شعر شعبي (رصاصات قلم )

عماد ياسين آل شهزي الطائي

الحوار المتمدن-العدد: 5369 - 2016 / 12 / 12 - 09:59
المحور: الادب والفن
    

شعر شعبي عراقي

رصاصات قلم

عماد ياسين آل شهزي الطائي
الاهداء
الى .. وطني الغالي

مجلس النواب
كرامتنا العزيزة وكل الأسباب .. المرت علينه بغصة أثر غصة
كومه سنين ما غيروا النواب .. ولا آهل السياسة الواقع آبصه
كم أيلول مر كم شهر أب .. غرﮔانه الشوارع حفرة لو طسة
لو تمن نقص لو سكرك غاب .. والحصة بعدها هيه هل حصة
واحدهم نذل والثاني ﭼذاب .. من كثر الـﭼذب ما تعرگ الگصة
و بكثر الوعود أتالف كتاب ..بس وقت الحقيقة تصيرلك قصه
النائب وقت انتخابه أيصير حباب .. من أيلوح صوتك دمك يمصه
كل همه شيحصل ينهب أنهاب .. ويكوم رصيده فلوس ويرصه
هو هذا العراق وهيچ ينعاب .. من فعل السياسة الطشرت فصه
يول اعرف مقامك أنت تيزاب .. تحرگ هشعب وتبوﮔـة يا لصة
***
عساها ابخت الـﮔالك

عساها أبخت الـﮔالك .. والـﮔالك يتحملك
سوده بوجه حكامنه .. فرهدوا كل أحلامنه
واشتروا كل أقلامنه .. والـﮔالك يتحملك
الساسة جونه بهل خطب ..لا نخوة بيها لا نسب
بس نارهم شعلة كرب .. والـﮔالك يتحملك
النواب بس سب و ثلب .. لا فعل لا رفع ونصب
لا نفع فد يوم العتب .. والـﮔالك يتحملك
أعمالهم كفر بكفر .. لأعفه عدهم لأستر
والغيرة عصروها عصر .. والـﮔالك يتحملك

الـﮔالك ﭼذب بـﭼذب .. حرية ما عدنه عجب
شوال هم يسبق رجب .. الـﮔالك يتحملك
مهجوم بيتك يالفـﮔر .. خلانه نكفر بي كفر
من الصبح لحد العصر .. والـﮔالك يتحملك
ضلينه بس بأوطانه .. أجيال فوگ أجيالنه
نـﮔطع باوصالنه .. والـﮔالك يتحملك
الزلم مليانه غضب .. للنار سوونه حطب
حرﮔونه بذيچ الخطب .. والـﮔالك يتحملك
لعراقي ﮔضاها بهضم .. ما باقي بس جلد وعظم
والقهر يـﮔظم بي ﮔضم .. والـﮔالك يتحملك
لعراقية تبقين بستر .. بالرغم من كل القهر

مهضومة من عصر لعصر .. والـﮔالك يتحملك
يـﮔلون الجيش سور للوطن .. يحمينا أيام المحن
بالقصف طحنوهم طحن .. والـﮔالك يتحملك
جت ناس مليانه دغش .. مـﭼفن وﮔاعد بالنعش
يـﮔلون إن اسمه دعش .. والـﮔالك يتحملك

***
هنا الانبار

أهل الطيب و النخوة وحماة الدار ..ورواگ الحمية المالفاهم عار
واحدهم شهم والثاني مغوار .. ناعور الكرم شما جرى وصار
هنا الأنبار
معباية الشباب ألبيها إصرار .. ماترضى بظلم زغار وكبار
أهل غيره عربية وجود وأحرار .. ودروع الشجاعة بصولة الكفار
هنا الانبار
حاميها العزيز الواحد القهار .. اختصها بنهر من بين الأنهار
يرويها الشجاعة الصدق والإيثار .. المالح أهلها بزاد ما يحتار
هنا الانبار
اسمع أرد أﮔلك عنها اخبار .. مر بيهم وكت وتخربط المعيار
تسيدهم نذل هم خاين وغدار .. ما همه أهلها كل همه دينار
هنا الانبار
شرد أحـﭼـي واﮔلك صار ما صار .. وين شيوخها لنحسبهم كبار
طلعوا بالهزيمة شو ﭼنهم الفار .. كل واحد نذل عاف أهله تحتار
دليهم يخوي إذا اكو عطار .. بلكي يبيع غيرة للباعوا الانبار
هنا الانبار
طشرها الظلم سواها طشار .. عاشوا بالخييم هم ناس بالغار
ما واحد سلم ﭼن مرهم إعصار .. من فعل السياسة المليانه أسرار
***


بطران يسألني على حالي
من بعد كل ألجرالي .. بطران يسألني على حالي
ششتكي وشحـﭼـي يا خوي
اشتكي حال الرمادي .. أحـﭼـي ودموعي جمر
اشتكي أهلي ألباعهم نائب قذر
لو شيوخ ألحالهم لا يسر ولا يضر
لو دوائر مرياعهم بس ملتهيلي بالسفر
يا خويي .. حالي بالا نبار عايش عيشه مليانه قهر
ﭼنه بالبرزخ نعيش ﭼنه موته مو بشر
ناس جوعانة وتكابر والمرض يعصرهم عصر
ناس متهجره بمدارس والبرد همهم والمطر
اشتكي حال المواد لشحت وصارت رماد
اشتكي حال الخوات الدايخات باحوال اليتامى
ألما سأل عنهم نفر
اشتكي حال القصف .. التهجير .. اشتكي الما عدهم ضمير
المشتكى لله النواب ما بيهم مجير
اشتكي حال المدارس والعلم..والصفوف ورحلة ابني والقلم
القلم مذبوح .. مذبوح القلم
اشتكي حال الشوارع والبيوت مفلشه وكل الجوامع
هذا حال الناس وأحوال البشر
بالرمادي ..بالرمادي الليل ليل بلا كمر
والنهار دموع تتـﮔوطر ﮔطر
لاحياه بهل مدينة ﭼنه موته بلاﮔبر
سنين اركض حتى ابني بيت حتى احمي بي جهالي
تالي ما تالي تفلش بالقصف كومة حجر
***

ما مبري الذمة ومشكول
ما مبري ألذمه ومشكول
كل من باع الـﮔاع الطيبه ودگ طبول
للجونه محملين أسلاح بفد أسطول
ودنس أيده بأيد الغول
وصفـگ حيل بس كون أيصير المسئول
ما مبري الذمة ومشكول
كل من عاف بلادة بحيرة وطـگ حجول
وطير بجناحين عقول
وشاف الدم بارضة يسيل .. يسيل سيول
وما حرك ساكن ضل عازل ضل معزول
ما مبري الذمه ومشكول
كل من سد الصوت الثائر شد حجولة وغلة غلول
كل عالم دين وفنان وكل مسئول
زيف أصله و فصله وبالتاريخ أيصول أيجول
كل همه بكرسيه يبات و حكمه أيطول
ما مبري ألذمه ومشكول
كل من جاي من المجهول وراد عراقي يضل مذلول
كل من متجند باحقادة وفجر نفسه
بطفل بدرسه وشاب بعرسه
ومستشفى وجامع مشغول
وراد الفتنه من الزيرو تصعد للفول
ما مبري ألذمه ومشكول
كل من باگ وكل من زور
كا من سلب كل من هجر
كل من بالمنصب يتكور
كل من بالإعلام استهتر
كل من بالكرسي يتعنتر
كل من للدولار أتمختر
كل من ما قاوم وتحضر
و للديان شراح أيـﮔول
ما مبري الذمة ومشكول
***
هاي الحلوة العراقية

عرس وفرحة ولمه وهوسه تستأهل بغداد ألبوسه
ليلتها ليلة عروسه لبسوها سوار وترﭼيه
هاي الحلوة العراقية متحزمة بوردة وﭼفيه
محروسة أرضـچ محروسة هلهوله نهلهل سويه
يا بغدادي وبغداديه يلا نلعب له ﭼوبيه
يا مصلاوي و مصلاويه مزهيه جبالـچ مزهيه
يا أنباري و أنباريه يا ريح دلالـچ زكيه
يا بصراوي و بصراويه ملح الـﮔاع ونخله وميه
هاي الحلوة العراقية متحزمة بورده وﭼفيه
محروسة ارضـچ محروسة هلهوله نهلهل سويه
***
غربة وطن
يا غربة شبيـچ تاذيني وعلى العذال بعتيني
بـﮔلب حيران شفتيني لويتي الأيد حليني
أنا المحروم تدريني حسبتي بساع تشريني
الم حسرات قدمتي وتغديني
سهر وفراگ سويتي وتعشيني
بنهر أهات شديتي و شمرتيني
دحني اليوم شيليني
على بغداد وديني
صورها كحلتي لعيني
يا غربة شبيچ تاذيني وتعصرين بدمع عيني
يا غربة الراح ما يرجع شبابي وعمري وسنيني
يا غربة بلا وطن ضليت اهدي الروح وتلجميني
بصبر أيوب صبريني وعشـگ بغداد زيديني
عليها ليوم وديني بشوارعها أمر ساعات خليني
بعرس وأعياد زفيها د فرحيني أموت عليـچ يا بغداد تدريني
أريد وياچ خليني لحن أفراح سمعيني
عطشت هواي أسگيني ابد غيرك يا دجله ماي يرويني
افر الكون كله وما يكفيني ابد يا عراق غيرك ﮔـاع تحويني
***

يا عرب

يا عرب العدى ساروا علينه محملين سلاح
ولكم ﮔرب خبطوا الماي الفرات
بزوا بدجلة جرب
ما سلم منهم نخل فرهدوا حتى الرطب
بحجت الحرية جونه والنفط منا انهب
المضى تاريخ اهلي ن سلب
ها ولك نار على بغداد أنضرب
ها ولك سوونه حطب
قسمونه إشكال و نطونه طرف ل حبال
واحد شد واحد شال والثالث عـﮔد لحبال
صاح الرابع مدرب الخسران ما يلعب
يا عرب يا لناركم مو نار لا ولك شعلت كرب


***

آمي أنتي

حزني أنتي فرحي أنتي
أنتي اكبر من دمعتي
أنتي نبع الخير أنتي
آه لغياب وحسرتي
أنتي عيني وعمري أنتي
هسه والله بروحي صرتي
تنكسر كل فرحة من رحتي أنتي
شبقى بتالي العمر لمن رحلتي
هنا ﮔـعدتي بيوم عرسي هنا ضحكتي
هنا مشيتي هنا وﮔفتي
هنا دعيتي هواي يا يمه وركعتي
شـﮔد زرعتي وما حصدتي
شـﮔد فرحتي بيوم عرسي
شـﮔد حملتي هموم يا يمه و تعبتي
آه يا يمه بغربتي فاضت دموعي لوجنتي
ما ﮔدرت احضر دفنتـچ هي دفنتـچ لو دفنتي
تاهت وضاعت حسبتي
آه يايمه بعذاب العيد من مر بغربتي
تعودت يلتم شملنه
هذا خيي وذاك ابني وهاي خيتي هناك بنتي
وأنتي شمعة بنصنه ﭼنتي
الوطن راح ورحلتي
يمه يا يمه بغربتي حزني ومـﮔاطر دمعتي

***

رصاصات قلم
ابري بهل قلم ابري رصاص يطگ بعد تدري
اسري بليلي أضل اسري
لسلبوا مضجعي وفكري
اخلي الروح إلك تسري
يغالي واغلا من عمري
بعذابي الناس ما تدري
لغزاني يقلل بقدري
الوطن مجروح ياصبري
يعله ساكنة بصدري
هظيمة ترابك الحري
تدوسه أقزام ما تدري
بديني أفلاكي وبسري
بعلمي طبي وبجبري
خلطوا ليلي بفجري
بظلمه حوطوا بدري
من هو يشد إلي أزري
عراقي لمارضه بغدري
دجلة من الشمال اجري
فرات واحضنه بصدري
وأصير شط إلك بصري
وسام وجملا العمري


***
مشروع شهيد

لاويني لاويني شما تريد
أضل ذاك العراقي يا زمن وابقى حديد
هم سمعت بيوم الذهب زنجر والخشب صاير حديد
شـﮔد غشيم بسوط يجلدني يتصور الجلد بالميت يفيد
احنه من زمان علمنه الوكت كل بيت ي تباها بشهيد
بالفرح بالفرح الـﭼفن حورناه دشداشه للعيد
من الرضاعة أمي جتي وﮔمطتني
بالحقيقة لا ولك هي ﭼفنتني
حتى تجعلني شديد
حتى اتعلم شريد
وما يجف نهري يزيد
وانته جاي بكل وقاحة من بعيد
الوطن تسلبني تريد
أنا أمي للوطن عدتني شهيد

***
ديرة العمران

يا عمر القصيدة وقهوة الفنجان
شـﮔد بالك طويل وتحمل المره
يا صدق المشاعر للعشق عنوان
أطباعك تسامح ما تصد مره
يا رحلة ربابه بلعبة الإلحان
وسوالف عتابه وشعره وسحره
يا عمق البحر و إسراره والخلجان
كل غطه تعود إسرارك بفكره
يا بدر القمر وهلاله يا ريحان
يا منبت ورد يا زهرته وعطره
يا صهل الاصايل يا صولة الميدان
فرسانك اسود الواحد بعشره
يا قرع السيوف بلمه الفرسان
كل حوم يعرفه ألجيشك ونصره
يا صوت الهلاهل غنوة الفرحان
تغريد البلابل بس يهل فجره
يا فرح الحبايب يا لمة الإخوان
ومغازل محبة بليلة الـﮔمره
يا ارض السواد وديرة العمران
يا عراق الحضارة اسمك شكبره
يا راية توحد وحدتك تنهان
ما عاش ليذلها لراية العتره
يا الله اكبر بالوسط عنوان
يا اسود واحمر ونجمته ألخضره
يا ربي العظيم بحق شهر رمضان
كل واحد يمسها يسكن بقبره
يا ربي العراقي يعود للأوطان
يخلص من نفاق الجار والهجرة


***

الزائر الثقيل
جانه ويدعي خطار يخلصنه من النظام الجار
تبين ضاملي الثار مليانه جعبته أسرار
فرح من اسقط التذكار حسبنا زغار وكبار
رضينا بهل هوان ألصار فاروا والله لأخيار
صرخوا بالعدو من غار بس أعلن نيته استعمار
هلا بأهلي مارضوا بالعار خيي تحزم ب مـﮔوار
صرخ ها خوتي نهزم الأشرار خاين ﮔال العدو جبار
ما نـﮔدر عليه بحجار عدهم طائرات كبار
مدجج بالسلاح الضار وبالحرب همه أهل ألكار
هزه بالعصا المختار وصاح بصوته المغوار
المسلم للشهادة صار يا عايج ويا غدار
مو بالماي الذهب يتعدل بنار سمعت بمستعمر جاي خطار
من دار الوكت وندار شوفوهم الجرى والصار
بموصل وبصره والانبار بسياسه صارت الأعذار
وصلتهم غلط معلومات لستخبار

***
البلبل الأسير
بلبل غرد بلبل صاح بصوت الهم مابي أفراح
بلبل مقتول بنص عشه بلبل طار بتك جناح
واحد رف رف راد ايوكر طخه الغادر بس مانلاح
رادوا صيادة يصيدونه وبالضلمه يغمضون عيونه
فزت بلبلته المفتونه فريخه صاح
أيد امتدت .. لاحت .. لا ما لاحت .. راح
نكسرت أيد إلي لزمته
من عشه وأمه أخذته
بشـﮔد أسوار حاوطته
من كل فرحه جردته
وخلته مكسور جناح
***
أهل الانبار
يا ديره هلي وناسها الإبرار
يا بلسم ع الجرح للتعبان والمسكين
يا انخوه عربيه وجود واحورار
يا أهل المضايف والكرم والدين
يالمة زلمها ع الوكت لو دار
مدرسة الجهاد ع الكفر قاسين
يا درع الحمية بصولة الكفار
يا سيف لمجرب كل وكت كل حين
يا أهل المبادئ من توج النار
كلمتهم علم ما تصير اثنين
آآ .. خنجر غدر بالظهر من صار
برﭼاب الاصايل صالوا الخيرين
آآ.. أهل الانبار من ثاروا غبار
خلوها ع التحالف ألحظة بسنين
ليهمكم يا خوتي شسوه لستعمار
مادمتم كواكب يا جهاديين
يضل كل نذل كل خاين وغدار
متوشم بعاره وهم رأسه بالطين
***

العلوج

رج رجيج الجاي جيه وجاب جنجاله
الجوج والماجوج عوج وعجلوا فاله

عج عجيج علوج بنوج حجاله
لبوج ابن البوج رش عجوج ﭼتاله
روج يرج بروج روجت دمه من ساله
بلا جلد مجلود من جاله
جال بالجولان جول جن حاله
رجرجت رجات ﭼيل ﭼياله

جمده جمود مجمود بالـﭼيلات ﭼتاله
متوجات النوج بالياجوج بافعاله
انفلج مفلوج بالفلوج بس جاله
محملات النوج بعلوج معالجات علوج عجاله
***

يا ديار الشام
يا ديار الشام بس أنتي لوفيتي
مشكوره والله هواي ماقصريتي
بالرغم من كل الظروف النا حتويتي
لا جرحتي ولا شكيتي ولا شتكيتي
من حنانـچ شـﮔد غرفتي النا ورويتي
يا بلد كل العروبة أنتي أهلي وأنتي بيتي
يحرسـچ الله بحنانه وتعتلين شما عليتي
أنتي ضل نخوة عربنه وبالاخوه تمسكيتي
بدلالـچ الطيبة الزكية الكرم قدمتي وسـﮔيتي
من مصيبتنا هواي شفناچ انهضمتي وهم بـﭼيتي
ما نسيتي بكل صلاة الأيد شمرتي ودعيتي
مشكورة والله الشام ما قصريتي
***
مزنت صيف
دموع الـﮔاع سالت بذاك الصيف
وفترت علينه بليله محتضرة
وسواجي الفرات تلاشت بهمها
لأن دم لملاها اعترضت الشجرة
ولايتنا بجت من ذاك لولاها بزود
الحوط عشبها بحنظله ومره
الدراج هاجر كل العشوش بليل
وهو ألما ترف جنحانه بالـﮔمره
السنبل زعل لان داست عليه فد ناس
ما تعرف حصاده بيومه لو شهره
مر نيسان شايب منزوع منه الطيب
ولاجنه شهر مشهور بالخضرة
حطب كل الورد والعوز باين بيه
من ﮔد العطش منحني ظهره
وعكس كل الزمان يمر شهر كانون
يجلد بالبرد بظهور هالفقره
متوسم أهلنه يمر عليهم شوگ
وتعين الكريم ألذلته ألهجره
وإذا بعض البشر تريد متزيد
عايل تحسبك وتطمك بحفره
شجاها الناس من عانت الغربان
ما تعرف أضنها ولا ابد تقره
خلونه وطن ما عنده ذرعان
تتلاوه ويالوكت لورايد يزغره
ترضى بهل شعب مقسوم نصين
بولاية أهلنه النهر ما نعبره
كل واحد سعر بي ينشرا وينباع
يالسعرك نفط مفهومه هل فكره
من جتنه الحكومة ﮔلنه جانه الخير
شو لعبت بالأمن كتبه لوطره
حكمتنا السياسة لفرقت لبيوت
وتفخخ أملنا بمهده وتفجره
مل منا الصبر والاه بسكوت
إذا تحمل الم بروحك تعصره
خلو هالشباب تصيح بالموت
وأدور وطن وتفكر بهجره
بس كل من حكم هذا العراق بضيم
تاريخه اغبر ونحفر ﮔبره
***

تبا لهم

تبـت يـدى ابـي لهــب .. و تـب كـل مـن نـهــب
ومجلس باسم الشـعب .. نطونا فـصم اكلـوا رطـب
ما نفـع ويـاهم عتـب .. لا شـيعي لا سـني النسـب
جالس على متون الذهب .. ﮔضوها بجروحك لعب
للنـار ســوونا حطـب .. شـنو انـته طالبنه طـلب
مو ماي من دجـله شـرب .. لـفـرات مـا غـزر عجـب
لا انتـه يا شــط العرب .. ليا ديـن انتـه ويا نـسـب

***
يا ايها العرب ُ
ما بالكم افيقوا ايها العرَّب ُ..
صوب التشظي تحبوا وتقَترِبُ
تب لأفكار زارت عُقولَكِمُ ..
من اجل دينار ودولار تحتَرِبُ
هذا يحد السيف في عنق صاحبه..
وذاك لأجل الجاه يختَطِبُ
ومن الطفولة ازهار قد احتَطَب ُ..
ما بالكم يا ايها الناس يا عرَبُ
قمنا نسب انفسنا من بهتاننا ..
من بعد ان كنا نفخر بذا النَسَبُ
من اجل اهداف وغايات قد ذهبوا ..
دعاة الدين بالتحريض والخُطَبُ
ان النخيل اذا ما قلمت ارذلها ..
حتما ستعطي من اثمارها الرُطَبُ
لأنها في الاصل طَيِبَةٍُ ..
لا جمر لنار الجذع والكَرَبُ
شاعوا باسم الحرية شذاذ لنا ..
كما لو التحرير بالتزوير والصَخبُ

***
منولوج

لما يشتري يتفرج .. بسم الاسلام اتوج
من جان مثل الدعلج .. فعله القبيح تروج
ﮔظيت كل سنيني .. بوطن واحد يا عيني
ليش انته متخليني .. دومك تضل تتحجج
الاسلام ديني ودينك ..ﮔول الشهادة وينك
ماكو فرق سأبينك .. ناس بفعلها الاهوج
بالوطن انه وانته .. ابشيعته وبسنته
سكته للحاقد سكته .. خلي يضل يدحرج
يالكردي خلي ابالك .. بحق السهل وجبالك
الوطن مالي ومالك .. هور وجبل يتزوج
***
شتاﮔيت
شتاﮔيت إلك يا وطن و الشوگ هد حيلي
بـس انتـه بيـك الجرح ما طاب يا ويلي
يسـألني حاقد مـوعـرف و بزود انا أرد
لعـراق هـذا يــا لأخـو ولله آسـبح وِرِد
وتـأمـل زيارتـه فـد يــوم وأزرع ورد
من مـر عليـك الدهر بالـجور والبـهدلـة
ما ضـل مضيـف ألك مﭽـفيه بيه الـدلة
والـزيج بعد السـتـر هـم الوكت هـدلـة
أتـأمـلك تـسـتتـقـر فــد يــوم بيـــك وارد
***
أنا عراقي

منين انته إنا .. عراقي
أتباهى بأصلي .. الراقي
أصرخ من كل ..أعماقي
يـرد ربـي .. استحقاقي
اكتب في كل .. أوراقي
شـعر ونـثـر .. وأشواقي
بـلادي بـيـن .. إحـداقي
عـراقي راقي .. بأخـلاقي
من رأسي لحد .. الساقي
معدن أصـلي .. بـراقـي
ﺷﮕد ما دور .. متلاقي
مثل عراقي ..لا ما باقي

***
هنا يا من ﭽـنه وﭽـنت

هنا يا من ﭽنه وﭽنت بغداد صارت طوبه
.. واحد حكمها بلا عقل والثاني همه جيوبه
النواب ما بيهم أصل لا مرجله ولا حوبه
.. جاييك أهل المرجلة ويمحون كل عيوبك
هنا يا من ﭽنه وﭽنت يا عراق سكر بابك ..

احنه نحبك يا بلد وبس احنه والله أحبابك
هذا نذبح ذاك نخطف وتهجرت شبابك
.. واﮔـف يتاني هل شعب للباگ عد حسابك
هنا يا من ﭽنه وﭽنت بغداد صارت لعبة
.. يحكمها واحد ما عرف ش يريد منه شعبه
جابته ناس مدربة من كتلته ومن حزبه
.. كل يوم جاييك بفلم يدعون همه أصحابك
هنا يا من ﭽنه وﭽنت الأحزاب صارت كشخة
.. كل خمسة جاييك بحزب لو كتلة بس للنفخة
بس ﮔوم يا شعب الذرى وكفخهم بفد كفخة
.. هذا نسجن ذاك نخطف شــﮕـد ماتوا من أصحابك
هنا يا من ﭽنه وﭽنت جاييك بالمكناسه
.. نكنس كنس كل من سرق نواب ولا ساسه
ليعرف عرف آلما عرف خل يقره هل قرطاسه
.. تسافر ابد ما ينفعك لابد نجيب خياسك
هنا يامن ﭽنه وﭽنت لشيوخ ﭽـانوا هيبه ..
هسه يجيك من الطرف أتباعه بس من جيبه
ويريد منك بس اله ولشيخه بس للهيبه
.. خلي السياسة مو الك راعي هلك وأصحابك
هنا يامن ﭽنه وﭽنت ما واحد يعرف دربة ..
يــﮕـعد على متون الستر ي شكي همومه لربة
بلكي يجي الراتب و لك راح ابتعد للغربة
.. بلا خجل باﮔة الوزير وحوله لأبوك لابو الجابك
هنا يامن ﭽنه وﭽنت بغداد ﭽانت كشخة
.. ياهو اليجيها تثقفة و تعلمه وتنفخة
من بعد كل ذاك العلم اليوم صارت وسخة
.. يا لبرلمان أرد أسألك للحاضر و غيابك

***

تبت يدى

تبـت يـدى ابـي لهــب .. و تـب كـل مـن نـهــب
ومجلس باسم الشـعب .. نطونا فـصم اكلـوا رطـب
ما نفـع ويـاهم عتـب .. لا شـيعي لا سـني النسـب
جالس على متون الذهب .. ﮔضوها بجروحك لعب

للنـار ســوونا حطـب .. شـنو انـته طالبنه طـلب
مو ماي من دجـله شـرب .. لـفـرات مـا غـزر عجـب
لا انتـه يا شــط العرب .. ليا ديـن انتـه ويا نـسـب
***

#عماد_ياسين_آل_شهزي_الطائي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات