سليمان الزهيرى
الحوار المتمدن-العدد: 2409 - 2008 / 9 / 19 - 05:53
المحور:
الادب والفن
ما تسألنيش
لإنى يا مصرى أنا زيك ماأناش لاقى ولا إجابه
بدور فى محيط
وكوم الشك جوايا يفصل م المرار غابه
أقول يا عم أهيه ماشيه
ألاقى الفقر شخشخلي
نقول هنبيع ....ندّور ع اللي هنبيعه
نلاقى هاندباج سودا وفيها كام غيار داخلى
لزوم الستر بالسنتى
لناس على ضهر قلابه
ماتسألنيش
لإنى ف آخر الحسبه بقيت مديون
طلعت ف آخر المولد بلاحمص ولا بونبون
ودمعى صدا فى عنيه عشان مركون
دموع فاسده ..
ولما الدمع راح يفسد هتبقى همومنا كدابه
أقوم أشهد على نفسى شهادة زور
وألوم نفسى تقول نفسى حياله أنا عبدللمأمور
ماتحسبها من الأول ... فنتحاسب
يروح دمعى اللى فى عيونى قوام ماضى إنصراف وحضور
جنيه فضه وع الوشين ملك واقف على كتابه
ما تسألنيش
لإن ظروفنا بالمنقاش
وساعة الضى جوانا يدوب تتعاش
نروح ف أبونكله وأبو نكله يروح ف بلاش
لإن الحراميه كتار ولا أنا ولا إنت
على بابا....
ما تسألنيش
#سليمان_الزهيرى (هاشتاغ)
كيف تدعم-ين الحوار المتمدن واليسار والعلمانية
على الانترنت؟