صفوت فوزى
الحوار المتمدن-العدد: 4974 - 2015 / 11 / 3 - 02:20
المحور:
الادب والفن
يا كلمة محنية
جارية ف بلاط القهر
قومى إصلبى طولك
واتطهرى بالنهر
بقلوبنا هانقولك
نغزل سوا توبك
ونسن فى حروفك
ينهار جدار الصخر
وترجعى شابة
مليانة خضرة وضى
عفية متعاجبة
كما ألف مهر ومهر
●-;- ●-;- ●-;-
يا كلمة متعمدة
بالنار ومن دمى
بأصلى صبح ومسا
ليكى انتى يا أمى
وأغسل ايديكى يا طاهرة
بالحبر وبدمى
عساكى يوم تنطقى
أشواقنا وتضمى
●-;- ●-;- ●-;-
يا كلمتى قومى
قومى إلبسى هدومى
وبإسمى نادينى
يا عزوتى ودينى
يخضر لون توبى
تزهر رياحينى
أنشد مواويل الفرح
والخضرة تطلع ف جبينى
●-;- ●-;- ●-;-
يا كلمة ما تموتشى
حتى فى عز الموت
قومى وصحينا
نصرخ بأعلى صوت
يموت زمان الخرس
يخرج من التابوت
ملايين خلايق بشر
بيبدروا حروفك
ويغزلوا صوفك
ويبدلوا خوفك
ببكرة ما بيموت
إسمه على إسمك
وملامحه من رسمك
حبلان كما خيرك
طاير مع طيرك
عالى كما نخلك
طارح غيطان وبيوت
----------------
#صفوت_فوزى (هاشتاغ)
كيف تدعم-ين الحوار المتمدن واليسار والعلمانية
على الانترنت؟