( هيهات المذلة ) / قصيدة شعبية ألقيت في تظاهرة يوم الجمعة 26 شباط 2016 بابل / ساحة الحرية

بواسطة / حامد كعيد الجبوري

الحوار المتمدن-العدد: 5088 - 2016 / 2 / 28 - 23:12
المحور: الادب والفن
    

ألقيت في تظاهرة يوم الجمعة 26 شباط 2016 بابل / ساحة الحرية
حامد كعيد الجبوري
ما خايف أمس شتظن أخاف اليوم
أكو براسي أماني ولازم أوصلها
تهديدك جُبن ميهز شَعَر زعطوط
وتهديد الجبان العقل يهملها
شجاك وترتعش وتخاف من جلمات
جلمات الشرف تيجان زلزلها
أكو بعض القصايد دوخت سلطان
وتهاوت عروش وخلد كايلها
مثل أم وبراءة ودجله أم الخير
وخَـيّال الشعر يسرج أصايلها
حسبالك أخاف وأختل بسرداب
وأركعلك خشوع وروحي أبذلها
المراجل للزلم والشاهد التاريخ
أسماء بذهب مخطوطه سجلها
قاسم والشهادة تلوك للثوار
سلام وللوطن عيناه كحّلها
قطار الموت بعده أيسج قطار الموت
وسجن الحله نور النفق شع ألها
مو جيفاره واحد جم بطل صنديد
وأحبال المشانق روح سايلها
هيهات المذلة وهذا صوت حسين
رّج الدنيه دمه وشمسه نندلها
هيهاتك دجَل وأتكشف المستور
هيهات المذله الشعب كملها
أبكل جمعه هنا تتوافد الأحرار
ونتظاهر سلم دستور يكفلها
أبكل جمعه هنا نفضح سياسي الزور
ونكشف للحقيقة ابذلته أنذلها
أبكل جمعه هنا ويطالب الجمهور
ابقصيدة للوطن هيهات أخذلها
***
كافر وصّفتني ونعم كافر بيك
مو كافر بربي وهاي تجهلها
لا بعت الوطن لا خنت طيب الناس
وهاي أفضل عباده الله يقبلها
شنو فضلك عليه وشلت خشمك فوك
طيحت الصنم ؟ مو أنت محتلها
وأستورثت ملكه وما خزن صدام
قصوره وسلطنه آخرها وأولها
نعم طاح الصنم بس الظلم ما طاح
وفوك الظلم بوك أمريكي سهلها
لا قاصه بقت صار الوطن فرهود
حرام أعله الشعب ولحزبه حلّلها
أفنديه وعمايم والجباه السود
حيّ أعله النهب وبجيبه ختّلها
أخشوشن يا شعب ليميعك الجكليت
وبطنك بالنساتل لا تنستلها
أخشوشن يا شعب شتفيدك النفطات
وجيوب السياسي البوك ماملها
أتلَّطعش عام أنهبتوا مليارات
وببنوك الغرب مو يمنه نزلها
وأبطال الحشد طلكوها للذات
من أجل الوطن إرهاب قاتلها
شيصير السياسي وبيه نزيد اللوم
شيقدم بعد للناس دللها
من أجل الشعب يتعاقد أبصفقات
وقاصاته أنملت دولار طب ألها
مخططكم وضح مرات بالإصلاح
وتكنوقراط مره وجر مهازلها
وتوجيه المراجع دسته بالرجلين
السوالك كراسي الشوفتك ملها
عرب دنبوس أقسم مو عرب ناموس
الصنعوكم أوادم خير رد ألها
تهددني أبوعيد وآنه عاشك موت
الشهاده أتزوكت حلت جدايلها
الحكم بسم الشعب نجبركم أترحلون
من يغضب شعب تيجان يزبلها

#بواسطة_/_حامد_كعيد_الجبوري (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات