على گد النوم

سامي عبد المنعم

الحوار المتمدن-العدد: 4527 - 2014 / 7 / 29 - 22:33
المحور: الادب والفن
    

طولتلك بال ..
حد گطع النفس
ضنيتك إتحب النده والليل
وحسّبت بأول محبتك ..
تطوي صفناتي أو وحشتي
مادريت ...
إتچمّل الغرگان غطّه
سافرتلك كل محطاتي ..
وبعد ما ضلّت إبروحي محطه
سهله عندك ..مثل چذباتك
إتزاغل بالعشگ
وعادي عندك .. مثل شربة ماي
چلمة نفترگ
لملميت الليل .. وهمومي
ورحت بسكوت
گلت أبتعد عنك وأنسه كلشي
حشميت الغيمه تبچيلك ..
گبل لا يذبل النعناع
ضميت المعاتب ..والسهر..واللوم
گلت أخلي الگلب يمّك..
على گد النوم
مادريت ...
ولنها روحي إبلا گلب وياي تمشي
إشما أصبّر إعيوني ..
تاخذني البواچي
وأيّست ...
مثل برحية .. والملگح نساني
أو شيّصت ...
وإنته كل ساعة إتهزني
إتريد من المامش أنكتلك رطب
إبلا ربيع ..
وخضرت روحي دفو ..
وشگيت طليعة عشگ بين الكرب
وإنتظرتك ...
حتّه لو لفحة سموم إتهب عليه
وحضرت شباچي ..والريحان ..والگمره
على إعناد الصبح
سافرت بيّه المسافات ...
وبعدني آنه إبمكاني
سندباد إبلا سفينه ..
وروحي سفره إبلا سفر
بشوگ أتنطّر مكاتيبك ..
مثل شباچ ومتاني الشمس
مرّه أتسلّه إبدمعتي ..
ومرّه أضحك للقهر
غربة .. وهموم.. وسهر
سنين مرّت ...
وآنه وحدي
آنه وحدي أتنطّر إبليلك گمر

#سامي_عبد_المنعم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات