من هل الزاغور ما يطلع عصفور

خالد العاني
كاتب
(Khalid Alani)

الحوار المتمدن-العدد: 6123 - 2019 / 1 / 23 - 23:31
المحور: كتابات ساخرة
    

يا ناس الصبر طيب على يا مال مستعجلين راح الكثير وبقى القليل ما اقصد المال والحلال اقصد الايام والسنين غمض فتح تشوف كل شيء على المرام وشوف عندك يا سلام شوف الكهرباء فوق الحاجة اليومية وراح تجيلك منها حصة اضافية مثل الحصة التموينية في كل شهر رمضان ما شفتم كل سنه تنطينه الحكومة ربع كيلو عدس وياه تعليمات الاستعمال تلهم منه ملعقة شاي اول الفطور وملعقة عند السحور ولم تنسى وزراة التجارة الطحين الصفر كيلوين حتى نسوي كليجه العيد شوفوا الاوفياء مينسون شي وفوق ذاك ربما دجاجة مشوية حتى الفقراء والمتقاعدين يتبحبحون ويفرحون من صدك بالعيد شفتم الدنيا ربيع والجو بديع .. يا ناس ماكو مشكلة اذا الكهرباء متذبذبه او غير مقتدرة عن تشغيل الاجهزة حالها حال الاسعار والمتذبذبين المتمسكين بالاخلاق والدين .. اما الماء شكو بيه طبيعي ميه الميه بيه ( اشكال ارناك ) ترسبات ملحية وطينية ورمليه ويرقات وبيوض اسماك وقواقع وفلزات ولا فلزات يا ناس يرادلكم خبرة حتى تستفادوا منه خلوه يجي قطرة قطرة وشوفوا شلون يجيكم ماء مقطر ولوما هاي الماطورات ماكان يشفط طين او طحين ولا تباوعون على ذولة البطرانين اللي يشترون مي ابو البطاله وانتم ليش خايفين احنه قبل خمسين سنة كنا نشرب الماي من راس الحنفية .. اما مجاري مياه الامطار العبعوبية والصخرة العدوانية فأمانتنا متقصدة ما تفتحها لانها واضعة خطة شيطانية ؟ تريد تحول بغداد الى فينيسا الشرق ( البندقية العبعوبية ) تيمنا بأسم المحروس سارق قلوب العذاري نعومي ها ليش ما تصبرون غشمه غشمه غشمه دنكول يرادلها صبر صبر صبر صبر اصبروا وصابروا كما صبر صابر العيساوي ابو البلاوي .. اما الامان فنعمة من الرحمن ومايطلع عصفور من هل الزاغور لان ملايين البنادق المحشوة وجاهزة تسويه شوربه ... اللي يعبد الله خليه يعبده ايريد في بيته ايريد في بيت الله ايريد يسوي هو بيت الى الله هم خليه يسوي على راحته لان خلي يفيد ويستفيد يريد يلعب طوبه خليه يلعب حتى في بيت الله واليغني خليه يغني حرية حرية بيع المشروبات الروحية واللاروحية والحشيشة والكرستال هاي مسألة جدا طبيعية واللي يريد يسكر خلي يسكر واللي يأكل مزه خليه يأكل مزه واللي يسمع ام كلثوم خليه ابراحته واللي يسمع يوسف عمر هم حلال واللي يتنزه خليه يتفسح ويترنح حرية ( عرب واكراد حرية وبالوسطة الشروكية ) وفد حزام ها خوتي ها ... والاستاذ والدكتور والمحامي والقاضي راضي والعالم والاعلامي والضابط والطيار حتى الجندي والشرطي محرسين ( بسور سليمان ) امان ياربي امان وكل لحظة تمر عليهم نسمة من نسمات الجنان .. اما الشعراء والادباء والفنانين والمهاجرين الى بلدان الشيطان فهؤلاء دعاية للحكومة الملائكية التي خرجت من القمقم بأمر من كونفشيوس العراق اللي يحتاج نمرة 48 حتى يفتح عينه .. العربي والكردي والتركماني والاشوري والكلداني والصابئي والايزيدي وحتى اللي ماعنده قوم ينتسب الهم فهم في امان امان امان ياربي امان وكل واحد يستلم حصته بالميزان .. انت مسلم سنشيعي او مسيحي ارثكاثوليبروستناتي خلط وش لا يختلف الامر سواء بسوا وسيان سيان حقك في الدستور مصان مصان مصان وحياتك في حرز وامان على عناد الجيران هنا في العراق نختلف عن كل البلدان ارفع راسك انت عراقي وللابد باقي انت عراقي مرحب بكل في كل الاوطان لا فيزا ولا موافقة حكومة تلك البلدان دينارك قوي قوي اقوى من هرقل وعدنان القيسي وفالت من العنان كم دينار تعيش في ارقى البلدان تتمتع وتتعالج في اي مكان وتقدر تجلب معاك كم جارية من ارقى البلدان .. بس يرادله صبر صبر صبر اصبروا ياعراقين راح يجيكم الرزق مثل ماي النهرين في وقت الفيضان اجاكم المهدي العادل وراح يرجع العراق الى ايام زمان والكل ربحان وما حد خسران بس الحرامي والديوس واللي ماعنده وجدان افهموها بس يا جدعان

#خالد_العاني (هاشتاغ)       Khalid_Alani#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات