جاسمية تهدد ربع ابو جاسم

مؤيد عبد الستار

الحوار المتمدن-العدد: 5951 - 2018 / 8 / 2 - 03:27
المحور: كتابات ساخرة
    

مشهد تمثيلي
* ايـــه ... ما طار طير وارتفع / الا كما طار وقع ...
- انا اخوج ... شنو هاي جاسمية .. صايره ترطنين شعر فصيح
* اي .. من وره ربعك ... اللي ما خلوا شي ما نهبوه
- يابه اش نهبوا ... هي شوية نفطات وما الهن سعر بالسوك .. ما تشوفين شلون صار سعر برميل النفط بفلس ونص
* ليش هو النفط قليل .. مو باعوا بالمليارات .. وشوفة عينك .. لا كهرباء .. لا مستشفيات . .. لا مدارس للجهال ....
- اي قابل انتي مريضة وعينج على المستشفيات .. والله بس يربح مجلوب السلف بالانتخابات لا اخليج تسبحين بالحليب
* لا حليب ولا شي .. انا حالي من حال ها الوادم .. نريد ماي وكهرباء مثل العالم .. ليش الكويت احسن من عدنه .. اشو كلشي عدهم .. ماي .. كهرباء .. مستشفيات .. سيارات .. وفوكاها ما عدهم ولا نهر .. واحنا عدنا دجلة والفرات وميتين من العطش ... الله يقبل !!
- جاسمية .. شنو كهرباء .. اجدادنا مو عاشوا بلا كهرباء وبنوا الملوية والزقورة .. يعني الا كهرباء ، يرحم والديج .. ما تنراد كل ها المظاهرات علمود الكهرباء ... ابوج الله يرحمه مو كضه عمره على فانوس ولاله ...وجان نظره سته على سته .. ويشوف مثل زرقاء اليمامة .
* يعني تريدنه نبقى على زمان كبل .. وكل هالملايين اللي اجتنه من النفط .. ونبقى على الفانوس
- انتي ما تجوزين من النفط .. عبالك ابيج المرحوم طلعه من بطن الكاع ، اشو الانجليز طلعوه وسووا فضل علينا بهالدولارات الخضر اللي كام تزخ علينا زخ ... بس خلينه نشوف دربنه هال الدورة الانتخابية وخلي مجلوب السلف يرد النوب للبرلمان وشوفي شلون نبربع .
* ما تكلي ش نبربع .. مو الوادم كاتلهه الجوع من الفكر والعطالة بطاله .. لاتعيين .. لا معامل .. لاشغل .. ما تكلي تاليهه وي ربعك
- شبيهم ربعي .. اشو واحدهم لو بانيله جامع لو حسينية .. خو مجلوب السلف هاي سابع مره يروح للحج ، ووجوهم منورة مثل البدر ... تنكط نور .
* وجوهم تنكط نور لو تنكط ... ، روح اسأل الوادم اللي طالعه مظاهرات بها الحر الاكشر وتصيح نريد ماي ونريد كهرباء
ما تكلي وين ودووا الملايين وشلون فرهدوهه .. اي هالملاعين السلفة لو بانيلهم مدرسة ، مستشفى ، خلك شارع مبلط .. اشو كلشي ماكو .. ايدنا والكاع .. ما شبعوا نهب .. اخ لو ربعك يطيحون بيدي .. الا اسحكهم سحك .
* ده شوف الخايبة .. تسحكهم سحك ..!! جاسمية .. هذولة واحدهم تحرسه عشيرة تفاكه .. انتي تردين تسحكيهم .. والله يخلوج بحلك الطوب ويسوج وذره وذره .
- ما يكدرون .. شحدهم .. اذا وراهم عشيرة .. انا وياي الشعب كله ....شفت شلون شرد مجلوب السلف وحراسه من واجهوه بالمظاهرات :
ها ها ها .. ويـن يـروح المطلوب النه ... ويـن يـروح المطلوب النه

#مؤيد_عبد_الستار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات