(( ألَمْ ))

جواد القابجي

الحوار المتمدن-العدد: 3169 - 2010 / 10 / 29 - 09:43
المحور: الادب والفن
    

إضرب ياشعب گّلّي بعد شتريد
طاح الچان شايف نفسه من احديد
************
حراميه اجوك العدد ماله احدود
ماي اوكهربا أيَّسنه ما موجود
الله اليستر امن العين والحاسود
أُميّه اوجهل ونسينه چلمة عــيد
**********
حصتك من نفطنه بالحفظ مأمون
اوفانوسك ثقه ماينطفي مضمون
بعد من الحكومه گلّي شتريدون
كيكه .. والحراميَّه بلا تحديــد
************
شنو ماكو شغل ؟؟. روح اسأل الدفّان
اوروح اسأل التاجر واليبيع اكفان
تموين او بطاقه .. امتلّله وجدان
وزاره ابلا تجاره والقبض تغريــد
************
سين او سوفَ وي اخواتها السينات
حلّلها او إكِل وشبع .. بلا آهات
لا تتبطّر او تحقد على الآيات
بيديها الَّلحم .. ونتهَ العظم بالإيــد
************
صايه او لحيه وعمامه اوعليها امداس
روح الهوه ابظهرك .. وضحك اعللناس
النفط كلّه إلك .. مكسب بلا مقياس
اومن نحچي .. صرختوا ليش هالتشديد
*************
من دار الإذاعه الخير گالوا جاي
اوجوع اوفقر ورتال البطاله اهواي
تصدَّع راسنه او بالحصّه مامش چاي
اشلون الراس من هاي الطلابه ..ايهيد
*************
المسؤول تاجر .. والشعب محتار
بيده الأمر .. هوّه ايقرر الاسعار
والعارض ..!! عله راسه يِهَدْم الدار
دمقراطيه حرّه اوعهد عِدنه اجديـــد
************
انباع الوطن والله اوحرنه وين انروح
نبقه .. الذلّه صعبه .. او وارمات جروح
انعوف الوطن .. مويبقه الگلب مذبوح
لأن
عبدنه الچان أمس
يرجع علينه .. ايســـــــــــود
*************************
بيت أبوذية الى الشاعر الشهيد عبدالحسين ابو شبع قبل إغتياله بشهر واحد
***********
الليالي گصن بيَّ حيل +++ ولمن
جفنّي اوراحن اوللغير +++ ولمن
اسولف اوشسولف بعد +++ ولمن
أحاذر گمت من ثوب العليَّ
**********************************

#جواد_القابجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات