قصة ليلى والذئب كما يرويها الحكواتي الاسرائيلي

عماد ابو حطب

الحوار المتمدن-العدد: 3052 - 2010 / 7 / 3 - 14:01
المحور: الادب والفن
    

قصة ليلى والذئب كما يرويها الحكواتي الاسرائيلي

كان يا مكان في هالديب وكان كل اللي بيعرفوه بيعرفوا انه كان لطيف و طيب وابن عالم وناس.وكان مسالم كتير لدرجة انه ما كان بيقرب من اللحم ولا بيحبه وكل العالم بيعرف انه ما بيحب يفترس حدا ولا ياكل لحمة حدا ومن كتر ما هو مسالم صار نباتي وما بياكل الا الخضرة والأعشاب ….

وكانت تعيش في الغابة بنت شريرة بتسكن مع جدتها وكان اسمها ليلى…. ليلى هاي كانت كل يوم بتطلع على الغابة وتخرب كل حاجة :بتقتلع الزهور وتدمر الحشيش الي كان الديب المسكين بيعيش عليها ويتغذى منها, و تخرب المظهر الجميل للغابة, وكان الديب في كل مره بيحاول يكلمهاوينصحها ما تخرب الغابة الحلوة, ولكن ليلى الشريرة ما كانت تسمع له وظلت تدوس الحشيش وتقتلع الزهور من الغابة كل يوم, وبعد ان يأس الديب المسكين من اقناع ليلي الشريرة قرر ان يزور جدتها في بيتها عشان يكلمها ويخبرها باللي بتعمله ليلى الشريرة.والديب المسكين اللي ما كان يعرف انه جدة ليلى كمان شريرة متلها.

ولما راح علي بيت الجدة وخبط الباب, فتحت الجدة الباب, وشافت الديب المسالم اللي همه مصلحة الغابة وسكانها, ركضت وحملت عصاية كانت عندها في البيت وهجمت على الديب قبل ما يفتح تمه بكلمة او يعملها اي شيء, ولما هجمت الجدة العجوز على الديب الطيب ارتعب وخاف ومن كتر ما خاف وهو عم يدافع عن حاله دفشها عشان تبعد عنه, وقعت ختيارة الجن على الأرض وخبط رأسها بالتخت, وماتت جدة ليلى الشريرة.

ولما انتبه الديب الطيب انه الختياره ماتت , زعل كتير عليها و تأثر وعيط و شلخ حاله واحتار شو يعمل, وصار يفكر بالطفلة ليلى كيف راح ستعيش بدون جدتها وقديش راح تحزن وتبكي وصار قلبه يتقطع علي البنت المسكينة ...

ففكر بالأخير أن يخفي جثة الجدة العجوز, ويأخذ ملابسها ويتنكر بزي جدة ليلى عشان ما تنتبه لموت جدتها وهيك بيقدر يطبطب عليها ويعوضها حنان جدتها اللي خسرته بعد ما ماتت . رجعت ليلى من الغابة ووصلت للبيت, كان الديب المسكين نايم في تخت الختيارة ولابس اواعي الجدة العجوز.

ولكن ليلى الشريرةانتبهت ان منخار جدتها و أذناها كبار وعينيها متل عيون الديب المسكين ,وهيك اكتشفت انه اللي في التخت مش جدتها ولكن الديب المسالم الطيب، قامت فتحت الباب وركضت ليلى الشريرة. تصرخ في الغابة وتقول للناسانه الديب الطيب هو شرير وقد اكل جدتها وحاول ان يأكلها كمان... شايفين لوين وصل شرها لهاي اللي اسمها ليلي .!!!!!!

#عماد_ابو_حطب (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات