تباً للسيلسة / مهداة الى العراق العظيم

حامد كعيد الجبوري

الحوار المتمدن-العدد: 2949 - 2010 / 3 / 19 - 20:19
المحور: الادب والفن
    

شميتك عطر بورود كردستان
وعسل تُكطُر عسل برحية البصره
من شيلة (أفطيمه) الصاية (سليمان)
لو شروال (كردي) وشاربه وستره
لو بعكال عربي الكاظ حد الهور
للبدوي المحزِّم غيرتَه أبغتره
مره أبعيني شفتك تُركص الجوبي
وهجَع تُـركص هجع شفناك جم مره
شايل (فالَه) بيدك تحرس الثايه
وبالغربيه تفخَر سيفك أتوشره
مره أبعصه (أمحمد) تحمي كل البيت
لو مكوار (حمزه) أبغيرته أمجيره
لو نفرض نطلع (ضاري) من لحده
ونشوف أعظام زنده وساعده وصدره
من يكدر يفَرِق بالعظم ياهو
عظم(شعلان) لو (ضاري) الرُفَـض كبره
تباً للسياسة وتخسأ الأحزاب


التصعد ع الجماجم تُطلب الأمره
أمير الغيره يسرِِج مهرة النوماس
مثل (عبد الكريم) الحبتَه الفقره
****
دعوه الكل سياسي أيغادر (الخضراء)
ويتجاوز حدود الأضويه الحمره
وعهد من الشعب كل العراق أيصير
غابه أمن المحبه ويزهي بالخضره
سوّينَه العلينه أعيونَه عالجاي
الموخَيال ينزل ترفُضه المهره
الحاكم بالعداله وبالنزاهه أيسود
(عـُمَر) قاد الصحابه أبحكمتَه وفكره
لو (حيدر علي) يملكلَه بس الثوب
من كد مايركعَه مَلت الأبره
****
فتنه وتشتعل شاعلها ياحاخام
مره أمن اليمين ومره باليسره
نُرفض كل كراسي( امريكه) تصنعها


كرسينه جريد وبيدنه أنجره
ونرفض كل سياسي أيوالي جنسيات
وجنسية العراق أبجيبه للذكره
مدري وين عائلته وحساباته
والأهلَه يرد بس يترس الجَره
مامسموح نسكـُت والوطن مذبوح
واليذبَح أنشوفَه وخوفنَه أيستره
نقبل بالعراق أتقسمه من تقسم
شمسنه والهوه والماي والكمره
نقبل بالعراق أتقسمه من تقسم
بيت الله الحرام وكبة الصخره
***
مد أيدك الأيدي وأحنه أهل البيت
وجَتف يسند جَتف والبيتنه أنعمره
جَذر واحد أهلنه أمعدَد الأغصان
أبياعُذر الفرع يتبرَه من جَذره
الجامع من يكع لو مسجد أتهدم
واليهَدِم أخوَه أيناطح أبصخره
ربنَه واحد وقرآنه واحد
و(محمد) للنكرهن منه يتبره
موتربات أهلنه اليمشي راك الراك
ولا أيدخن أجتافَه وتخـنـُكه العبره
موزاجي حليبَه العايش أبوجهين
ما راضع حليبه من ثدي الحره
عراقيين زحنه بالمنايه الظيم
ونظل ننزف عـُمُر لو تبقه فد كطره
مرهون العراق أبكبة (النعمان)
وجفين الكمر (عباس) والعتره
موسنه ولا شيعه اليوم مختلفين
ولاواحد الواحد يحفر الحفره
مابين (المعالي)ورغبة (المحتل)
أندك ساس التفرق ونكشف أمره

#حامد_كعيد_الجبوري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات