قصيدة (( القريَة والطًّنطلْ ))

حمودي خزعل المقدادي

الحوار المتمدن-العدد: 2822 - 2009 / 11 / 7 - 11:42
المحور: الادب والفن
    

جنّه ازغار ...
وبقرية إسمهَه قرية النّهرين ... عالنًهرين تدلَّلْ .
جنّه آزغار ...
نسمع قصّة الدِيوات والآفاتْ والطّنْطَلْ .
نِشدّ آرواحْنَه وعْيونّه آبحَلك العَجايز ...
والحَجي وِشْلون يِسَّلْسَلْ .
وِنْبَاوَعْ وَرانَه بْخوُفْ ... من الخوف نِتْمَلْمَلْ .
لأنْ نِعرُف عن الطّنْطَلْ ...
يصير آشمَايريد إيْصير يِتْحَوَّلْ .
جَلبْ .. بَزّون .. لو خنزير.. لوعِفريت بِجتاف السِّمَه ...
من فوك يِدَّنْـدَلْ .
وْعَلَى غفلة يجينَه النّوم والاجفان تِتْقَفَّلْ .
ومِن آنَّام أُمْنه تخلي جوّه راسْنَه السَّجينْ .
لو مِنْجَلْ .
تكول إيخاف مِنّه وْما يجي الطّنْطَلْ .
وِبْوَكْتِ الفَجر بالصَّيف ...
نِصحَه وتِصحَه قَريَتنه ...
عَلَى النَّهرين تِتمنْدَلْ .
تِضوي بلا شَمِس والزْيج مِتْهدَّلْ .
رِمِشها بْطول سَعفات النْخل وَآطْوَلْ .
ومِن لون العِنبْ متخضّب آمكحََّلْ .
كِصايِبْها الشُّكُر ويّانه تركُص ركصة السّنبلْ .
وِحنّه آزغار ..
نِلعَب لعبة الدّعْـبُلْ .
مَيْهِمْنَه شِيْصير آبهايْ ..
هاي الدّنيه مانِسأًلْ .
إحنَه أزْغارْ ...
وِلْنَه الصّافي المعَسَّلْ .
***********
وِجانَه يومْ ...
شفنَه النّاس بالقرية ...
طبعْها مومِثل كل يوم .. مِتْبَدِلْ .
زِلم تركُض ... زِلم بِهدايْ دَتْهَروِلْ .
زِلم شِيّابْ ...
مِن ضيك النِّفَسْ تِكزِلْ .
والنِسّوان مِنّ الخوف تِتْخَتّلْ .
وِجْلاَب السَلَّفْ تعّوِي ...
وِلبْزازين عَآلحِيطان تِطّافَرْ ...
وِعيْاط الجهالِ عْلى آلثَّدي إدَّوِّر ...
فلابطَّلْ .
ركضْنَه وْيَ الزِّلم ونصيحْ منّ الخوفْ ...
وِلكُمْ ياوِلِدْ يمكِن إجَه الطّنْطَلْ .
وِصَلْنَه هْناك ...
يَمْ صَدْرِ النَّهر شِفْنَه ...
الزِّلمْ لَمّات مِتْرَبْعِين عْ آلثَّيِلْ .
وَعَلى آلسَّدة وكف واحِد ...
تِحرسَه جَلاب مَسْعُورة وألفْ طّنْطَلْ .
يِلَوِّحْ بالعَصَا وِيكوُل :
تِذَّكْرُونْ إسمي زينْ ...
آنَه آللي تسمُّوني كبُل صَبـَّار المخبَّلْ .
وِالمْنَغَّـلْ .
إجيت اليومْ وآنَه آلشّيخِ المِعَدَّل .
وَحَذركمْ اذا ازعلْ .
تراني إنكلبْ طّنْطَلْ .
إلِيَّ الكاعْ ... كلّ الكاعْ ...
وِأْلكُم بَسْ خُمْس من الزَّرع ...
والمْايريد الحُصَّة خَلْ يرْحَلْ .
وأذكرّكم إذا أَزْعَلْ .
تراني إنكلبْ طّنْطَلْ .
طِلعْ من بينْ لَمْاتْ الزِلمْ َعَبُّود .
شاعِر كيوِلي وْمنبوذ وِمْسَحْسَلْ .
وِكَفْ وِيكولْ :
ياصَـبَّار إنْتَه الخير ...
وِآنتَّه مْنِ العَدِلْ .. أعْـدَلْ .
هَلَه ومِيَّة هَلَه بمَلْكاكْ ...
إحْنَه ويَّاك ... يلي من العَقِلْ .. أعْقَّـلْ .
طَلَع من بين موجات الزّلم .. شاعِرْ .
تعرفَه زين قَرْيَتْنَه ... يحبْهَه وبِيهَه يِتـْغَزَّلْ .
قَصايدْ ينثُر الكيعَان ...
مِثل وْرُود ماتِذْبـَلْ .
نعُرفهْ زينْ هُـوَّ الشّاعِرْ الفَيْصَـلْ .
ضِربْ عَالْكاعْ بعْكالَه وْصِرَخ :
وَالله مآخَلّيه فوك آلراس وَتْعَكَّـلْ .
وِلَكْ عَبّـود ...
يَلْمَا تِسْتِحي وْتخْجَـلْ .
مِن يَمْتَه ال فُكًدْْ عَقْله يصير مْن العَقل أعْقَـلْ ؟!.
مِن يَمْتَه ال فُكًدْْ أصْلَه يصير وبينَه يتأصَّلْ ؟!.
لاَ والله ... مانِقْبَـلْ .
أبـد مانعوف هاي الكاعْ .
لوكِلّ السِّـلَف والنَّـاس تِـتكَتَّلْ .
سِمَعْ صَبـَّار وتخَبَّلْ .
غضّب وآنتفخت عيونَه وْعَليه أشَّـرْ .
وِهِي لَحْظَـاتْ من لَمْح البَصَر .. أقْصَرْ .
شِفْنَه الشاعِرْ الفَيْصَلْ .
تِنْهشَه جلابْ صَبـَّار وْتكَطعَه وْصَـلْ .
ضِحكْ صَبـَّار ضِحكاتْ الشِماتَه وْكالْ:
كِلْتلْكُم أَحذّرْكُم إذا ازْعَلْ ...
تراني إنكلبْ طّنْطَلْ .
************
رِجعْنَه والزِّلمْ وعيونْها آلتِهمِـلْ .
مَشْدوهين ...
محتـارِينْ ...
مايدرون ...
شِـيْسَّـوُّونْ ...
واحِدهُم يِكلّ لِلاخْ ...
باللّه شْلون وِشنِفْعَـلْ .
حزنْ خَـيَّم على القرية ...
نَخَلهَا والزَّرع حَنْظَلْ .
حتَّه الطّير تَـيّّهْ عِشَّه مايِنْـدَلْ .
لاِكعْدات نصّ اللّيل ...
مَمْنُوع المَشِي محذور نتجَوَّلْ .
بَعَدْ بَسْكوُت وِمْشَاوَرْ سِوالِفْنَه ...
ولانِذْكُر إسِمْ طّنْطَلْ .
هِفَتْ كانُون دِيوان السّلف ياحيف ...
وِدْلالَه آنْجِفَتْ وِتكْسَّر الفِنجان المْهَيّلْ .
بَسْ الرِيّحْ ...
نِسْمَعْها تِغَنّي بْشُوكْ ...
أغاني الشاعِر الفَيْصَلْ .
عِتَابه وْدارْمي وزْهيري ومذَيـَّلْ .
وِحْـنَه آزْغار ...
جنَّـه انصيحْ ...
ويْ الرّيـحْ ...
يانَهْرينْ ...
يانَهْرَينْ ...
مُوكافي بَعَدْ صَيْهُـودْ ...
مانحِْـملْ .

#حمودي_خزعل_المقدادي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات