جوزيف حنا
الحوار المتمدن-العدد: 4944 - 2015 / 10 / 3 - 12:30
المحور:
الادب والفن
وداع (باللهجة اللبنانية)
سنين عمتركض ورا سنين..
ومن العمر ما بقي إلا كمشة حب وحنين
سنين عمتركض وأنا مثل كل الخايفين..
خايف روح.. واللي تاركهم يتعودوا الغياب
ترجيت الزمن تيخفف من سرعتو..
تمنيت لو بسافر.. ويطول غيبتو..
أو حتى يموت وإحضر جنازتو..ورتبتو
قلتللو..وينك رايح
عليك مش رح كتر المدايح..
بس لازم تعرف إنو العمر صار ورا الباب
وقبل ما تحت التراب إندفن ويتسكر عليِّ
مية باب وباب..
شوية وقت اعطيني لأنو عيوني
ما شبعت من أغلى الأحباب.
ما تفكر أنا وحدي خايف ..
المتلي كتار بيخافو بكير يفلو
ويصيروا كأنو ما كانو ولا صار.
خلليني قبل ما موت وروحي تعانق العباب
إكتب آخر قصيدة لأبني تخبرو قديش
بحبو..
إنو نحنا مش بس بي وإبن..
إنو نحنا مش بس حباب..
بدي خبرو إنو نحنا كنا أكتر من إخوة
وأبعد من اصحاب..
شوية وقت عطيني..
أو من هالروحة عفيني..
خللي عيوني بروحي تطبع صورتو
خلليني إشبع من ريحتو.. وبعدها محل ما بدك
خدني.. وسكر عليّ كل البواب
#جوزيف_حنا (هاشتاغ)
كيف تدعم-ين الحوار المتمدن واليسار والعلمانية
على الانترنت؟