شيوعيين - الى الشهيد الشيوعي نايف عبدالواحد

كامل الركابي
(Kamel Alrikaby)

الحوار المتمدن-العدد: 1040 - 2004 / 12 / 7 - 08:47
المحور: الشهداء والمضحين من اجل التحرر والاشتراكية
    

شيوعيين

كل نبضه اﺒﮔلبهم
ورد للناس
ورياحين
شيوعيين
كل نسمه ابفجرهم
خبز للفقره
وشمس
يفرش ضواها
ابيوت المحبين
شيوعيين
كل شمعه ابسهرهم
فرح للثوره
الضوت بعيونهم
طيبين
اصفه
من الليالي اﻠﮔمره
من ماي النبع
من هدوة التلحين
شيوعيين
(نايفهم)
يحط دمه عله ﭽفه
وبالملح
تسهر جروحه
ومايذل ويلين
أسرار اﻠﮔمر
ذمّه ابرﮔبته السمره
عاشرها ابضميره
وسيَّج ضلوعه عليها
وحنَّب الها..اسنين
شيطيّحها ؟
يامن لانظر عدكم
ولاعدكم
وجه ناس ودواوين
شيوعيين
يتشجر حزنهم بالرصاص
وينبض ابدمهم
ﻋﺸﮔهم للعراق
ابفي بساتين
يعرفهم تراب الناصريه
وصبخة البصره
ورمال السماوه
وجبل سفّين
غنَّت وبسهرهم
ﮔمرة المنشور
تركض بالشوارع
والدرابين
تضوَّي اﻠﮔﺎع
غرّبها الحزن
والمطر
ما حّن العشبها اسنين
تمّر ابيوت
وسَّمها الفرات ابهيبته
نياشين
تسهر ﮔمرة المنشور
تسهر بالبيادر
ع الحياطين
ياعمال
ﻴﭽفوف الفلح
ياهيه
ﻴﭽفوف العراقيين
هاهذا حزبكم
تضوي اصابيعه
مفاتيح الشمس
والثوره
ها هسه تدِّﮒ
بيبان الولايات
وتفيض بأغاني
اشفاف حلوات
وتعطِّر ورود
خدود حلوين
ويرِّد الفرح
لعيون المحبين
شيوعيين
كل نبضه اﺒﮔلبنه
اشموس
للناس
ورياحين

#كامل_الركابي (هاشتاغ)       Kamel_Alrikaby#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات