جهاد علاونه
الحوار المتمدن-العدد: 2876 - 2010 / 1 / 2 - 22:16
المحور:
كتابات ساخرة
أنا إزهقت من سوالف المرأة والجندر والجندريه وتخريفات الحوار المتمدن وعشان هيك هذا إعلان عن عيادتي الجديدة والتي سأفتتحها تقريباً في أي لحظه , ما هو أنا عن جد ازهقت من الفكر العربي والأيديولوجيات واليسار والحريه والديموقراطيه والكلام اليساري اللي ما بطعميش خبز , صارلي تقريباً من سنة 1992م وأنا بقرأ وبكتب وبألف عنواوين ومثل ما غنت فيروز (صارلي شي 100سنه عم ألف عناووين مش عراف لمين) عن جد أنا ازهقت على شان هيك بدي أغير مهنتي وشوفلي شغله ثانيه خلاف الكتب والحريه والديموقراطية , بدي أشتغل (فتّاح) .
-فتاح؟
_آه فتاح شو مالها صنعه زي الذهب وبتدر دخل الدنيا وبصير معي مصاري وبتجوز على زوجتي لالا بالأول بطلقها وبعطيها خلو رجل وبخليها اتحل عني وبتفرغ لحبي , بعدين الشغله راس ماله مش اكثير , هي بس بحاجه إلى :
1- لحيه طويله.
2- دشداش أبيض وكل ما كانت الدشداشه قصيره كل ما كانت أحسن ومقنعه للناس .
3-مسبحه طويله بطول 1متر أو 60سنتمتر.
4-بخور وند .
وبعدين بصير وانا قاعد بين الناس بالبدايه أعمل حركات غريبه فبصير أشنّف أذاني للسماء وكأنني أتلقى الأخبار .
أنا فكرت في الموضوع ..أنا خلص فكرت وقررت , وما حداش يناقشني بالموضوع ,ومن بكره الصبح بدي أفتح عيادة العلاج بالقرآن الكريم , وهذه مهنة مدرة للأرباح السريعة , اليوم شفت طبيب علاج بالقرآن الكريم ما شاء الله عليه ألله معطيه من نعيمه عنده أربع نسوان وأربع فلل وأربع سيارات وكلمته مسموعه وبتنطبق عليه كل مواصفات البرجوازية النتنه.
وأنا بوعدكم إني ما أكونش برجوازي نتن ,وبعدين أنا شو ناقصني ؟كلشي عندي , القرآن عندي , والأحاديث عندي والدروشه والممسكنه والهبل هذول كمان عندي ,بس ناقصني شيء واحد وهو الكذب والدجل , بس كمان هذا مش مهم على شاني رايح أتعلمه بسرعه مع مرور الوقت, وبعرف ناس بالكذب عباره عن أساطير هذول بجيبهم وبخليهم يعلموني , أنا أصلاً ذهني صافي وبتعلم بسرعه .
وشو رايكم ؟ وين أفتح عيادتي , أنا بفكر أفتحها في أول البلد على شان أي حدى يسأل عني ما يتوهش , لأو بفتحها في آخر البلد , أو أحسن شيء رايح أفتحها في وسط البلد مقابل المسجد الكبير , آه على شان الزحمه والناس والبركه ,عشان اللي بطلع من المسجد فوراً يشاهد آرمتي الكبيرة (عيادة الشيخ جهاد للعلاج بالقرآن الكريم) وطبعاً أي واحد بيجيني من جهتكم مش رايح أوخذ منه مصاري زي باقي الناس لا أنا رايح أراعيه جداً بس بالأول يحكيلي إنه من طرفكم وإنه إنتوا إللي باعثينه , ماشي ؟ .
وأي حدى بيجيني بوصفله آية الكرسي للاكتئاب .
وآية الكرسي للقلق.
والمعوذتين لقلة النوم .
يعني القلقان ومش عارف ينام راح أوصفله آية الكرسي , وبالنسبة لآلام المفاصل رايح أوصف : شو رأيكم بسورة الكوثر ؟ يالله ماشي حالها , وللعشاء الليلي أي لضعف البصر في الليل رايح أوصف سورة الضحى , ماشي حالها بتلائم اسم الضحى مع العشاء الليلي .
بس والله متحير شو بدي أوصف للسكري , أنا بقول أوصفله التمر اللي كان يوكل منه رسول الله في مكة والمدينه أنا شفته في مكه , ورايحه الوصفه اتكون عباره عن أكل سبع حبات تمر في الصباح وسبعه في المساء , وسبعه وبس فقط لا غير , 8 لأه مش رايحه اتجيب نتيجه , رقم سبعه في الطب النبوي يا شباب مهم , أنا مره سألت بائع في السوق شو هذا ؟ حكالي هذا تمر خذ منه سبع حبات يوميا وبصير ق..ك زي الحديد , فحكيتله , أصلاً هو زي الفولاذ أنا بديش إشي يقويه أنا بدي شيء يهديه ويضعفه عشانه امغلبني في وحده بتيجي على بالي ليل ونهار وبسببها عن جد صار عندي افراط جنسي فقال خذ هذا التمر وكمان هذا سبع حبات , فحكيتله ليش سبع حبات ؟ ما كان من شويه سبعه للتقويه , طيب خليها 5 للضعف يعني عشان أضعفه وأهديه , وبعد شويه أجت عنده ست محترمه باعها ترمس كمان سبع حبات , فقلت بيني وبين نفسي : أنا فعلاً واحد غبي وصفته سبع حبات مضبوطه , سبع حبات تمر.. سبع حبات ترمس... سبع أرضين ..سبع سماوات ..سبع أسقف , سبع أبواب لجهنم , رقم سبعه مهم في الطب النبوي .
وبالنسبة للحبل يعني للنسوان اللي بدهن يحبلن ويجيبن صيصان شو راح أوصفلهن؟.
..زمان كانوا بعض الدجالين –طبعاً وأنا مستحيل أكون منهم – زمان كانوا يمارسوا الجنس معاهن سواء رضين أو رفضن , يعني قبل الطب وتقدمه كانوا يمارسوا معهن الجنس إذا كانوا بعولتهن ما بخلفوش, ومبارح اسمعتلكوا سمعه يا عيني عليها : وحده رايحه على شيخ على شان يطرد الأرواح الشريره منها فأقنعها إنه يجب طردهم بالنجاسه يعني لازم يمارس معاها الجنس والمسكين الشيخ خربط فكرها متزوجه أو والله العليم إنه مخه اندوش من جمال صدرها وعيونها وهي طبعا المسكينه ما كانت في وعيها بس البنت راحت فيها , والشيخ قال كانت مستلذه أثناء العمليه اقصد أثناء الاغتصاب , وهذا على فكره يقلل من عقوبته , الله يعوض عليها ويجبر على أهلها , بس أنا مستحيل أعملها ,صح يا شباب ؟, أكيد صح .
هذول اللي بحبلنش شو بدي أوصفلهن ؟.
شو بدي أوصفلهن ؟ .
والله اليوم العلم تقدم .
مش زي أيام زمان, أيام زمان واحد من قرايبي مزح مزحه مع وحده حلوه اكثير وقلها انه بقدر يعمللها حجاب تحبل بواسطته شريطة أن تضعه في صدرها حتى تحبل , والأموره الحلوه وافقت فأعطاها الحجاب وبعد مضي سنه تقريباً رجعت عليه وجابتله معاها خاروف هديه قلها شو هذا يا حلوه ؟
-هذا أجارك .
-أجاري ؟
-أجار على شو؟
-على الحجاب اللي عملتلي إياه على شان أحبل , وحلفت غير أجيبلك خروف إذا بحبل على إيدك .
-طيب وين الحجاب ؟
-الحجاب بعده في صدري .
- طيب طوليه أشوفه.
وبس طالته فتحه وقرأه ليها وإذا فيه كلام حب وغرام وهيام فيها , يعني كاين أخينا مستحي من المواجهه العاطفيه معاها يعني الرجل مستحي يحكيلها مباشره فكتب لها كلام حب , ووضعته في صدرها , وبس حبلت اعتقدت إنه بسبب الحجاب .
أنا طبعاً قصائدي الشعرية مش قويات لدرجة إنهن يكونن دوى للحبل أنا قصائدي لو أي وحده أخذتها على طول بتروح على السجن بدل الحبل وأبوها وأخوها عُمرهم ما بتوظفوا يعني أشعاري بتجيب المرض مش الدوى إذا أنا نفسي بعاني من أزمات نفسيه بسبب قصائدي وحساسيتي الزائده عن حدها يعني صدقوني أحياناً دموعي بسقطوا بدون سبب ,هذاك هذاك الزلمه شعره كاين فيه معجزه إلهيه , وأنا ما عنديش أي معجزه إليهيه , بس لا زم أفتح عيادة العلاج بالقرآن الكريم .
أنا مثل ما حكيتلكم ازهقت من كلام المرأة والمساواة والكلام الفارغ , والله في بداية حياتي كان في ناس اكثير ينصحوني ويقولولي شو بدك في هذا الكلام والتخبيص إنت واحد مجنون , وبقيت أزعل وأدافع عن نفسي وأقول لالا إنتوا متخلفين فكانوا ينظرولي نظره من فوق لتحت كلها تشير لي بأنني مصاب بالجنون, وفعلاً أنا الآن تأكدت من أنني مصاب بالجنون يعني صار عمري 40 سنه وكمان شويه بختير وبصير ختيار وبعدن بفكر أشتري سياره أو يكون عندي دخل يكفيني حتى ما أشحدش من الناس , صار عمري يا جماعة الخير 40 سنه وبعدني بحلم في شراء لاب توب أو كمبيوتر عادي , صار عندي 40 سنه وأنا بحلم في وطن يحترمني وما يهنيش , بس تيجيني فاتورة الكهرباء بحس بالإهانه , والحكومه الله لا يكثر خيرها بقولي إحنا مش جايين فيه هذا هو لحالها بتهيئله إنه مضطهد.
طيب مش هذي إهانه بس أصحا من النوم وأروح على السوق مشي وما ألقاش سياره أركبها ؟
مش هذه إهانه بس تيجيني فاتورة كهربه وما ألقاش أدفعها ؟
مش هذي إهانه بس ابني يطلب مني لُعبه أشتريها وما ألقاش في جيبتي ثمنها .
مش هذي إهانه .
مش هذي إهانه لما أكون كاتب محترم على الإنتر نت وفي مؤسسة محترمه مثل الحوار المتمدن وبنفس الوقت ما يكونش في بيتي انتر نت ؟
بس طبعاً خلص من هون وطالع رايح أودع الفقر وأودع الحوار المتمدن ما هو أصلاً الحوار المتمدن جايبلي العمى والمصايب أنا لو كنت في مؤسسه أخرى متخلفه كان وضعي بكون أحسن من هيك أما الحوار المتمدن فجابتلي المصايب عشانها مدنيه وتقدميه وجندريه .
ورايح أفتح أكبر عياده في الشرق الأوسط وبعدين بكره بتصير الفضائيات يعملوا معي مقابلات عن الجن والشياطين والعالم الآخر وبصيروا يكتبوا على الشاشه :
اتصل من أي محمول ب 40 قرش الدقيقه .
ومن خارج المملكه ب 60قرش لكل دقيقه , والمسجات بعشرة قروش لكل مسج .
والله العظيم غير أصير غني وأسعاري رخيصه جداً ومنافسه , وطبعاً رايحه اتكون أسعاري رخيصه ومنافسه عارفين ليش ؟ ماهو أنا أصلاً مبتدىء يعني مش معقول من أولها (أول ما شطح نطح) لا أنا رايح أمشي على مهلي ورايح أطلع السلم درجه درجه .
وطبعاً أنا زلمه خياله واسع وهنالك احتمال أنني مفصوم عقلياً , ورايح أستثمر هذا الفصام رايح أحكي قصص غريبه عن ذهابي ورحلتي على ظهر مخلوق عجيب إلى عالم غريب يعني رايحه تكون قصصي حلوه ومسليه أحسن من قصة اسراء ومعراج أبو العلاء المعري !.
أنا قلت أبو العلاء المعري ما قلت عن حدى ثاني , رايح أحكي عن عوالم غريبه ومخلوقات غريبه , وقصص ودواوين من الآخر .
وبعدين رايح أكون زي كل الشيوخ رايحه تكون لحيتي طويله وحجتي قويه إللي بشفا على إيدي رايح أحكيله إنه هذا قوة مني , مش أي واحد طبعاً بقدر يتحكم بعالم الجن والشياطين , أنا بس عندي هذي القدره , واللي مش راح يشفى فوراً راح أحكيله إنه (لله الأمرُ من قبلُ ومن بعدُ ) والعبد في التفكير والرب في التدبير وكله على الله , يعني هي المسأله مش بالشطاره وإنما بالتوكل على الله , والنعم بالله.
بس لما حدى بطيب على إيدي أكيد إنه الفضل لله ولي , وبهيك حالي راح أكون شريك للخالق غير مباشر, واليعاذوا بالله مش تفهموني يا جماعة الخير غلط , أنا والله بدي أعيش حياه كريمه وقصدي شريف , بدي أركب سياره زي العالم والناس زي أي واحد بالبلد , وبدي حياه كريمه , بدي أولادي يلبسوا ويلعبوا ويشتروا ويركبوا في راس السنه مراجيح وبدي يكون عندي في داري لاب توب .
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
