بين عدمي و إنسان إنساني جدا

مازن كم الماز

الحوار المتمدن-العدد: 6504 - 2020 / 3 / 2 - 09:08
المحور: اليسار , التحرر , والقوى الانسانية في العالم
    

شو قلت دينك يا أخي ؟
عدمي ..
دين جديد هاد ؟
مو كتير .. فيه منو من زمان ..
يعني إنت ما بتؤمن بالله و محمد ؟
و لا بأي الله و لا بأي محمد ..
العمى , كيف بتحكي هيك , أستغفر الله يا أخي , شو هالحكي ؟
مو بس هيك , اسمع , أنا كمان بعرف إنه الدنيا رح تخلص هيك يا أما بنيزك بس الأغلب إنها رح تخلص بمجزرة كبيرة بيقتلوا فيها كل البشر بعضهم , شي دفاعا عن الله و محمد و شي ضد الله و محمد ..
كيف تخلص يعني ؟
يعني تسكر بالمرة ..
مين ؟
الدنيا .. أنت أنا كل الناس .. كل شي .. قصر الشعب و سجن صيدنايا و قصر العدل و الكعبة و الفاتيكان و المسجد الأقصى .. ترجع متل ما كانت قبل أول بني آدم ..
ما فهمت بس كأنها شغلة كبيرة ..
لا كبيرة و لا صغيرة .. كتير كتير صغيرة .. اتصور الأرض ما فيه عليها سجن , و لا قصر , لا غني و لا فقير , و لا أصنام و لا مخافر شرطة و لا حدود و لا مساجد أو كنائس .. ما فيه حدا بيكذب , ما حدا بينافق , ما حدا بيدبح حدا .. ما حدا بيسكت لأنه خايف .. ما حدا بينام جوعان , ما حدا بيقمع شي جواتو , ما حدا بيقمع حدا ..
العمى , كيف هيك بدها تصير ؟
لما يموت كل البشر .. كله رح ينتهي .. كتير بسيطة ..
العمى .. كيف بدهم يموتوا , ليش هيك عم تحكي أخي ؟ أنت بدك تقتل كل الناس ؟؟؟
ما فيه داعي زفر إيدي بهيك شي , هن رح يقتلوا بعض .. الكذب و الكره و النفاق و انعدام الضمير و الجبن و التفاهة اللي على هالأرض كافية لتدمرها ستين إذا مو ألف مرة .. أقوى و أكبر من أي شي نووي و كيماوي و جرثومي ..
حرام تفكر هيك يا أخي , استغفر الله , هي وسوسة شيطان .. و ليش بدها الناس تقتل بعضها ؟
متل ما قلتلك رح تقتل بعضها دفاعا عن الإنسانية و الخير , نفس الإنسانية و نفس الخير , و كمان دفاعا عن الأخلاق , و أكيد عن الحب بين البشر و لا تنسى الشرف و الكرامة وووو ..
شو عم تحكي يا أخي , أستغفر الله , تعالوا يا جماعة , شوفوا هالصرعة ؟ بعدين الناس لشو تقتل بعضها , الناس بتحب بعضها , كلنا عندنا إنسانية و بنخاف الله ..
لهيك تحديدا رح تقتلوا بعض , منشان الإنسانية و قبل كل شي لأنكم بتخافوا الله ..
ليش يا أخي .. بدل ما تقول الله يهدي النفوس و الله يستر و يحمينا من شي أعظم ..
للأسف ما عم تخيبوا ظني فيكم أبدا .. بحب الوحش جواتكن , بس حتى الوحوش محكوم عليها بالانقراض .. حتى الديناصورات إجا نيزك و طحنها و عمل من عضامها زيت و كاز .. لا تطولوا , منظركم و إنتو عم تتقاتلوا بالمفرق على الخير و منشان الإنسانية و الشرف و الحق و العدالة كتير غبي , شوية حرايق و مذابح و نهب و كره و زفر و كذب ما بيخلص , فيلم صار ممل و غليظ و مبتذل , منظركم و أنتو عم تنشووا بنار كرهكم بالجملة أحلى .. هبلان , محسبين الدنيا موقفة عليكم , نحن متل قبائل النياندرتال للشي الجديد اللي رح تعملو الطبيعة بعدنا , يمكن يكون شي مظبوط و بيستاهل و بيقدر يعمل شي أحلى من القرف اللي عملناه سنين على هالأرض ..

#مازن_كم_الماز (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات