولّعت واحدة
عرقي نازل نقطة نقطة
جسمي عمّال يترعش وبدأت اشوف
الخيال ويا الحقيقة بدون كسوف

المطر نازل ياخدني
المطر ده فيه كورونا
دي مؤامرة عالمية
يا ناس سيبونا
لأ ده وهم
لأ حقيقة
لو وصلكم أي حاجة كلمونا.
هو ده كاتب في بوست كلام يلقّح قصده مين؟
ده أكيد لازم قاصدني والكلام ناصبه كمين
إيه اللي جاب أمريكا بيتنا دخّلوها إزاي منين؟
لأ ده وهم
لأ حقيقة
عقلي ليه رجلين وماشي ونفسي أعرف ماشي فين؟
سيبوا قلبي
إنتوا بتشدّوه وعايزين تقتلوه
فين قزازة الميّه ارش الأرض؛ عاملين لي عَمَل
كلكم جعانين وناويين تاكلوا جسمي
بعدها تحلوا بفواكه طعم اسمي
-فوق لنفسك يا ابني فوق
=ده أنا فايق وفوق
-ليه بتضرب في الهوا رصاص الكلام
=كنت عايز أقول للناس بإني مش تمام
إوعوا من وشي أنا موجود هنا
أيوة عارف كل حاجة
كل حاجة
كل حاجة

قومي يا ستي
كورونا
جت علينا
والمطر جايب كورونا
فيه بشر بيموتونا
أيوة خايف
بصوا على حركة سناني والشفايف
أيوة قلقان م النهاردة
عايز آخد البشر جمعًا في حضني
لأ ده وهم وناوي لجهنم ياخدني
هاتوا مصحف
أقرا فيه
هاحتويكم واحمي نفسي اتحامي بيه
البشر عايزنني اموت
يا خراب كل البيوت
يا كورونا
كل دول راقبوني حاسبوا يراقبوا فيكوا
بصوا إيدي من السلام شايلة إيديكوا
-يا ابني إهدى
=هاتوا مصحف
-ما انت ماسكه
الطريق يكشف لشخص مدى تماسكه
واللي يهذي
حد زيي
ليه المرض ساب كل واحد ع الطريق ولقيته جايلي؟

في انتظار الكون بحاله ياخدني منكوا
فيه أكيد قوة غريبة فوقنا إحنا
البشر، ساعة ما حاولنا نفكر، دوبنا، سيحنا

آه يا راسي
الصداع يا ناس قسمني
والألم نابه طويل
غارسه في فصي الشمال
أي برشامة احتمال
لما أبلعها تكون جاية مقاسي
آه يا راسي

جابوا دجال خفت منه
دس في الميّه مُهدئ
قال كلام مش فاكره عني

جابوا دجال غيره تاني
خفت أكتر
كان سمين ومعاه عصاية
قال حاجات بالهمس خفت
قال وقال ووافقت طبعًا
قاللي شوفت؛ قلت: شوفت
سابني على إني كويس
بس انا في الوهم طوفت

جُم ملايكة
أو مشايخ
أو ملايكة في المشايخ
أذّنوا في البيت عشان
يرعبوا صنف الشيطان
نمت على حجر المشايخ
قال رُقْيَةْ
هديت معاهم
جابوا ماء ورد وسقوني
قالوا: واللي اتبقّى منّك
ادلقه ع الجسم من فوق الكتاف.
ده اللي خلّاني آمنت
لما شوفت ملايكة فيهم
شالوا ألمي، الخُفاف

خفت على صاحبي ندهته
دوست على إيده وقلت:
الناس يا صاحبي

الألم أتاريه مخبّي

قبل ما ادخل للطبيب
كنت شايف كل حاجة لابسة حاجة
اللي جوا التاكسي صاحبي
واللي مرسوم ع الحيطان ده رسالة ليا
والعصير فيه سم فيا
أي حاجة خارجية
ساكنة فيا متدارية

شخّصوني
باي بولر
زي فان جوخ ف زمانه
بس كل الفرق بيننا
إنه لما إنتحر
عشت انا واقف مكانه.

#مصطفى_التركي (هاشتاغ)       Mostafa_Eltorky#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات