الرطب

عجيل جاسم عذافة

الحوار المتمدن-العدد: 6859 - 2021 / 4 / 4 - 00:21
المحور: الادب والفن
    

الرطب كله رطب مابيه
رطب موزين
لو گالوا البرحي صدگ
لا ما تعدي العين
ولو گالو الگنطار
شوف شحلاته زين
والشكّره ياناس
والرطب هم نصين
خضراوي ذاك الشفت
اخضر يلالي العين
شرد آنه اعدد الك
من اشكال اخذها البين
ديري الحمر بسرته
لو من دگل هيرين
اصفر وصافي البسر
والنيرسي هلالين
منّه اللي ينضج وقت
وبيه للشتا متانين
يعني الرطب يستمر
تلاثه وشهر شهرين
والزهدي متاخر ابد
ما يلحق ويه اثنين
لا ويّه ساير سبق
ولا ويه ام الدين
والشوچي المخطط رطب
ما شفنه مثله وين
وشويثي تمره العدل
كشمش تراه يبين
عمراني ذاك الرطب
لو ذاك ابو سلالين
شحجي وشسولف ثمر
مابيه غبر مو زين
نعمه وكثيره وبغت
بس الشكر عادين
و يزيدها رب الخلگ
ويديم بيها الزين
چبچاب من تطبخه
وبريم صار اثنين
وتضمه طعم الشتا
لا برتقال الشبه
ولا يابس من التين
الهنود كم ورّدوا
منه كثيره سنين
والوادم امسابق شرت
مو طن ولا طنين
منّه البواخر حمّلتْ
لذيج الدول والصين
ونجيب من عندهم
سوس ودوا وطحين
والخير من النخل يزداد
لمن تزيده طين
من تدفن النخله عدل
من الگاع يم الجذع
كون الدفن شبرين
مزهيه تبقى عمر
والماي بالصوبين
شايف رطبها شلون
نقاط من الدبس
دمع الحلو بخدين
ولولو عبالك صدگ
يتساگط بنورين
بس جيب راشي وهني
للياكل ثنيوين

#عجيل_جاسم_عذافة (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات