باسمك هُبَل - شعر شعبي عراقي

الحسين الطاهر

الحوار المتمدن-العدد: 5483 - 2017 / 4 / 6 - 02:55
المحور: الادب والفن
    

بِسْمَك هُبل
وصْلْوا سلامي الما وِصَل
فلْشَوا تِمثالَك بِالعَجَل
**
بِسمَك هُبَل-
مِنهو التِلَحَّف بِالوَجَل؟
منهو انطِرَد و بلا ذَنِب؟
منهو انكتل؟
**
بَعدَك هُبَل
سيل المْهاجَر
صاير رَتِل
بعدَك هُبَل
ذيل الجَلِب لا مَنعِدَل
**
بِسمك هُبل-
ياهو السِبى العْزِيز؟
ذاك انصمط بالصيف
ذاك شِتاهـ فريز
تْكطْعَت بالمشي رِجليه
بالكاع طن كْزيز
شبابيج بيوت مكسِّرة
و ثِكَل على ظهره الحِمِل
**
مو باسمك هُبل
مو انت يَلْ مَظلوم
الشيّلتَه حِمل هموم
احنة النريد نكوم
و الحِمِل ما ينحِمِل
و غيرَك زيّدنا دَبَل
**
وينك هُبل؟
وين الركص، وين الأمل؟
مو دَك رُكعة و ليورة
ارجَعْ مِثِل بول الجِمَل
هذا كافِر، ذاكَ فاجِر
مو حبِّلوا الما حِبَل
ذاك القَصِر نار اشتعَل
هذي المُدُن اكْلَتْ وَحَل
يمكن ما صِمناله و زَعَل؟
يمكن من دعيناله جِفَل؟
عمي دُعاء الما صَعَد
و عِزتَك، عبّالنة نِزَل
"مَجان القَصِد"
كُلّه هُبَل !
**
هذا الدعاء اللي يِرِد
و عزتك، من حلوكنا شِرَد
و اذا ضايج من الثرِد
نصوم، و كُلّه يِعِد
شهر، شهرين، و سنة
جنّه رضى؟ لا طمّنه !
ضاعُف عَدد، و اضرُب رُكَع
و سَمِّع جبريل الما سِمَع
بس عوفه بحاله الوِكَع
هو يكوم، مالَك دَخَل
**
كُلّه هُبَل !
كل يوم برأي، أدري انثول؟!
و يوميّة محرِّك هَل دول
هذا طلع، ذاكَ دِخَل
ربّ البخت
كل هل ارباب الواكِعة
و انت التظَل ؟!
عالمنا بس لابن الزنا
السِما هم بس للنذل؟!
دخيلك تعلّم يل جبير
يمَّك زُملاء العمل
شوفه شكد عاقل هُبل
شنكول ؟! سبحانه الما عِقَل !
**
اكُلَّك هُبَل !
ابنيلك تمثالَك ذَهَب
و اسويلك اللي ما حِصَل
و انسالَك كُل العَتَب
بس احجي وي هل نَغَل !
و اعلُ هُبَل !

#الحسين_الطاهر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات