السرقه ثلاثية الابعاد

جان نصار

الحوار المتمدن-العدد: 4785 - 2015 / 4 / 23 - 18:52
المحور: كتابات ساخرة
    

انا مش عارف ليش عم بكتب موضوع عن السرقه ويمكن البعض يقول شو اخونا الكاتب راح يجيب جديد او ليش بكتب عن السرقه ثلاثية الابعاد.
من منطلق اهتمامي بالعلم والتطور ومن منطلق عدم فهمي لمصتلح ثلاثي الابعاد فقلت في نفسي هيك العنوان بكون جذاب من باب الفشخره والفذلكه لاني بالاصل مش متعلم ومن جهه تاني بعطي انطباع جيد للقارئ يمكن تدفع البعض لقرأة المقال يعني بالمختصر ترويج ودعايه جذب للمستهلك اللي هو القارئ للاطلاع وتصفح المقال.
ثلاثية الابعاد تعني النظر او عرض الاشياء من 3 زوايا اللي هم الطول والعرض والارتفاع يعني العمق وهيك صار مفهم جديد من خلال علم الرياضات والهندسه (اللي ما الي دخل فيهم من قريب او من بعيد) للاستعمال او المشاهده وصار في افلام وسينما وتلفزيون وكتير اشياء تستغل في هذا الاتجاه ولهيك انا كمان شايف ان السرقه الها ثلاثة ابعاد وبدي اتفذلك بزياده واتفلسف وبقول انها رباعية الابعاد لاني اخذت معي وانا طالع اكتب هالمقال البعد الرابع اللي هو الزمن.
في قصة البؤساء لفيكتور هيغو العم جان فلجان اللي سموه على اسمي مش انا تسميت على اسمه حكم عليه بالسجن لمدة 30 عام لانه سرق رغيف خبز بس وكان جوعان وما معو حق رغيف خبز ومن هون اجى المثل عنا اللي فيه الواحد بقول :يا زلمي انا طفران ما معي اكول ممعيش اشتري رغيف خبز.اكيد مش راح احكيلكم كل القصه لانه يمكن تقرأوها او احضروها فيلم وفي عددة نسخ من هالفيلم واحده قديمه مع الممثل الفرنسي لينو فينتوره وواحد جديد نسبيا مع الممثل الانكليزي ليم نيسون.
منرجع لموضوعنا تصوروا واحد مشان رغيف خبز بنحبس 30 سنه وبيجي وزير او مسؤول او حاكم في اوطننا العربيه وبسرق البلد ومليارات وبالاخير بوخد جائزة نوبل بالاقتصاد
مسكين البوعزيزي في تونس اللي ولع ثورات الربيع والفصول الاربعه حرق حاله مشان الجوع والتهميش والبطاله وزين العابدين ومراته ليلى الحمرا بسرقوا اموال وذهب وعرق التونسين وسبائك الذهب ويستقبلوا في السعوديه على اساس ابطال مش حراميه وسراقين.
مبارك واولاده في ملاين ويمكن ميليارات ببنوك سويسرا من اموال المصرين. وانا لما اذكر مبارك مش ناسي الاربعين حرامي اللي كانوا معاهم.السادات عن السرقه والنهب قال انفتاح يعني الحكومي بنفتح على الشعب وبدل ما تعبيلهم جيوبهم من عرقهم وتعبهم وكدهم بتمد ايدها على جيوبهم وبتسرقهم وبالاخير بتوهم الناس بالتنميه.
علي عبدالله صالح الرئيس المخلوع في بلد متخلف فقير ابناءه من الطيبين بقولك في مليارات بالبنوك باسمه والشعب المسكين يعاني الامرين وفوق ذلك بتجي حروب داخليه واعتدأت خارجيه.
بالسعوديه الطبقه الحاكمه من الملك وجر للامراء ناهبين وسارقين الشعب وثروات لا تأكلها النيران وواحد مسكين بسرق دجاجه اوقطعة لحمه مشان يسد جوعه تقطع يده لانه سارق.واللي سارق البلد ومدخراتها وانتاجها واصولها وثرواتها بصير هو الشريف العفيف, والفقير والمهمش والجوعان بتنقطع ايده مشان رغيف.
لازم الكل يمشي تحت شعار: اذا اطعمت اشبع واذا ضربت اوجع واذا سرقت ابدع وابخع وارقع وافقع وزعزع.
عزيزي السارق مش مهم انك بتسرق لكن نصيحه لوجه الله للمساعده على تنمية الاخلاق الحميده.اسرق اشي محرز وعليه قيمه بلاش دناوة النفس وتسرق اشياء صغيره وبالاخير تقول كنت جوعان لانه اذا سرقت اشي صغير بتنحبس وبتدبهدل وتهان كرامتك اما اذا بلعت البلد فانت بطل قومي خصوصا عندنا ترمي بعض الفتات منما سرقت للشعب والاخرين.
اسرق من بلدك وخيراته لكي يشار اليك بالبنان وانك تشجع السرقه الوطنيه.
اذا سرقت من دوله اجنبيه فمعليش خصوصا اذا كانت بلد كافره فهذه السرقه حلال ومغفوره عند رب العالمين.
اسرق الغلابه والمساكين اذا كنت تاجرا وقل عنها التجاره شطاره لكن لا تنسى ان تدفع الزكاه عنما سرقت.
اسرق كل حياتك وقبل ان تموت بأيام وفي مرحلة نهاية الخدمه اطلب المغفره وانت عارف ان الله غفور رحيم.
ابدع وتفنن بالسرقه في رمضان لان الناس تكون تواقه الى مراضاة الرب وانت ارضي نفسك والجيب.
اللي انا مش فاهمه اذا الحاكم والملك حرامي وسارق ليش لازم نطلب من المواطن انه ما يسرق.فمثلا مللك المغرب بالع كل ثروات البلد وناهبها ووظيفته مللك بالوراثه ومليارات بالبنوك والشعب مهمش وطفران وجوعان وفقير يعني المفروض ان يكونوا ملائكه .زمان لما كنت كاتب جاد ومهموم بقضايا الوطن كتبت مقال سياسي عن اوضاع المغرب زمن الملك الحسن الثاني ابو الملك الحالي.كانت المغرب مديونه ب 9مليار دولار وفي عجز وثروة الملك قدرت ب18 مليار بس وقيسوا على الحاله اليوم معظم اوطننا, الشعوب جوعانه والزعماء اموالهم وذهبهم بالبنوك السويسريه والامريكيه.
في الدول الاسكندنافيه وزير بشتري بدله او بلفون او بروح رحله على حساب اموال دافعي الضرائب بتبهدل وبنمسح البلاط بكرامته وبستقيل, في بلادنا بتبلع مقدرات وثروات بلد والوزير ما بستقيل بستقيل الشعب.
يا جماعه لهيك انا كتبت عن السرقه ثلاثية الابعاد لان لها بعد انساني اذا كنت جوعان و90%من شعوبنا جوعاني وفقيره.
الها بعد اجرامي اخلاقي اذا كنت حاكم او مسؤول
الها بعد زمني اذا كانت هذا العام او بالعام الماضي او اذا كانت بالليل او النهار او كل ايام السنه.
الها بعد جغرافي اذا كانت محليه او عالميه.
الها بعد طائفي ديني اذا كان السارق والمسروق من ديانات مختلفه.
الها بعد اقتصادي تنموي اذا استثمرت المسروقات في البناء والتجاره التي تعود بالفائده على اصحابها.
بالمختصر انا اعتبر ان السرقه هي فن وابداع يتقنه القليلين بحرفنه ورقي والا فالباقي فهم هواه.. .يجب ان يتعلم الانسان من اصحاب الخبره لان السرقه هي مهنه من لا مهنة له وهم الحكام والملوك والزعماء والمسؤولين في بلادنا.
يمكن البعض يقولي ان الناس العادين بتسرق وهذا صيح انا نفسي اذا جعت وهمشت وافقرت وجهليت راح اسرق.
فمثلا نسبة السارقين في الدول الاسكندنافيه هي الاقل عالميا لان المواطن مش منهوب ومسروق من الحكام واذا في سرقه فالسارقين مع الاسف من جماعتنا وشعوبنا ىاللي عايشين هناك على اساس ممارسة هوايه مش اكتر.
اعطوني مثل سايح دنماركي او نروجي او او اجى على بلادنا وسرق. هاي الثقافه مش موجوده عندهم واتفرجوا على سواحنا حتى حمام الفندق بسروقه وببعتوا ايميل على بلادهم.
رغم دعواتي لتغير الانظمه المستبده والديكتاتوريه لكني اليوم تراجعت عن مطالبتي بالتغير ابدا ابدا واكيد بدكو تعرفوا ليش.
لانه حكامنا وزعمائنا وقياداتنا حراميه من 30 سنه نهبوا وسرقوا يمكن شبعوا ويمكن لاء بس اذا اجانا حكام جدد راح نبقى نبدى منجديد لهيك الحرامي والسارق اللي بتعرفوا احسن من اللي منعرفوش.
.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات