الجنين فى بطن أمه بيقول نعم

طاهر كمال عبده

الحوار المتمدن-العدد: 2941 - 2010 / 3 / 11 - 03:25
المحور: الادب والفن
    

الجنين فى بطن أمه
قال : نعم ولا حد همه
قالها واضحة فى المخاض
قبل ما "الداية" تلمه
قبل ما ينزل براسه
قبل ما تقطع "خلاصه"
قبل ما الحاضرين يسمّوا
قال : نعم ولا حد همه
****
قبل ما الأحضان تضمه
قبل ما يوأوأ بفـُمه
قبل ما نأدن فى ودنه
قال ومصمص صدر أمه
****
قبل ما نفكر فى همه
ولا عيشة مرار تغمه
قالها من غير إلتباس
قبل ما يعضعض فى كمه
****
قالها من روحه ودمه
واللى واقفين عنده شموا
قبل ما ينقوا الأسامى
ويختاروله إسم عمه
****
رأيه كتبه فى كل حتة
ع الملاية وع "الكوفرتة"
فى القماط والحفاضات
حتى مكتوب ع "البافتة"
****
واللى يعنى ماهوش مصدق
إنه عصر المعجزات
سألوا دكتور فى "الأجنـّة"
قال فى تفسير الحاجات :
إن تطعيم الحوامل
جارى فى المستشفيات
ضد "فيروس" المعارضة
ويّا باقى "الفيروسات"
فالجنين يطلع مهاود
يلزم الخوف والسكات
وإن ما قالشى حروف "نعم"
قبل توزيع "المغات"
يبقى لازمه جرعة تانية
ضمن حملة تطعيمات
****
بشرى للنسوة الحوامل
ليك بدال الصوت صوتين
بشرى لجميع الطوايف
والرعايا المظلومـــين
بكرة حزب الدولة يطلع
بإسمكم ويقول : "آمين"
بكرة هينقـّط بدالكم
فى الفرح يا محظوظين
بالأصالة وبالنيابــة
عن جميع المدعوين
بكرة هيصوت بصوتكم
يا جموع الغلبانــين :
اللى رايح , واللى قاطـع
واللى مالوش فى الطحين
واللى عارف , بس خايف
واللى عامل ودن طيـن
واللى متكبر يعبـّر ,
والشيوخ والمأموصين
واللى ماتوا ولسـّه روحهم
فى الأسامى الموجودين
واللى غايب , واللى سافر
واللى هاجر من سـنين
واللى من صنع الخيال
والشخوص الممكنين
فإطمئنوا يا رعايـا
وإعلموا يا شقيانين
إن أصواتكم جميعاً
مكتوبين ومجهزين
فى الصناديق الأمينة
موضوعين ومرتبين
و إعتماداً ع " السونار"
خـدنا تصويت الجـنين !!
******

#طاهر_كمال_عبده (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات