عيش أعوج... واستشهد عدل

سرمد علي الجراح

الحوار المتمدن-العدد: 4085 - 2013 / 5 / 7 - 22:25
المحور: كتابات ساخرة
    

صارلي يومين من قريت خبر مقتل الشاب البصراوي دفاعا عن قبر!!!
ولحد الان أعاني من صدمه, وما جاي أكدر أصدگ أكو هيج مخلوقات تعتبر الموت عبثا أو غباءا أو رعونة, يصب في خدمة الدين أو الطائفه أو الله أو حتى في خدمة العظام وهي رميم
لايمكن تبرير الموت من اجل اي شئ (من وجهة نظري الشخصيه)
أما أن تموت من أجل گبر فهاي كلش جديده, وما أظن أحد مسويها من الانفجار العظيم قبل 14 مليار سنه, ولحد أول البارحه!!
هاي براءة اختراع تسجل للعراقيين ولا أعتقد ان هنالك غبي في الكون سوف يقوم بها ابدا!!
واحد هسه يطلعلي ويكول يابه تره المرحوم استشهد مو على مود گبر!! استشهد على مود العقيده والمبدأ!!
خوش, زين مو نبيكم يگول دم المسلم اكثر حرمه من الكعبه؟؟ لو هاي تعلسوها؟؟ لو يمكن قبر السيده زينب عنده ڨيتو حوزوي قمي قعدي؟؟
مو غريبه باچر واحد يستشهد دفاعا عن بزونة الصحابي ابو هريره!!
لو مرجع يعلن الجهاد دفاعا عن بايسكل جبريل!!
لو شيخ الازهر يكفر ويهدر دم من يقول, ان ادم چان يمشي بلا لبساس (كلسون)!!
المصيبه والقهر مو بس المات مكبسل, اللي طلعوا يشيعون وخبصوا الدنيا, تگول المرحوم اضبط من صلاح الدين, وفتح باب الثلاجه!!!
لو يمكن اخترع مكوك الخلاء!!
ولكم عمي تره هاي جماجمكم حتى ابو الباچه يخسر اذا يشتريها!!
لأن ماراح يلگه ولا شويه مخ بيها يبيعه..
ولكم البصره مابيها شي يشتغل مثل الاوادم, وعايشين حالكم حال ...... وهمين هذوله بالغرب عايشين احسن منكم وعدهم حقوق وقوانين تحميهم
وأنتوا ملتهين بسوالف حتى المخابيل مايشيلها عقلهم
اني مامقهور من هذوله اللي طلعوا تشييع, اللي قاهرني أكو كم واحد يفتهم بهل مهجومه, عايش بنصهم ولاحول ولا قوه
هسه اني صرت أؤمن أنو هيج شعب يستاهل يحكموه حراميه ومجرمين وسفله وساقطين
لذلك نصيحتي لكل انسان يفتهم وشريف, خلي يتكتّر ويكعد على صفحه وأمره لله
وخلي شيعتهم تحرگ سنتهم وبالعكس, واثنينهم الى جهنم وبئس المصير

#سرمد_علي_الجراح (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات