رساله محتاره

عادل عياد

الحوار المتمدن-العدد: 5032 - 2016 / 1 / 2 - 07:41
المحور: الادب والفن
    

وسط جزيره مهجوره
أنا بس سكانها
وأفراحها وأحزانها
وحواديتها كمان أنا اللي بصنعها
مرتاح وبالي مرتاح
كل حاجه هنا أصدقائي
كل حاجه هنا أنا اللي بعيشها
الشجر والبحر
السما بكل تفاصيلها
الرمله لما تحضني أوي وانا نايم
حتى الطيور المهاجره وانا هايم
وبرغم كل ده ..
جوايا لساه حزين
وقلبي دايماً بيبات محروم حنين
السنين بتمر زق
والوحده زهقت مني
ولأي تجمع حتى لو في الخيال
الوحده بترق
شق الملل قلب الجزيره
طق الشجر من القعده الرزينه
وروحي نفسها تهرب مني
ولأي باب بعيد تدق

إزازة خمر من آلاف السنين
من آلاف الأزايز اللي رافضه إني أسكر
مهما شربت منها في كل الليالي
قلم ودفتر قديم ضايعين من زمان
ضاعوا زمان من الزمان وانا لقيتهم
فرشت قدام البحر وقعدت
كالعاده من يوم الدهر ما ابتدى
أكتب ذكرياتي اللي تعبت من كتر العرض
طبعاً عشان مفيش عروض جديده
أكتب عن ذكرياتي المميته
واللي كان ساكن جوايا وهرب
وفضلت أشرب
أشرب
أشرب
والورق والقلم مستنيين
خلصت الإزازه وزيها إزازتين
وساعتها غيرت اتجاهي ناحية الألم
والقلم مشي عكس اللي كان عايز يترص في الورق
قلت لنفسي أنا هعمل زي زمان
وابعت رساله في الإزازه
فياخدها البحر بعيد
يرميها في حضن غريب
ويمكن لما يقرا يتأثر
فييجي ينتشلني من هنا

برغم إني أنا اللي بنيت الحواجز
برغم إني أنا اللي هربت من البراويز
وعشت هنا لوحدي
وحدي تماماً
وضعت وخسرت الجميع
أو هما خسروني
ولا فيش طريق مشيته وانتهى بالفوز
برغم كل الظروف السيئه والهم الرهيب
كتير بكون مبسوط وانا بعيد
وكتير هدومي بتزهق مني وتمل
فبغيرها عشان افضل مبسوط

مسكت الورقه وكتبت رساله محتاره
لكني للأسف مكنتش عارف
أنا عايزها توصل
وللا عايزها تفضل بس ساكنه جوايا
...
لغتك ممكن متكونش لغتي
بس حاول تفهمني
أنا العايش ومش موجود
أنا اللي فردت البحر قدامي
وملمتوش تاني
أنا اللي في جزيره اتنفيت
طوعاً وبمزاجي أستنيت
فيتلحقني
يا إما هغوص أكتر في الموت
ويمكن بعد سنين تكتشف
إني في عمق الجزيره اترميت
ادفنت ..
اتحللت ..
واتحولت لسماد طرح شجره
في يوم هتضلل عليك

كسرت الإزازه
وقطعت الرساله كالعاده

استخبيت وسط الهموم
وقلت انا شكلي باسكر أوي
بس الإزازه كانت رافضه تتهز

السؤال هنا ..
هو أنا اتولدت هنا ؟
وللا هنا اتولد فيا ؟!

#عادل_عياد (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات