سائق التاكسي و الزبونة ( قصة قصيرة )

حمدى السعيد سالم

الحوار المتمدن-العدد: 4079 - 2013 / 5 / 1 - 21:45
المحور: الادب والفن
    

الست ما كانش عاجبها ان السواق بيلعن و يشتم في كل حاجة في البلد، و بمجرد ما جاب سيرة مرسي.....
قالتله بمنتهى القرف :" الراجل حيعمل ايه؟ كان الله في عونه مع كل الفساد و السرقة و الخراب، و المشاكل اللي لقاها في البلد، و الافواة المفتوحة ليل نهار بتقول هات...
" بس يا سيدي و دي كانت بداية انفجار السواق اللي لف و كان حيعمل حادثة و وقف العربية و قال لها:
" لا مؤاخذة يا مدام، لما الأستاذ مرسي جه مع أهله و عشيرته علشان يتقدم للعروسة مصر.... محدش ضحك عليه.... و كان عارف كل ظروفها و عارف انها متجوزة قبله 3 رؤساء... و خلفوا منها عيال اد كده....رامية نصهم على القهاوي و الباقي بيشموا كوله في الخرابات... و قالوا له ان عندها أمراض متلتلة و بتشخر و هي نايمة.....
رايد يابن الحلال؟ الراجل كان رايدها و حارب علشان ياخدها...
ييجي بقى بعد ما يكتب الكتاب.. و يمضي على عقد معاينه نافي للجهالة..يقول دي طلع فيها و عليها؟ ...
يا أستاذة محدش ضحك عليه...
محدش قال له حنجوزك نانسي عجرم و يوم الدخلة صحى لقاها سيدة العمشة....
و بعدين مع احترامي لسيادتك لو حضرتك حسبتيها صح...
مرسي اللي ضحك على اهل العروسة مصر...
لما اتقدملها قال انه دكتور و مهندس و بتاع فضاء و حيهنيها و يشبعها...
و هما شهرين لقيناه بيقول:لما القرد يموت، القرداتي حيعمل ايه؟؟؟ ...
و ماشي يقول انه انضحك عليه...
طيب ما بتوع المعارضة بيقولوا له طلقها....مش عايز ليه؟...
اهم حيرفعوا عليه قضية خلع علشان ما بيقيمش حدود الله معاها، و هاجر المعارضة في الفراش...(ها ها ها)....
هو حضرتك نازلة هنا و لا مستنية النهضة زينا....
حمدى السعيد سالم

#حمدى_السعيد_سالم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات