السياسيون وشكوى الفقراء8

حيدر حسين سويري

الحوار المتمدن-العدد: 5205 - 2016 / 6 / 26 - 04:51
المحور: مواضيع وابحاث سياسية
    

السياسيون وشكوى الفقراء 8
حيدر حسين سويري

شهر رمضان وجلساتهِ القريبة من السحور، في الحدائق مع الهواء الطلق، لهُ حديثهُ الخاص، من الذكريات الجميلة، والذكر الأجمل، والتدبر بأمر الخلق، من مجرات الكون إلى البعوضة، ويدور الحديث... حتى يصل إلى نقد الظواهر الإجتماعية التي تضر بالإنسان، والتي هي من عمل يديه، لا سيما ظاهرة الرشوة والمحسوبية(الوساطات)؛ يَحدثُ و يَبثُ أحدهم شكواه، مستغلاً جلوس صحفي، عله يوصل صوته لأحد المسؤليين الشرفاء، فيحل قضيتهِ، بعد أن عجز عنها، بالرغم من سلوكهِ الطرق القانونية:
- رحمه الوالديك أبو حبيب، ما تكتب على موضوعي، بلكي الله ويقرأ مقالك مسؤول شريف ويلكَانا حل
- تفضل ابو سيف شعندك؟
- خويه أني العام طلعت على التقاعد بالضبط الشهر السادس 2015، من الشركة العامة للأسواق المركزية/وزارة التجارة، ووفق قانون هذي الشركة لازم يصرفونه مكافئة 12 راتب شهري، واحنا مجموعة كملنا أوراقنا ومعاملاتنا، وهم همين كملوا كُل شئ يخص المكافئة
- لعد وين المشكلة؟
- المشكلة: كَمنا نراجع على الاستلام، يكون جوابهم: ما عدنا فلوس! بس اني أشوف بعيني جماعة الواسطات كَاعد يستلمون! لعد شلون يكَولون ماكو فلوس؟!
هنا تدخل الحاضرون ليُبدوا رأيهم في حل المشكلة:
الأول:
- إي عادي(ابو سيف) حالك حال العبرية إدفع
- أفا عليك تريدني أنطي رشوة؟
- لعد شسوي اذا هي دنيانا ماشية هيج؟
- مو احنا صيام ونخاف الله؟
- احنا انخاف الله وهمه ميخافون، شنسوي؟
الثاني:
- زين إشتكي؟
- عدمن أشتكي؟!
- عند مفتش الدائرة
- مو كلتلكُم عذرهم: ما عدهم فلوس! بعدين هو المفتش ما يدري؟ هو هم ما بيده شئ
- ﭽـا يمن تشتكي؟
- المشتكى لله
الثالث:
- إخذلك إثنين ثلاثة شباب معدلين وروح هددهم
- أنا أخوك شلون ترضاها؟
- إذا همه مو خوش أوادم؟ ﭽـا شتسوي؟
- إذا هم مو خوش أوادم تريدني أصير مثلهم؟ لا عمي أني رجال خلصت عمري أخدم بالدولة هالنوب بعد ما كبرت أخرب الدولة وأطلع على القانون؟ لا والله ما أسويها
الرابع:
- إنتظر وطول خلكَ وبلكي تجي فلوس
- أكله أكو فلوس يكَلي بلكي تجي؟! هذا شلون حـﭽـي؟!
- أني وياك، تجيهم فلوس قليلة فينطوها لأهل الواسطات، فأنت إنتظر من يخلصون وإستلم
- لا هاي هيه! هي دولتك كل ساعة قرار انوب يلغوها تحت راية التقشف، وكل شئ ما نقبض
- ههههههههه هم صدكَ
أبو سيف:
- خوية ابو حبيب أنت أنشر والله أرحم الراحمين
- إن شاء الله، أني أدزها للمواقع وللصحف والله كريم
بقي شئ...
نعم إن الحالة التي نقلتها واقعية وخاصة، ولكنها عامة أيضاً، فكثير من المراجعين يعانون من عرقلة معاملاتهم، ولا سيما ما يتصل منها بالمال.

#حيدر_حسين_سويري (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات