تنور المحبة

جبار عودة الخطاط

الحوار المتمدن-العدد: 2533 - 2009 / 1 / 21 - 09:39
المحور: الادب والفن
    

يبقى تنور امي هو الكوة السحرية التي استنشق من خلالها عبير الجنة

جبار عودة الخطاط

جانت امي
توكد بتنورنه الطين اللذيذ
وجانت الدالوجه ( 1 )
بيد امي تصير
مثل شمس انعجنت
بأ طيب نبيذ

***

وجانت الكرصه ( 2 )
بالتنور ريحتهه عجيبه
وجنّه من ناكل الكرصه
مثل عاشك
يحتضن بيده حبيبه

***

وجانت الكرصه
بيد امي عريضه
جانت ادولج كلبهه
تحطه بالتنور
حته يصير النه مكسب
وحنـّايه بيضه ( 3 )

***

جانت امي
تكتب بتنورنه
احلى قصايد
واحنه نقراهه ابطنـّه
وجنه من نلتم على
الصينيه كلنه
جنه نشبع
كبل مانهضم اكلنه

وجنه نضحك
حته من نجوع نضحك
وجنه نلعب
وابد ميزعل لعبنه
جنـّه
جنـّه ( بالجيم المعجمه )

***

ياوحشتك كبره
ياتنورنه الطيني العجيب
يارمادك
بلسم انشمه ونطيب
ريحتك جانت الجنه
راحت ايامك
يتنور المحنـّه
وتبقه انت
مشتعل
تزهي بعيوني
وصرت
كلما مره اشوفن
بالدرب تنور طيني
اتذكر بشوغه خبز امي
وينا غيني حنيني
ليوم جانت
توكد بتنورنه
الطيني اللذيذ
وجانت الدالوجه
بيد امي تصير
مثل شمس انعجنت
باطيب نبيذ
الله ياتنورنه الطيني
اللذيذ ..
اللذيذ

( 1 ) الدالوجة قطعة العجين قبل ان تتحول الى رغيف خبز
( 2 ) الكرصه رغيف الخبز بعد نضوجه بالتنور
( 3 ) الحنـّايه رغيف خبز صغير تعده الامهات للصغار

بغداد 2006

#جبار_عودة_الخطاط (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات