كراسي ( مشهد كوميدي )

جمان حلاّوي

الحوار المتمدن-العدد: 3011 - 2010 / 5 / 21 - 22:55
المحور: الادب والفن
    

كراســـي


(مشهد كوميدي)

جمان حلاّوي

سبعة كراسي مبعثرة ، يهجم شخصان ويتعاركان عليها ، يتبعثر شعرهما وتتفتح قمصانهما ، يسيطر الأول على أربعة كراسي، والثاني على ثلاثة .
( الأول وهو يقوم بتعليم كراسيه الأربعة بقطع قماش اصفر ، مبتعدا" عن الشخص الثاني بضع خطوات الذي يقوم بتعليم كراسيه الثلاث أيضا" وفي نفس الوقت بقطع قماش اخضر

الأول والثاني : هذا واحد ، هذا اثنين ..

( يتصادم عجزهما حينما يقتربان من بعض وهما يربطان ويعدان كراسيهما ،
يسقطان على وجهيهما )

الأول : عِمة ، ما تشوف

الثاني ( في نفس الوقت ) عِمه ، ماتشوف انت !!

الأول (يهش له بيده ويهم بعدّ الكراسي بتلهف ) : واحد ، اثنين ، تلاثة ، اربعة
أي كاملة ، الحمد لله والشكر، ياربي زيد وبارك

( ينظر إلى الشخص الثاني بتهكم ليغيظه ، ثم يجلس فاركا" عجزه على المقعد
إثناء الجلوس للأغاظة )

الثاني : يابة هاي عندك تلث كراسي ، شلون راح تكعّد ضيوفك الأربعة

الأول ( بغضب ) : عندي اربع كراسي ستاد !!

الثاني : اشو عدهن ، صدك اربعة لو أقل ، اشو آنه اشوفهن تلاثة ؟!

الأول ( يعدّ دون أن يحسب الكرسي الذي جلس عليه ) : واحد ، اثنين ، تلاثة ..
أخ وين راح الكرسي الرابع ، يمعودين ، اخ ، لا ، يمعودين
( ينهض مدورا" هنا وهناك، ثم يعود ليعد وهو واقف) واحد ، اثنين ، تلاثة ،
اربعة ...هاي هية اربعة . الحمد الله والشكر ..شبي ّ منخبص !! ثولني هذا
ابو العلك
(ثم يؤشر إلى الشخص الثاني بأصابعه" رقم أربعة وهو يهمس
بشفتيه أربعة للإغاظة ، ثم يعود ليجلس )

الثاني : حتى عَد ما تعرف تعد ، شلون راح تقنع ضيوفك بمشروعك ( بتقليد ) الضخم

الأول ( وهو جالس ) : شبيّ ما أعرف أعد ، هاك شوف ؛ هذا كرسي واحد ، هذا
اثنين ، هذا تلاثة ، وهذا ( مؤشرا" في الهواء ) الراب....صدك هذا وين
الرابع ، يمعودين وين الكرسي الرابع ، لا تخبلني وين الكرسي الرابع ؟!!

الثاني : اثول ، صدك اثول ، مو كاعد عليه !!

الأول ( بخجل) : هاي صدك شلون فاتتني

( احد الاشخاص يقوم بثقب بالون كبير بواسطة إبرة قرب الأول ، صوت انفجار البالون ، يقفز الأول محاولا الاستطلاع ، يستغل الثاني انشغال الأول وابتعاده عن كراسيه فيسرق كرسي ويضعه مع كراسيه)

يعود الأول ، يلحظ نظرة ارتباك على الثاني وهو يحاول تفادي نظرات الأول ،
يهم الأول بعد الكراسي من جديد )

الأول : واحد ، اثنين ، تلاثة ، اخ وين الرابع ، آنه خو واكف مو كاعد ،الاّ اذا لازك
ب ...(يمد يده على عجزه ) لا ، ماهوّ !! ؟
( يصرخ ) بوية ، وين الرابع ، ياناس وين الكرسي مالتي ؟!
( ينظر الى الثاني الذي يحاول ابعاد بصره )
انت اخذت كرسيي ، اكيد انت

الثاني : وشمعنى آنه ؟

الأول : ما كو غيرك هنا
الثاني ( مؤشرا" الى الجمهور : يعني هاي الناس كلهه ، شمعنى بس آنه ؟

الأول : اكيد انت لأنك تضمرلي مصيبة .. مصيبة سودة !

الثاني : يعني تخونّي , موعيب !
هاي كراسيي آنه وجبتهن بتعبي ، وآنة رجـّال شعبيتي واسعة وقاعدتي
عريضة

الأول : أهلا أبو شعبية واسعة ، شلون وسّعتها بالله ؟!
الثاني : هذا مو شغلك !

الاول : آنه حاط اشارة بكراسيي ، علك اصفر ، تشوفه
( مؤشرا" على العَلَـك )

( ينظرا لثاني إلى العَلَـك الأصفر للكرسي المسروق والى علكاته الخضر)

الثاني : جان أخضر ، وضربته الشمس وكشف لونه ، شسوي شمسنة قوية هالايام !!

الأول : وهسه شلون ، ترجع لي كرسيي ، لو تصير موزينة وياك

الثاني : هي خربانة من أول ، شتسوي يعني ، ذيج الأمم المتحدة وروح اشتكي

الأول ( وهو يبكي كالاطفال فاركا" عينيه بيديه ) لا ، ما اشتكي يم احد ،
راح ابجي بحضن ماما !!

الثاني : من هي ّ ممّومتك حبيبي !!

الأول ( يمط الجملة ، زاعقا" كالطفل ) : مـــامـــا هيــــلاري !!

( يجلس شخص ثالث بين الجمهور على كرسي مؤشر بقطعة قماش بيضاء )
( يأتي الشخص الثاني ويدفع الثالث ويأخذ كرسيه بالقوة )

(الثالث مندهشا")

الثاني : وهذا هَم كرسي اجالي

الثالث : شلون تدفعني وتاخذ كرسيي موعيب

الثاني : ما بقة عيب ، وشتريد اتسوي يعني ؟!

الثالث : رجّع لي الكرسي بهدوء احسن لك !

الأول (يمسح دموعه ) : هو هذا مال تعامل بهدوء وتفاهم !
لازم ناخذ كراسينه بالقوة منّـه
الثاني : اسكت ابو دمعة !!

الثالث : راح اشتكي عليك !

الثاني : بالله وين بربك !

الثالث : بالأمم المتحدة ، والاتحاد الإفريقي ، وجامعة الدول العربية
( مستدركا" ) بعد بالله وين .. وين ؟ ها، بالاتحاد الدولي للكرة " الفيفا "

( يهمّ الأول بالإمساك بخناق الثاني ، يحاول الثالث إبعادهما عن بعض )

الثالث : مو هالشكل ياناس ، مو هالشكل التفاهم ، صحيح هوّ غلط ، لكن نرّجع حقنة
بالتفاهم

الأول :هذا يا تفاهم ، هو هذا مال تفاهم ! اخذ حقي ، والله اخذ حقي !!

الثاني ( للأول ) : ولك يا حق هذا ؟ احنه اخذناها بالحرمنة والتحوسم ، وهسّة تسميه
حقك ، منين اجه حقك ؟

( يهجم الأول على كراسي الثاني ويأخذ كرسيا" ، يمسك الثاني بيدّة الكرسي محاولا إعادته ....
بين الأخذ والجر تنخلع يدة الكرسي بيد الأول فيسقط على قفاه ويبقى الكرســــي المكسور بيد الثاني )

الثاني : انكسر الكرسي ، لكن مو مشكلة ، اكعـّد عليه نائب معوّق !!

الاول : يعني مترجّع كرسيي ؟

الثاني : لا !!

( يخرج الأول بالونه ، ينفخها ) ثم يفجرها بدبوس، صوت فرقعة ، فيسقط الاثنان على الأرض .


مكان ما من هذا العالم
5 / 2010

******************************

#جمان_حلاّوي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات