خد فشار يا وزير التعليم

حمدى السعيد سالم

الحوار المتمدن-العدد: 4581 - 2014 / 9 / 21 - 03:48
المحور: مواضيع وابحاث سياسية
    

أحب أعرف وزير التربية والتعليم ليه الطالب المصرى بيكره المدرسة يمكن يقدر يلاقى حل :


- جرب يا سيادة الوزير مرة تصحى من النوم الساعة 6 الصبح علشان تبقي في المدرسة الساعه 7....
وده طبعا بيزرع القلق فى نفس الطالب المصرى ....

- جرب يا سيادة الوزير تقف في طابور المدرسة ساعه و تبدأ يومك "بالتمارين" اللي ملهاش علاقة "بالرياضة" ، مع أصوات مدرس الألعاب وهو بيقول "واحد إتنين تلاتة أربعة هوب إتنين تلاتة أربعه طبعا مع تمارين التصفيق ( السقفة) التى تعتبر مضيعة للوقت على الفاضى ....

- جرب يا سيادة الوزير تسمع الإذاعة المدرسية اللي بنشكر فيها مدير المدرسة دايما بس على إيه معرفش ....
و طبعا لازم تسمع الجملة المشهورة "إذاعتنا علي الهوا بتقول صباح الخير .. دايما هنكون سوا نسبق جناح الطير"....
و طبعا أغاني و أخبار و معلومات من كتاب المدرسة اللي مافيش طالب بيفتحه يعنى بنهدر أموال الدولة فى طباعة كتب لا تقرأ من الاساس لان الطالب معتمد على الدروس الخاصة والكتب الخارجية والمذكرات .....
- جرب يا سيادة الوزير تدخل فصل تلاقي كل أربعة في نفس الكرسي و برضو المدرس يقول اللي قاعدين ورا فآشلين ....
وده بيولد الإحباط فى نفوس الطلاب !!
هما لقوا مقاعد محترمة وأدمية وقالوا لأ .....

- جرب يا سيادة الوزير تستحمل المدرس وهو بيتفلسف عليك في حصة الدين و يعلمك إن الإبتسامة صدقة ولما تضحك في وشه يقولك : إنت أهبل وده قمة التناقض !!!

- جرب يا سيادة الوزير تنسي قلمك....
هتلاقى المدرس يتعوج عليك و يقولك : ده القلم بنص جنيه لو مش معاك ممكن أسلفك..
و بعد شوية يسأل "حد معاه قلم أحمر أصحح بيه الواجب ؟ وده اسمه قمة الإحراج جراء المنظرة والفشخرة الكدابة !!...

- جرب ياسيادة الوزير تنزل "الفسحة " اللي مدتها 10 دقايق متبقاش عارف تعمل ايه في الوقت ده .....
تاكل سندوتشاتك .... ولا تشتري من كانتين المدرسة اللي عليه هجوم زى هجوم التتار ... ولا تدخل الحمام اللي دايما مش نضيف "اصل عمال النضافة مش بينضفوه" ....
ولا تشرب من الحنفيات اللي تصميمها نفس تصميم حنفيات البهايم عشان المدير يسرق فلوس الاصلاحات فبيعمل اى حاجة وخلاص .... وده اسمه اهدار مال عام وسرقته باسم الإهمال.....
- جرب يا سيادة الوزير ترجع من الفسحة على فصلك و تلاقي المدرس عاملك إمتحان مفاجئ مش علشان إختبار قدراتك لأ .....
هو بس "مكسل يشرح" ودى اسمها مماطلة.....

- جرب يا سيادة الوزير تسمع كلمة "يوم الأحد" إمتحان و تقول للمدرس إن يوم الأحد عندك إمتحانين .....
يرد يقولك : "عندكم جمعه وسبت ذاكروا فيهم" ....
أصل المذاكرة فى مدارسنا هى والواجبات المنزلية "عقوبه" مينفعش ترتاح منها حتى يوم أجازتك ...
وده اسمه ضغط نفسى رهيب على الطالب المصرى ....
- جرب فرحتك بحصة الألعاب ولا الموسيقى وتلاقي المدرس بيقولك "إنزل لم الزبالة من الحوش"...صدمة

- جرب يا سيادة الوزير يبقي عندك أعمال سنه و غصب عنك تستحمل "عدم إحترام المدرس ليك" ولو خرجت عن شعورك و إشتكيت بتاخد "صفر" كبير فيها .....
و المدرس يقول أنا عمري ما شفته ولو إنت إعترضت يقولولك : يعني المدرس هيكدب ؟ ....
وده اسمه إفتراء ....

- جرب يا سيادة الوزير تروح بيتك الساعه 3 و أحيانا 4 و مطلوب منك تتغدى و تكتب واجب لأكتر من 5 مواد و كمان تذاكر اللي أخدته في المدرسة و تروح الدرس "الخاص" و أهلك يقولولك لازم تنام بدري ......
هل يعقل إن إنسان يصحي الساعه 6 صباحا و يعمل كل ده بتركيز بدون اي راحة....
وده اسمه تشتيت انتباه للطالب المصرى ....

عرفت يا وزير التعليم ليه الطالب المصرى بيكره المدرسة والتعليم ووزيره واللى خلفوه لأننا اتعلمنا بالطريقة المتأخرة دى وطلعنا غير مؤهلين لسوق العمل ولا للنهوض بالبلد ....
فعلاً أفشل مدآرس العآلم وأفشل تعليم فى العالم في مصر ربنآ يصبرنا على التعليم الزبآله ده.....
وأخيرا خد فشار يا وزير التعليم لأنك لا بتهش ولا بتنش ولا هتعمل أى حاجة تصلح بها حال التعليم المصرى ...
وربنا يجعله عامر !!!

#حمدى_السعيد_سالم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات