الله واكبَر ياوَطَنْ

ميسون نعيم الرومي

الحوار المتمدن-العدد: 4492 - 2014 / 6 / 24 - 17:42
المحور: الادب والفن
    

الله واكبـَـر ياوَطـَـنْ
ميسـون نعــيـم الـرّومي

العين وَدرهَه البچي ـ والگلب عـطـّـب ملهوفْ
ياحلوه يا ام الوفه ـ والروح غيرچ مَـتـْـشـوف
ذبحوچْ يحبيبه ذبح ـ هالگطعت بـيچْ اسـيوفْ
مشتاق دومي الشوفتچ ـ گلبي الچ ظل ملهوف
صرتي حلم ما نوصَلچ ـ رواحنه إعليچ اتطوف
بـغـداد ياتـاج الوطن ـ بيـچ الـغـُرُب كلهـَـه اتـحـوف
***************
جرحچ كلف چبدي نزف ـ باترابج الـدم مَدْيوفْ
اطفال بيـچ اتيتمت ـ غسلو دمـعهـم بــگــْطوف
العيشه سوده امصخمّه ـ والموت ينهب لصفوف
بغداد : شوفيه الزلم ـ شابَـوْ اويبست لچْـفـوف
نسوان عاشت بالهظم ـ عيون تبچي اومتشوف
بـغـداد قـانون البشـر ـ بيـچ الـغـُرُب كلهـَـه اتـحـوف
**********
اسنين انگظت ماتنحسب ـ والبلد بـَـهـْـلـَه منسوف
اجروح جَرْحَتْ بالجرح ـ بشـگوگنه انـظِـل انروف
صرنه شمع يشعـل جهـل ـ والعلم فوگْ الرفـوف
والحزن دايـر عَ البلد ـ امخالف يـِـواسي المخلوف
مهجوم صـاير هـَـالوطنْ ـ والموت يكرف لصفوف
بـغـداد ياأم العــلم ـ بيـچ الـغـُرُب كلهـَـه اتـحـوف
***************
بغداد يا عـيـني إلچْ ـ اسمچ الشامخ معروف
كافي بعد ما ظل صبر ـ والصبر أعْـمَه ميشوف
حيف اوالف وسفه اوالف - سولتنه صارت بس أوف
احلام كلهه اتـْبَـربـدَت ـ ماتت ابـْـتُــرْبَـتْـهَ احروف
بلوه ابتلينه ياشـعـب ـ نركض اوكاتلنه الخوف
بـغـداد يـاأم الـكـرم ـ بيـچ الـغـُرُب كلهـَـه اتـحـوف
**************
فرهود صاير هالبلد ـ الجزّه ضاعت والصوف
شعبچ الدايخ منسبي ـ والنفط خيـرَه المكروف
صارت عداوه بالبلد ـ بالماي سموْ لجــْروف
ننحب اونتوجع دَمِـع ـ مانگدر الـعـــيـن انعــُوف
والنخل يبچي اويَه السعف ـ يصرخ ابطولـه اومكشوف
بـغـداد ! يــادرّة شــرف ـ بيـچ الـغـُرُب كلهـَـه اتـحـوف
**************
نوبه شرق نوبه غرب ـ ياصفحه ! ياوجـهـه انلوف
الكيكه كلهه اتـقسمَّــت ـ مابين حـَسنـَه اومَعـروف
الشگ كبر ماينرگع ـ ماظل زبـون او نفنوف
الله واكبـَـر ياوطن ـ حِــذفـوك ... بس مامحـْـذوف
العين وَدرهَه البچي ـ والگلب عـطـَّـب ملهـوف
بـغـداد ياتـاج الوطن ـ بيـچ الـغـُرُب كلهـَـه اتـحـوف
-----------------------------------------------
حزيران / 2014
ســـــــــــــتوكهولم

#ميسون_نعيم_الرومي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات