السعوديه وسياسة عدو عدوي صديقي

جان نصار

الحوار المتمدن-العدد: 5080 - 2016 / 2 / 20 - 15:05
المحور: كتابات ساخرة
    

معليش عزيزي القارئ بالمده الاخيره بكتب عن السعوديه كتير ,شو بدي اسوي يا عالم. صارت اخبار السعوديه تحتل الحيز الاكبر من اهتماماتنا ومنلاقيها بالليل وبالنهار وعلى الفطور والغدا والعشا.
فش دوله بمنطقتنا الا واصابع وبعبصات السعودين بطبلغص فيها.لاء والاحلى لما بتقولك السعوديه بدناش حد يتدخل بسياساتنا الداخليه وهدا خط احمر ولهون بس.اما احنا كسعودين سبحان الله منساعد الدول العربيه الشقيقه والاسلاميه بشويه تدخلات تتطلع من راس ابوهم لوجه الكريم.
انا كمواطن غلبان بتسائل شو هي نوعية التدخلات السعوديه على سياسات البلدان الشقيقه وهل هي مجرد مساعدات لوجه الله او مساعدات مشروطه مع حبة املاءات ويا ترى هالمساعدات منصفه وعادله ولا منحازه وفيها خيار وبندوره.
تناقلت وسائل الاعلام الاسرائيليه صورة مصافحة وزير الدفاع الاسرائيلي بوغي يعالون وهو يصافح بحراره وبالاحضان الامير تركي الفيصل مدير عام المخابرات السعودي السابق بمؤتمر ميونيخ.
الاسرائلين ما ستروا على المسؤول السعودي بقولولك انو هاد مش اول ولا اخر لقاء فالامير تركي اجتمع قبل مده مع مدير عام وزارة الداخليه الاسرائليه وكمان اجتمع في نيويورك مع زعيم يش عتيد يوجد مستقبل يئير لبيد واجتمع مع عضو الكنيست تسبيبي ليفني وهاي مرا وحسابها جاي بعدين, وكان بكل هاي الاجتمعات في مصافحات وتفاهمات واتفاقيات ومبادرات وصفقات وتطمينات وترتيبات وتسويات وعلاقات وهات اللي بدك هات.
طبعا منساش لقاءات برضو المسؤول السعودي السابق العقيد والا اللوء او العميد شو بعرفني انور عشيقي بالاسرائلين.
هاي مقابلات عرفنا عنها اما اللي تحت الطاوله والسريه هاي احنا كشعوب ومواطنين شو دخلنا فيها.
يمكن البعض يستهبل ويقولك هدول مسؤولين سابقين وما الهم دخل بالسياسي الحاليه.الحكي مزبوط ظاهريا بس باطنيا هاي تفاهمات سعوديه اسرائيليه على عينك يا تاجر,لانو العدو اليوم مشترك هو ايران والشيعه وحزب الله . خطر هدول مسح وشطب كل مزاودات وعنتريات وشعارات استرجاع فلسطين . لانها بيناتنا قضيه ثانويه مش قضية العرب الاولى وبنحكاش فيها ,, الها وقتها ولكل حاديث حديث..
الخطر المجوسي الفارسي الشيعي الصفوي الرافضي هو الاهم .زي ما احنا عارفين في المهم والاهم وفلسطين بالقلب واكيد مش ناسينها ولو انها اليوم في مرحلة التجميد.
اذا الامير الفيصل ما الو صفه رسميه ولا وظيفه لانو مسؤول سابق يا ترى وجوده في مؤتمر كتير مهم بميونخ كان بالصدفه.. شو الاخ راح يتصيد سمك والا مؤتمر شوبنغ وتسوق او يمكن اتفركشت اجرو للامير الفيصل بالرياض وما لاقى حالو الا وهو بميونخ .
كل شي بصير,مهومؤتمرميونخ حفلة كوكتيل بيجي عليه من هب ودب .
يا جماعه السعوديه اصلا مش ساتره علاقاتها مع اسرائيل وبتقول انو الضروريات تبيح المحذورات.مش غلط يصير في تعاون وتبادل معلومات طالما انو العدو هو الشيطان الاكبر ايران.
بلاش حد يفكر اني بفرق بين السعوديه وايران لانهم فوله وانقسمت نصين او بجمله حماسيه اكثر وملتزمه هما وجهان لعملة واحده .قسم قسم يا خوي يا حضرة الكاتب هات من هالمخزون اللغوي الانشائي.
شخصيا انا مش ضد التطبيع والترقيع والتفقيع والتطقيع والتمويع والترويع والتسريع والتمزيع,, لهيك خلص بلاش سياسة الانفصام بالشخصيه من جهه بنلعن ونشتم ونهدد بالكيان الصهيوني ومن جهه تاني بالاحضان بالاحضان يا حبيبنا بالاحضان.
الشيخ سعود الشريم امام وخطيب المسجد الحرام
الشيخ خالد الغامدي كمان امام وخطيب المسجد الحرام
هدول التنين كل يوم جمعه بالمسرحيه عفوا بالخطبه ببلشوا بالدعاوي والبكاء والنحيب وما ناقص الا اللطم على المؤمرات اللي تحاك على الامه الاسلاميه .
لهون الكلام حلو كتير بس سؤال بسيط: السعوديه ما بتحيك مؤمرات وتدخلات على الامه الاسلاميه والعربيه .
عاصفة الحزم والحرب في اليمن هل هو دفاع عن الامه الاسلاميه شو اليمنين صاروا صليبين واحنا مش عارفين.
التدخل بالحرب في سوريا هو دفاع عن الامه الاسلاميه ولا صراع بين الامه الاسلاميه السنيه والشيعيه.
اليوم وقفت السعوديه مساعداتها الماليه للجيش اللبناني على اي اساس نكايه بحزب الله الشيعي. مش معقول بس اليوم صحيو, حزب الله موجود من 20 سنه واذا مشان تدخله بسوريا كمان صارلوا 5 سنين مش من امبارح .ثم المساعدات للجيش اللبناني يعني مشان المحافظه على امن وسلامة لبنان وكل مواطنيه مش المحافظه على سلامة شيعة لبنان بس.
لما ينوح ويجوح امام وخطيب المسجد الحرام على المؤمرات على الامه الاسلاميه يا ترى داعش همي من الامه الاسلاميه السنيه والا همي خطئ مطبعي سقط سهوا ومين بمثلوا يا ترى...
بالزمان كنا نقول انو الثوره تحصد وتأكل ابنائها يا ترى هادا بنطبق ايضا على ان الامه الاسلاميه تأكل وتحصد شعوبها من خلال الكراهيه المذهبيه وصولا الى اقصاء الاخر المختلف.من خلال حروبهم المذهبيه والطائفيه الامه الاسلاميه بتتأمر ايضا على حالها بدهمش واحد يصفقلهم مشان يرقصوا.الجماعه برقصوا بكل المناسبات.
السعوديه بتمر بازمه ماليه هادا الحكي صار معروف نتيجة انخفاض مداخيل النفط بغبائهم ونتيجة الحروب وفتح اكثر من جبهه ودعم للارهاب في عالمنا العربي سوريا واليمن مثال.
السؤال المطروح اليوم توقفت مساعدات للجيش اللبناني.
هل راح تتوقف المساعدات للجيش المصري لانه رافض المشاركه في الحرب على الاراضي السوريه بادعاء محاربة داعش ومن مره بالطريق محاربة النظام هيك هيك صروا واصلين.
هل راح تتوقف المساعدات عن حماس لانهم بالامس كانوا في محادثات مع الايرانين.
يا ترى هلئ كل خازوق كانوا مسكرينوا ويمولوه السعودين, بديلوه راح يكون تمويل ودعم ايراني.
يا جماعه طنيب على الله انصحوني مين اشجع مشان الدعم ايران والا السعوديه بدي اكون بالسليم .انتو عارفيني كاتب انبطاحي زئبقي وشعاري الغايه تبرر الوسيله .اذا دول بحالها ذات سياده مهتمي بمصالحها وبتقولك اللي ماخد امي بقولو عمي انا يا هالمش مهم لازم اكون عندي مبداء واستقلال سيادي,والله مرحبا.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات