قائد قوات الرگي

حبيب العربنجي

الحوار المتمدن-العدد: 3802 - 2012 / 7 / 28 - 15:46
المحور: كتابات ساخرة
    

يابة هالمرة يگولون إن جماعة الأزلام والحزب القائد هم السبب في العواصف الترابية الحمرة إللي ما تنگطع عن بغداد إلا للعودة بكميات أكبر...وآني أشو گلبي يصدگ هالشي لأن الأزلام إللي لبسونا نعلان بحسب أدبيات تاجر النعلان يسوون كل شي من أجل هذا الشعب، من نعال تك أصبع إلى بيع بغداد بنص ساعة للأمريكان، مرورا بإعطاء حكم ذاتي لآل بارزان ذلك القرار الغبي إللي راح يبتلع العراق كله.
وآني چنت كاتب مقالة قبل ثلاث سنوات أتهمت فيها زورا وبهتانا إيران هي اللي تسبب هاي العواصف، بس هسة عندي قرائن (شلون چملة خطيرة أتعلمتها من خطابات رئيس الوزراء) ووي هاي القرائن دا اشوف أن الأزلام لهم المصلحة العليا أم الطابقين في هاي العواصف الحمرة.
ليششششششششششش؟
لأن جماعة الأزلام خبرة بالخداع وهالمرة يريدون الظروف الملائمة للغش والخداع فيريدون السما حمرة والجو مليان تراب أحمر حتى من يجي الرفيق الأحمر الدوري ما يبين لأن هو ولون العاصفة الترابية نفس الشي بحسب خبير في الترددات اللونية إللي دا يگول أن سبب نجاح الاحمر الدوري في التجول بكل حرية في بغداد هو التداخل اللوني بين الأحمر الدوري والعاصفة الترابية أصلا هو بدا خبرته القتالية في التعامل وي العواصف من عاصفة الصحراء من صار قائد قوات البعران بحسب تصريح تاجر النعلان من گال من اهم اسرار حرب 1991 أن الرفيق الأحمر چان مسؤول عن خمسة ألاف بعير ، وهذا التصريج يجوز تلگونه على اليو تيوب وهو بمناسبة الذكرى الثالثة لحرب 1991، فالرفيق الأحمر الدوري رجل العاصفة ويعرف شلون يستفاد من العواصف وهذا إللي دا يسوي هسة، كل يوم عاصفة بيجي الرفيق العاصفي الاحمر الدوري مثل حبات رمل أحمر وما حد يحس بيه، يروح للكاظم ويلعب محيبس وي جماعة جاسم الأسود، وبعدين يتمشى على جسر الأئمة ويوصل يم مطعم العريش بالأعظمية ويضرب دجاجتين على السحور ويروح يصلي بجامع أبو حنيفة من غير ما حد يشوفه وخاصة هو هالأيام صاير قطعة حمرة بسبب طول اللحية الحمراء ...هسة عرفتوا ليش الأزلام عدهم إيد ورجل بالعواصف الترابية؟؟؟
وهمين هم السبب في زيادة الرگي بالسوگ لأن مثل ما نعرف أن الازلاميين كانوا زيتونيين ، مو زيتونيين بالاكل بس باللبس، وحتى ينجح التمويه فالازلام ما راحوا إلى زيادة الزيتون بالسوگ حتى لا تنكشف الخطة الزيتونية، وشافوا إن الرگي يمكن يقوم بنفس الدور النضالي للزيتون وخاصة أن الرگي أثبت حسن السيرة والسلوك وچان يحضر الإجتماعات الحزبية الأزلامية، وهسة الازلاميين صايرين يستغلون سيارات الرگي للتنقل بين المحافظات والأحياء الموالية للأزلام وطبعا إنطلاقاً من رگي سامراء المشهور بكبر الحجم، بس آني خوفي أن سيارة للرگي توگف بالسيطرة ويجي أبو السيطرة ويطبطب على الرگي حتى ياخذ الخاوة ويطلع هو دا يطبطب على (مؤخرة) ازلامي وما يدري، وخاصة أكو ناس يدوسون بأصبعهم على الرگية حتى يشوفوها مستوية زينة لو لا...وهناك يطلع هو دا يدوس على (مؤخرة) ازلامي متنكر بزي الرگي بعد زوال عصر الزيتوني.
وبحسب بيان الصادر من حزب الازلام بمناسبة رمضان وإللي يكتبه بحسب إعتقادي الرفيق أبو آوس (صلاح المختار) إللي ضرب الدخل مال السفارة العراقية بالهند، لان هو معروف بالبيانات والمقالات الصوتية الفراغية، فبحسب هذا البيان فأن الرفيق الاحمر الدوري نجح في العبور من كل نقاط السيطرة وتحمل الطبطبة على (المؤخرة) للوصول إلى مدينة الكاظمية حتى يلعب لعبة المحيبس إللي يعشقها، وبعد ما أطمأن إلى النتيجة توجه بسيارة محملة بالرگي إلى الأعظمية، وتعرض إلى مجازفة خطيرة من طلب أحد رجال السيطرة بالأعظمية رگية عالسچين، بس ربك لأن الرفيق الأحمر الدوري عنده خبرة درباشية كبيرة ويتبع الطريقة الكسنزانية بالكلاوات، فتحمل السچينة وعبر السيطرة لأن من نشف الدم بجسمه طلع اللحم الأبيض فشاف الشرطي اللحم الأبيض عباله رگية بيضة، قادر يا شيخ عبدالقادر !
وعلى هذا، نطلب من الجميع فحص الرگية إللي يشتريها حتى لا يطلع رفيق أزلامي ملغوم واحدنا ما يعرف ويوديها وياه للبيت وهناك يكشف الازلامي عن نفسه، بس بيني وبينكم إذا طلع الرفيق الاحمر الدوري فهذا بخت ولا بخت فيفي عبدو، لأن بهاي الحالة راح تستحق الجائزة المليونية إللي تناسب هاي الرگية ، أقصد الرفيق الأحمر الدوري، أو همين يسويها البخت بدال ما يطلع الأحمر الدوري، تطلع لك الرفيقة ميمي الدوري وأنت گاعد دا تطبطب عليها، وهمين تستاهل خمسين مليون دولار كاش من قائد قوات جيش الچفجير والهريسة لإطلاق سراحها، يعني بحالتين أنت مدومن، عالراسين .
ومن قائد قوات البعران إلى قائد قوات الرگي، يستمر حزب الازلام في ثرم البصل، بعد ما خسروا الماكنة العملاقة لثرم البشر، ومستمرين في البيانات الفرغية الصوتية إللي يحول إسماعيل ياسين إلى رگيپايدر مان في النسخة الازلامية للسپايدر مان.
وهذا البيان عن نشاطات الاحمر الدوري هو چذبة أزلامية عالسچين !

#حبيب_العربنجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات