ابيت اللعن

حامد كعيد الجبوري

الحوار المتمدن-العدد: 3057 - 2010 / 7 / 8 - 16:24
المحور: الشهداء والمضحين من اجل التحرر والاشتراكية
    

الى من عبّد طريق الأحرار فخرا ورجولة الشهيد الخالد عبد الكريم قاسم

يالشايل محبة الناس
الناس أتبادلك حبك
فرشت أعيونك وغطيت
شعبك والغطه أبهدبك
عجيبه الكلب هاكبره
ويوسع كردك وعربك
شهدلك أبيض التاريخ
شعبك منجمك ذهبك
كافر كالو وملحد
شعوبي وتيهت دربك
قبلتك محد أعرفها
سرهّا بينك وربك
عفا الله ما سلف خنجر
غدر وبكَلبك أيصوبك
عمرك ما حملت الغيض
أبفراتين أغسلت كلبَك
****
كصير الأيد ع الشينات
وتطول أيدينه الينهبك
تروّي أبصبرك العطشان
ومن شرب الشعب شربك
ومثل ما تاكل الفقره
أكلك والذهب كربك
لأن طيب العراق أرويت
وغذيت الشعب عذبك
النزاهه البيك ما تنقاس
دواووين المجد كتبك
الغيره أبشيمتك لاذت
وماتت من كضَه نحبك
أنعكد رحمه وبعد ميجيب
العراق ومثلك أينجبك
شبت بالعراق النار
وخافت نارها اتلهبك
تشيملك حزب عادل
شيوعي وحزبه من شعبك
****
يل بعتوا الوطن والناس
وتشرب ذلتك نخبك
يمأمن الحرامي البيت
يشيل البيت ويسلبك
قاسم للشرف ديوان
الغيره أبراسك أتندبك
العراق أبشاربك شلته
العراق أشتات من عكبك
لأن عش الفقير أبنيت
عكارب هاجت الحربك
من رحم الفُكر شبيت
وبس هذا الذنب ذنبك
الخزينه بيدك ومديون
أوذمتك يبرّي اليطلبك
يملاوي المنايه أبزود
ولا يرجف كلب صحبك
مثل نخل العراق تموت
سباحك حضن تربك
تلثم غادرك بالخوف
وترفض قاتل أيعصبك
أبيت اللعن ( يكريم)
وبس أبطيبك أنعتبك
يا أبن العراق البار
يا كبر ونجي أنجهبك
****

#حامد_كعيد_الجبوري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات