حكايات ابو الجليل (1) ابو الجليل وابو النواس طيزين بلباس

زاهد عزت حرش
(Zahed Ezzt Harash)

الحوار المتمدن-العدد: 6881 - 2021 / 4 / 27 - 17:01
المحور: الادب والفن
    

حكايات ابو الجليل (1)
ابو الجليل وابو النواس طيزين بلباس
زاهد عزَّت حرش

دارت دورت الايام والتقى ابو الجليل مع ابو النواس وصاروا أعز الاصدقاء. وعلى قولت المثل صاروا طيزين بلباس.. نط ابو الجليل وقل له: يا صاحبي بلا ما نِكتب طيزين بلباس، خليها قَفيّن بلباس!
رد عليه ابو النواس وقال له: شو خَيّا بدك تشَقلِب الكون.. مكل الناس بتعرفها وبتحكيها طيزين بِلّباس.. إسا عشان بدك تكتبها قَلبِت اللي ايها قضية أخلاقية! حطها كيف الناس متعوده عليها، هيك بفهموها على الأصول.
ما علينا، مش هون مَربط الفرس، اللي صار إنه من يوم ما صاروا اصحاب وحبايب، صاروا يلتقوا يوم يوم، إذا اختفى ابو الجليل بتلاقيه عند ابو النواس، وان غاب ابو النواس ما بتلاقيه غير عند ابو الجليل.. يوم يلّعبوا ورق "شدة".. ويوم طاولة الزَهر، محبوسة أو شيش بيش، المهم ما كانت تِفرِق مَعهن مين الغالب ومين المغلوب.. المهم يكونوا مع بَعض ويِحكوا بسيّرة الناس، ما خلّوا مخلوق بالبلد من شرهن.
ويوم من الأيام اكتشف ابو النواس انه صاحبو ابو الجليل بِحب تِربايّة الطيور.. ومش مخلي أنواع عصافير إلا وجايبها، ومن هيك ما كان يطلع من بيته قَبل الساعة عَشرة، لأنه كان يطعم عصافيره ويطمئن عليهن.
قام ابو النواس قال بدي أعلم ابو الجليل الزمباع من وين بنباع.. داير لي عالطيور...
وهيك لما التقوا الجماعة مثل العادة، قاله ابو النواس: هيك يا خَيّا بتخَبي عني طيورك وما بتحكي لي عنهن.. ولو شو خايف أطرُقهِن عين أودرهِن؟؟ أصلاً لا عيوني زرق ولا اسناني فرق، عشان هيك اطمئن ما بعرف أصيب بالعين.
- لا يا خيا يا ابو النواس، القصة مش هيك، كل ما فيها اني ما حبيت أشغِّل بالك بِهيك أمُور....
- لاه لاه.. ولك إحنا اصحاب، إحنا اخوة، شو تشغل بالي واشغل بالك، مَهوّ بالك بالي وبالي بالك.. ليش هو ظل بيناتنا إشي مخَبى!؟
- والله يا صاحبي ما ظل إشي بناتنا مخبى... خلص، على كُل حال هيّاك صُرت تِعرِف البيّر وغَطاه.
- لكان إسمع إذا بَدك طيور تِخدمَك وتّعَوّض عَليك، بَدل أنواع الكناري اللي ما بيجيبوا هَمهن!! ما إلك غير طير الفريّ، هذا الطير بِبيض مِثل الجاج "الدجاج".. ولحمُه أطيب ومغذي أكثر، وسعرُه مَقدُور عَليه.. إذا بَدك منرُوح مشوار على بَرطعه، هُناك بيبيعوا الأربعتعشر فِريّ بِمية شِيكل.

اقتَنع ابو الجليل بِحَكي صاحبه.. وراحُوا سَوا على بَرطعه وزيّ ما حَكى ابو النواس صَار.
وراح يوم وإجى يوم، والفريّ لا بِقاقِي ولا بِبيض، مَع إنه ابو النواس قال لصاحبُه:
- بآذار بِبيض الشِّنار، يَعني الفريّ والسُمَن والحَجل وغِيرو!! وإجا آذار وراح أيار.. لا قاقا الفريّ ولا بَاض، ومِن كُثر ما اشترى ابو الجليل عَلَّف وأكِل للفريّ خِرب بيتهُ! صار يّدَوّر على مِين يّقيمهِن عَن ظَهرُه، ولَعَن الساعه اللي إشترَى فيها طيُور، وصَار مثل ثُور الساقيّه يّدُور ومش عارِف لِيّش بيّدُور!!
وراح يوم وإجا يوم، قام ابو الجليل طَب على ابو النواس من دوّن مِيعاد، لَقاه مَشغول بِكَم شَتلِة زَريّعَه مِش مَعرُوف أصلّهِن مِن فَصلّهِن، وصَار ابو النواس يّحكِي لابوا الجليل عن الوَرد اللي مَزروع بِجنينتُه كأنه عَمبِحكيّ عن الّجَنايّن الّمعَلَقه.. طَحش ابو النواس وما خَلّى نُوع نَبتِه تِعْتَب عَلِيه، وابو الجليل مِش عارف كيّف يقَطبها مَعاه.. لَحَد ما وصِل ابو النواس حَد نَبته سَماها الجَسّاس، وصار يّحكِي لصَاحبُه عن جَسّاس ابن مُرَّة وكيف قَتَل كُليّب، وكِيف الخَنسَاء بلّشَت تِندِب أخوها بأشعارها اللي بتوَّجع القَلب، وإنه هذه النَبته اسمها جَسّاس على اسم جَسّاس ابن مُرَّه... قام ابو الجليل فَرَط مِن كُثر ما ضِحِك.. استَغرَب ابو النواس وسأله: شو صَابَك؟ على شُو عم تِضحَك؟
رَد عليه ابو الجليل وهو مِش قادِر يُلقُط انفاسُه من كُثِر مَا ضِحِك
- يا ابو النواس عْمِلت اللي إياها نَبتة جَسّاس وكُل الناس بْتعرِف أنو اسمها بُسْباس
والا صابنا فيّك زَي ما قَال المَثل.. اللي بِعرف بِعرف واللي ما بِعرف بِقول كَف عَدس.

شفاعمرو/ الجليل 22 نيسان 2021

#زاهد_عزت_حرش (هاشتاغ)       Zahed_Ezzt_Harash#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات