غروب الجميل ابو شبع

جواد القابجي

الحوار المتمدن-العدد: 2579 - 2009 / 3 / 8 - 02:23
المحور: الادب والفن
    

للشاعر جميل أبو شبع

طوينه اسنينّه او صفّينه الايام
اوليل اللي يمر مو ليل خمره
بعد لا كاس عدنه او لحن انغام
***************** ولا نكَعد نسامر ضوه الكَمره
طوينه العمر وسنينه الطويله
وجزه ذاك السمر وملاطف العود
اشما طالت ليالينه الجميله
بعد هيهات ترجع زاهيه اردود
وسهرات المنى النفس العليله
وبالكاسات أيادي المكرمه اتجود
لطيفه اهواي ياكَعدات الاكرام
أبد ما ينِّسه محضر العشره
تسري انغامنه اشماتسري الانسام
***************** اوجميل الصوت يتحف أشجه نبره
جزينه اوجزت كل ذيج الليالي
اوجزه اوياها ركب اطيب الاحباب
آه يالذّة ايام الخوالي
اوياذاكَ هوانه الحلو الجذاب
ياكاساتنه اتشع او تلالي
وياجلمة هله اونغمة الترحاب
صرت مثل اللي متعلم اومعتام
والدنيه على المامش تجبره
اليعيش ابتالي عمره على الاوهام
***************** مينفعه الونين او جَذب حسره
صوت الناي ذاك الجان يسحر
بعد مابي نغم نشوان يطرب
او لحن ذيج المواويل المؤثر
راحت ويَّ نغمات التعتّب
اشما ارتب احروفي اشما اسطّر
ميكفِّي الشعر ماردت اكتب
الدنيه شاهده مو خطّة اقلام
القلم ينِّسِخ والايام شفره
آنه ابيقضتي يولا بالاحلام
**************** كَبل شو دنيتي ورديه حمره
كَضيت اسنين مابين اليحبون
حب اهل الهوه لهل الملاحه
احضنت ذيج الربع حضنة المفتون
احضنت شعر اللسان ابكل فصاحه
من انفوسها الطيب ويعنون
يبدلون الظلام بضي صباحه
اوجوه اتكَول كل واحد بدر تام
شباب اخدودها قدّاح سمره
شعرها تكَول هذا ريش نعّام
**************** وشفاف البنات البيه حُمره
خطينه على اعتابج يخمسين
وإجه وكت المشيب اوكَرّب الدور
اوصارت ذكرياتي ذيج السنين
والكَاع الزهيّه مملِحه او بور
ادري بيج يا دنيه اشتعزفين
لحنات الحزن تتعب الصنطور
اعزفي لحن للمتعوب مادام
صار اليستمعلج تالي عمره
مثل اللي سكنله قصر من جام
**************** حجر طايش يجي القصره اويكسره
رف كَلبي عليه ارفيف ملهوف
على كل الاحباب الجانت اوياي
جنت وياها روح ابروح مديوف
مثل الكَاع ويَّه دهلة الماي
هيَّ احساسي هيَّ السمع والشوف
ويشاهد صحبتي الراح والجاي
بالحب والمودّه رافعه اعلام
وصال اوشرف علجبهات تقره
تشوفك من بعد تبسم لكَدّام
*************** تره الدنيه بعدهم حيل مُرّه
(*) جميل ابوشبع : ابو نبيل ابن الشاعر الكبير المرحوم ( الشيخ إبراهيم ابو شبع )
وأخ الشاعر الشهيد شهيد ابوشبع وإبن عم الشهيد الشاعر ( الشيخ عبد الحسين ابوشبع ) الذي دُس له السم بواسطة مدير أمن النجف - جاسم الخلف - في عهد البعثفاشست المجرمين .

#جواد_القابجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات