جمان حلاّوي
الحوار المتمدن-العدد: 2332 - 2008 / 7 / 4 - 09:20
المحور:
الادب والفن
شخصيات المسرحية:
راكب 1 , راكب 2 , راكب3(في الستين من العمر) , راكب 4 ,
راكب5 , راكب 6 , راكب 7 , راكب 8 , السائق , السكند ,
المرأة , الزوج , زوجة الراكب 4
السلاّبة : ملثم 1 ( يقوم بالدور راكب 1)
ملثم 2 ( يقوم بالدور راكب 2)
الديكــــــــــــــــــــور:
خشبة المسرح عبارة عن باص
الراكب7 راكب6 راكب3 راكب2
الراكب8 راكب5 راكب4 راكب1 السائق
الوقـــــــــــــــــــت : ليـــلا"
يدخل (طلال) المسرح
( طلال) إلى الجمهور قبل بدء المسرحية: السلام عليكم ..هذه القصة حدثت ابان الدكتاتورية
قبل السقوط , فأردنا التنويه .. مع الشكر الجزيل
للحضور الكريم ..
( يخرج طلال , يدخل السكند )
السكــند ( خارج الباص ): راس الحواش .. راس الحواش عالمكبرة
راكب8 (خارج الباص): انه مامرتاح " محمد "
راكب7( خارج الباص): الحياة كلهه تعب , ماكو شي يجي بالسهل .
راكب8(خارج الباص) : حاط كل اللي عندي بس أنهي الموضوع.
راكب7( خارج الباص): اسمع " طلال " هاي المرة المية تفتح وياي الموضوع,
ويمكن حاجيهه لغيري الف مرّة , وهذا مو صحيح لاتكون
ضعيف . انت واعي , صمم وتوكّل ..
راكب8( خارج الباص): الشغلة مو سهلة !
( يصعد راكب2 , راكب5 ويأخذان محلهما )
راكب1(خارج الباص وهو يحمل كيسا" مخاطبا" السكند):الباص فارغ, يمته تطلعون ؟
السكند : بس تنترس , ( مخاطبا الواقفين ) صعدوا حتى تقبّط ونطلع !
راكب1( وهو يصعد الباص) : ياألله يمعوّد مابقه وكت , الساعة قريب التسعة بالليل!
السكـند : والله خبصتنه , عمّي أكعد !
راكب1: شدعوة عليك مزاجك برتقالي !!
السكنـد: العفو عمّي .. تفضل استريح !!
(يجلس راكب1 )
( السكنـد خارج الباص ) يلّله راس الحواش عالمكبرة .. طالعين
راكب4( خارج البص متلفتا") : هذه العميل الكلب ماأدري وين فلت مني ! أطيحة, أطيحة
وين يروح . خل أروح أرتاح اليوم وباجر سهلة !!
( مخاطبا" السكنـد ) راس الحواش مو ؟
السكنـد : أي عمي عالمكبرة
راكب4: منّاك تسليب !!
السكنـد: توكل على الله عمي , الليل بعده بأوّله
( يصعد راكب4 ويأخذ محله )
السكند( مخاطبا" من صعد ) : النفر بربع , موتكولون بعدين شدعوه!!
راكب1: يامعوّد ربع .. ربع بس أطلع
( يفتح كيسه ويتفحص مابداخله , ويتشممه بتلذذ )
السكند( خارج الباص) : ياألله طالعين.. راس الحواش عالمكبرة
( يصعد راكب6 ويأخذ محلّه)
( يقترب راكب3 مهموما" في الخمسين من عمره)
راكب 7( خارج الباص) : ياألله نصعد , لاتهتم كل شي يهون بس فكر زين وأتخذ قرار
راكب8 ( خارج الباص) : أف , بعد ماأتحمل .. جاي أكرط بالفلوس
( يصعد راكب7 و راكب8 )
( راكب3 خارج الباص يغمغم مع نفسه ويتلفت مرتبكا")
السكنـد ( مخاطبا" راكب3) : عمّي أنت رايح لراس الحواش ؟
راكب3( منتبها") : ها؟ أي, أي عمي!!
السكنـد : مو عالمستشفى عمّي .. عالمكبرة
راكب3 : مايهم حتى لو على جهنّم الحمرة !
السكنـد: لعد اصعد خل نطلع
راكب3 ( يصعد ويأخذ مكانه ) : السلام عليكم
الركاب : وعليكم السلام
المرأه ( وهي راكضة نحو الباص ) : الله يخليك الدنية ليل , أخذني وياك
( تصعد المرأة الباص . لايوجد لها كرسي , تبقى واقفة )
راكب1( محتضنا" كيسه) ياألله يمعوّد قبّط الباص , طلابة هيّ ؟!
السائق ( وهو يصعد ) : على كيفك عيني
راكب1 : مو صار لنه ساعة كاعدين , ما تكلي يمته نوصل؟!
راكب5 : نوصل .. نوصل , أخوية اذكر الله .. كول توكلنا على الله
راكب1 : انت منو يمك , حاطين الله بكل شي !!
راكب5 : استغفر الله وأتوب اليه
( يجلس السائق خلف المقود , يصعد السكنـد)
السائق ( ملتفتا" ) : تره الكروة ربع ..
راكب6 : بويه هيّ مو مية وخمسين , شنو صاير اليوم ؟
السائـق : المايعجبه يكوم ينزل كبل ما نطلع !
راكب2: اخوان خلّوه يطلع , هسّه الميّة الهه قيمة . بس خل نوصل لبيوتنه , الدنية ليل
( مع نفسه) هيّ باقيه على هاي , التسليب وين مانروح !
راكب1 : أطلع دخيل الله , ترة تأخرنة . ما تكلّي شتنتظر . الباص قبّط !
السائـق : أدوّر السويج , ماأدري وين خلّيته , ها ه هوّينه !!
( صوت هدير المحرك , ايحاء بتحرك الباص )
السائق ( للمرأة الواقفة ) : شوفيلج مكان وكعدي , لاتظلين واكفة أخاف عليج توكعين ..
أخوان تراصفوا شوية وسووا لهه مكان تكعد , خو مو ملكتوا الباص!
راكب5 ( يقف) : تعاي خويه كعدي مكاني , مايصير توكفين وانت حرمة .
المرأة : لا , الوكفة تحلالي . تعبت من الكعدة , أوي ركبّاتي تأذيني من الكعدة طول اليوم
( تقوم المرأة بحركات من يديها على فخذيها وعجزها تثير الانتباه )
السكنـد ( للراكب1 ) : ربع عمّي ..
صوت خارجي : ترافه .. وليل .. ودك ريحان ..
يسمر لآ تواخذنه
يلن كل دكّه من حسنك ..
شتل ريحان للجنّة
السكنـد ( للراكب5 ) : الكروة
صوت خارجي : ليالــي ..
ودك نحر حدّار
وحنه الشوك ناحرنه
( السكنـد مع الراكب6 )
صوت خارجي( مستمرا") : من أشوفك ..
أنذر النجمات ترجيّه لسوالفنه
ووديلك هوى شكابين
وتردنـي بطـرك ونّه !!
(السكند مع الراكب2 , يتكوّر راكب 3 على نفسه)
السكنـد ( للراكب3 ) : الكروه عمّي
( راكب3 يتلعثم ويبحث في جيوبه)
السكنـد( مؤكدا" ) : عمّي الكروه !
راكب3 : ماعندي غير مية وخمسين
السكنـد ( للسائق ) : وكّف الباص , وكّف .. شكلناهه!
السائق ( صارخا" ) : شكو , شبيك ؟!!
السكنـد : ما يقبلون يدفعون ربع !
راكب3 ( للسكنـد) : ابني على كيفك , كلت لك ماعني غير المية والخمسين , ما كلتلك
ماأنطي . احترم شيباتي أبني الله يخليك ..
( يوقف السائق الباص ويترجّل )
السائق : مو كلنة ربع كبل مانطلع من الكراج ؟
راكب3 : عمّي والله .. سايقنه , الله يخلّيك , آنه ماكلت ...........
راكب3 ( محتدا") : هيّ الكروه مو مية وخمسين , صار لنه قرن ندفعهه . ليش زودتهه
اليوم ؟
راكب6 : بويه حرام عليكم تستغلون الناس ..
( يخرج السائق هراوة من تحت كرسيه)
السائـق : كلت لكم ربع , والمايعجبه يكوم ينزل !
راكب7 : رجّعنة للكراج !
السائـق : شنو عندي تكسي ؟ وآنه اشتغل بكيفكم . ياألله المايعجبة يتفضل ينزل
آنه هم هيجي كروة تعبانة بالليل ماأريدهه
راكب3 ( للسائق ) : عمي الله يخليك لاتحرجني كدّام الناس , مو ماأريد أدفع , بس ماعندي . والله . ما جنت اتصور الكروة أزدادت !
السائـق : لعد شنزّلك للسوك اذا ماعندك فلوس ؟
( يضم راكب3 وجهه بكفيه)
صوت خارجي : فرشت شليلي بدروبك
أبيع العشك للدنيه
هضيمة تحنّن الشامت عليّ
وتشتمت بيّه
( راكب 3 يبكي )
راكب7 : شنو تهددنه بتوثيتك , مو عيب؟ انت على باب الله وهذا رزقك والطريق بيه
هوايه ناس وأشكال حالات ومشاكل , ولازم تتحمل وتداري عيشتك ..
السـائق : وانت شنو يابه شقي راس الحواش ؟!
راكب5 : اخوان ذكروا الله خل نوصل لبيوتنه سلامات
( للسائـق ) اذا ماعندة سامحه , شنو انكلبت الدنية ؟!
السائـق : أي انكلبت . منين آخذ كروتي مال الرجعة , ماألكة ولا واحد بالليل هناك !
راكب6 : وحنه شنو علاقتنه . بويه ليش تاخذ أكثر من رزقك ؟
راكب 1 : هاي شلون طلابة , شيفضهه عليّ هالليله الكشرة !!
راكب5 : ذكروا الله يمعودين
( تحتك يده وهو يتكلم بجسد المرأة الواقفة دون قصد )
المرأة : أوي , أدب سز .. ماتستحي ؟
راكب5 : العفو يمّه . استغفر الله , موقصدي !!
المرأة : شنو يمّه ؟ هازّة كاروكك آنة ؟
( بغنج ) بعدني حْديثة !!
راكب6 : إنّا لله وإنّا اليه راجعون !!
راكب1 ( للسائق ) : اطلع سايقنة , اطلع يمعوّد ترة تأخرنة .. الله أكبر
( يفتح كيسه ويتشمم ما بداخله )
السائـق : والله ثبرتنه , خل نشوف شنو قصة المره .. خطيّه
راكب6 : بويه ماكو شي , سوء فهم .
المرأة ( للراكب6 ) : وانت منو حطّك محامي , هذا تحارش بيّ !!
راكب5 : آنه أتحارش ؟ استغفر الله .. طخّت ايدي بدون قصد ..
ليش ماتكعدين . مو كتلج تعاي كعدي مكاني كبل شويّه ؟
المرأة : ليش انت الوحيد كلي كعدي مكاني مو غيرك ؟ جنت حاط عينك عليّ من أول
ماتستحي مو عيب عليك شفتني حرمه بّحدني بهالليل , بس آنه بشارب السايق
هوّ يحميني !!
السائق ( للسكند ) : ولك جيب التخته من وره وكعّدهه يمّي , صارت بشاربي !!
( يأتي السكند بمقعد , تجلس المرأة جنب السائق )
السائـق : وأخذ من الرجال ميّة وخمسين .. خطيّة ماعنده !
راكب3 ( بأدب ) : عمّي ليش تكلّي " خطيّه " . " الموت أهون من خطيّة " ..
الوكت خلاّني هالشكل , لاتكلّي " خطيّه" أرجوك ..
راكب8 : ياألله سايقنه توكّل , ترة تأخرنة ..
( ايحاء بتحرك الباص , يجمع السكند الكروه )
راكب2 ( لراكب3 ) : هذا حجيك الفصحى إلمن ؟
راكب3( بتذمّر ) : للسيّاب .. بدر شاكر السيّاب إذا سامع بيه ..
راكب2 : إي اظن سامع هيجي اسم !!
راكب3 : شاعر مهموم .. من جان عايش جانت الدنية كلهه تعرفه .. أكله السرطان بالنهاية .
ومن مات ماشال جنازته غير اربع حماميل
راكب2 : الظاهر عليك مثقف !
راكب3 ( بسخرية) : مثقّف ؟ هاي أعتبرهه إهانة.
انت هم تريد تضحّك الناس عليّ مثل ماسوّه السايق كبل شويّه ..
لكن حقّه من يحجي رجّال شطولني ماكو بجيبي غير ميّة وخمسين !!
انكضه اليوم بالبهذله , باجر شلون , شراح أوكّل عائلتي وجهال أخوي
اليتامى
راكب2 : ليش عمّي الثقافة وسام . ياريت كلنا كمّلنه مدرسة وعرفنه نقرأ شعر , أو على
الاقل جرايد . تره الفلوس مو كل شي ..
راكب3 : ابني الدنية ناعور جبير, تغرف كيلاتهه الماي وهيّ ممتليه و مزهوّة , تتصور
الدنيه لها و وتطلع منتعشة بالماي اللي تحمله .. هذا الخير الجبير ..
لكن من توصل فوك تذب كل الماي اللي عدهه غصبا" ما عليها .. يكلبها الزمن
فوك حدر وتذب كل اللي عدها , وتاليهه تنزل الكيله فارغة خاوية يغمرها الماي
راكب2 : ماجاي افتهم ! عمّي والله شدهتني تدري ! انت شنو شغلك ؟
راكب3 : الصبح معلّم أربّي أجيال .. والعصر حاط بسطيّة ابيع جواريب وفانيلات , وكل
ساعة مداهمتنة الشرطة وماخذه بسطياتنه عبالك احنه حراميه ومجرمين مو ناس
تريد تعيش على باب الله ..
وعلى ماتطلع بسطيتك من الشرطة تذب كل اللي حصّلته .. الحياة صارت تسليب .
راكب2 : ايه .. الله يكون بعونك , من رخصتك .
( للسائق ) عيني سايقنه نازل بالمفرق .
السائـق : صار عيوني
( ينزل راكب2 من الباص )
راكب8 ( لراكب7) : اسمي بالمنع ماتشوفني ضايج
راكب7 : شلون عرفت ؟
راكب8 : سألت جماعة عندهم عرف بالحاسبة !
راكب7 : أخويه كلاوات , يريدون فلوس !!
راكب8 : نسيت آنه مهندس ..؟
( مع نفسه ) خرب روح ابو الشهادة واللي نطانياها !!
راكب7 : لوما الشهادة جان مافكرت هالشكل وما قررت تطلع اصلا"
راكب8 : أيه يمعوّد ؟ لو عايش بهيمه جان محد يكلّي وين رايح ولا الامن لو جيش القدس
يركض وراك !!
( يضع السائق يده على فخذ المرأة , تطلق المرأه صوتا" كالمواء )
السائق : شالقضية , عيني شنو سوّينه !!
المرأة : شش , على كيفك موهالشكل !
السائق : مو فرفحت روحي ياعيني , حتى ماكمت اشوف دربي !
راكب6 ( للسائق ) : بويه زلم كاعده , شنو جاي تسوّي .. سايقنه ش جاي تسوّي ؟!
السائق ( منتبها" ) : شالقضيه .. منو اللي حجه ؟
راكب6 : بويه أكول لو تأجّلها لمّن ماتوصّلنه مو أستر ؟!
السائـق : عجيب , انت ش عليك ؟ّ!
راكب6 : أكول ناس كاعده !!
السائـق : والله خوش يعني ملكتني بالربع مالك . أخي سيارتي وبكيفي !!
المرأة : عيب عليكم , مو كلكم زلم مشوربه تحجون على حرمه هالشكل !
راكب6 : العفو , إي مو هذا مكان فارغ كومي كعدي , ليش مضايقه نفسج ومضايقة السايق ,
خليّه يشوف دربه !!
راكب5 : إنّا لله وإنّا اليه راجعون , أستغفر الله
راكب1 : والله ثبرونه ذول . هسّه السايق يوكّف السياره ويبقه يتلاغه . هسّه انتو شعليكم
( يتشمم مافي الكيس )
راكب7 ( لراكب8 ) : سوّي جواز " كاسب "
راكب8 : طلبوا علي مليونين دينار , والشغله مو أكيده ، بيها محاذير !
راكب7 : اخوي " طلال " اللي يريد يطلع لازم يجازف , ما كو شي يجي بالسهل !
راكب4 ( لراكب 7,8) : شجاي تحجون أكو واحد يعوف بلده هالوكت , وبلده محتاج له؟
راكب7 : اخي انت منو يمّك ؟!
راكب4 : شنو منو يمّي , صوتكم واصل لذاك الصوب !!
راكب6 ( بحسرة ) : أستغفر الله .. أستغفر الله . .
راكب5 : سلامات ماكوشي ؟
راكب6 : بويه مو يمّك الشغله ..
راكب 5 : الله يساعدك
راكب6 : أبره .. شنو هيّ الابرة جانت مذبّله ..صار لي افتر عليها من فجر الله وما خلّيت
صيدلية .. وصفولي بسوك الدلاّلات , وصدك لكيتها عند وحده يمكن هسّه توهه
طالعة من جوّه هايشتهه !! بس شاطره حجت وياي عبالك دكتوره .. كلّه انكليزي
بس آنه شكّيت بالاكسباير
راكب5 : جان أشتريتها وفضيت القضية ؟
راكب6 : مامتأكد من الاكسباير وسعرها غالي كلّش .. وهسّه المره تلوب بالبيت ماأدري
شسوّي ؟ الالم ماينحمل بويه .. ايه الحياة صارت تسليب تتهرب الادوية لذنّي
الدلاّلات يبيعنّهه بخمس أ ضعاف السعر اذا مو أكثر وأغلبه أكسباير!!
راكب1 ( للسائق ) : نازل عندك , خل الحك اتزقنب ال بيدي ( مؤشرا" على الكيس )
السائـق : هاي صار لك ساعة تصيّح على مود تلحك على الكعدة !!
راكب1 : يمعوّد صارت الساعة بالعشرة .. هسّة الكه المرة نايمه, منو يسويلي المزّة ..
والعشه ؟!
السائـق : الله يساعدهه.. أقصد الله يساعدك , إي والله حكّك !
راكب1 : شسّوي , حتى ندوّخ هالجمجمة ونّام . شيخلّص العمر .. هوّ كلب لو جينكوّه !!
( ايحاء بتوقف الباص )
السائـق : تفضّل , اذكرنة بالكعده بالله !
( ينزل راكب1 )
صوت خارجي : يكلّي معبّر الطبكه,
عشكنه نياحه .. ياسمره ؟!
يلمعبّر .. دصد عينك ,
لجعــة العيــن ماتبــره
تأمّل بينه .. ياحبيّب
رصعة الحنج فيْ كمره
راكب8 ( لراكب7 ): موكتلك وطّي صوتك , هذا كلام ممنوع نحجي بيه ..
راكب7 : يابه ديْ يللّه !!
راكب8 : آخ منك " محمد" دومك متطرّف
راكب7 : شنو هالكلام " طلال " واحد صعلوك دخل بيناتنه ( مؤشرا" على راكب4)
واحد من ذوله السلاّبه اللي عايشين على كسران الركبه ..
راكب8 : وطّي صوتك الله يخلّيك !!
راكب4 : اخوان هذا بلدنه , اذا ماندافع عنّه لعد منو يدافع عنّه ؟
راكب7 : منو كال لأ , ثم انت منو حتى تدخل بنصنه كل ساع ؟
راكب4 : اذا انتو الشهادات تطلعون لعد منو يبقه ؟ ثانيا" ش راح يسوّي لك الخارج ؟
تعيش مبهذل وتاليهه تضطر ترتمي بأ حضان الخونه والموساد !!
راكب 8 : أف " محمد" لاتناقشه أرجوك ..
راكب 7( مستمرا") : اسكت " طلال" , ( لراكب4 ) يعني كل اللي طلعوا خونه؟ انت
تدري منو اللي طلع ؟ كلهم الشهادات والمثقفين اللي ماأحترمهم البلد !
أخي الي طلعوا رفعوا راس البلد تدري لو لا.. ماطلعوا لأنهم يكرهون
البلد , بالعكس ..
راكب4 : يعني واذا بقينه هنا , واذا عشنة أزمات وحروب هوّ إحنه خالقيهه لو مفروضه
علينه ..
راكب7 : شو صارت سياسه .. دور وجهك وخلينه نوصل سلامات . مالنه خلك طلايب بهالليل
راكب8 : على كيفك " محمد".. ( لراكب4 ) العفو أخي هموم وجاي آناقشهه بيناتنه , لاتتدخّل
أرجوك ..
صوت خارجي : نسيــت الروح يايمّــه
بطبكة الترف والزهره
شدهني وتلههمن أيدي
وعكدهه بطارف الغتره
أموتن وانت كلّيــــله
تظل رويحتي بســـتره
( تدخل زوجة " راكب4 " من مكان ما غير باب الباص)
الزوجة( تخاطب راكب4 ) : حرام عليك .. حرام ..
راكب4 : ولج شلون نعيش على كل راس آخذ خمس وعشرين الف ، ثانيا" آنه مو كاعد
أخدم الوطن !!
الزوجة ( باكية) : حتى اخوي ماسلم منك ... ليش ,جاوبني : ليش ياظالم ؟
راكب4 : أخوج مو وطني !!
راكب5 : آخ حجايه جبيره!
راكب6 : بويه خل نفتهم شنو القصه ..
الزوجة : ولك مو هذا أخوي ! ماعندك رحمه .. نسيت من ردنه نتزوج وكلتله ماعندي ,
باع نص غراضه حتى نتزوج , ولبسني ذهب مرته ..شافك فقير,
راكب4 ( بتردد) : ساعدهم !!
الزوجة : ياهمّه , وشلون عرفت؟ رجّال رايح بدربه وجاي بدربه شنو علاقته ؟ نسيت
بطولاته ؟ مو تصوّب مرتين بنهر جاسم , لو هذا ضد الوطن؟! . بس انت تكرهه
لأنه اشطر منك والله رازقه بشغله شريفة ...
هدّمت بيته وبهذلت جهاله .. الله لاينطيك ..
( يتقدّم الراكبون والسائق والسكند, عدا المرأة, ويحيطون براكب4 وزوجته)
راكب4 : ولج والله لو أبوي أسلّمه .. حتى ابوي اسلّمه افتهمتي .. الوطن ثم الوطن !!
راكب5( مقلّدا") : الوطن ثم الوطن !!
راكب6 : قميص عثمان !!
راكب3 : أوف يا هالوطن .. شكد بعد تتحمّل ياوطن ؟
( يحيط الراكبون اذرعهم حول رقاب بعض ويطأطئوا )
صوت خارجي ( بغناء حزين ) :فرشت شليلي ,
بدروبك
ابيع العشك للدنيه
هضيمه..
اتحنّن الشامت عليّه,
وتشتمت بيّـــــــه
جثير اكزازك بروحي,
وأكولــــــن :
هاي حنيّــــــــه
من أتلّك بالحلم ..
يسمر ..
يجي القدّاح بيديّه
واعتّك ,
وأطبج بحركه..
رفيف الريّه عل الريّة
وتسيل دموعي بجفوفك
نبـــــع ,
برمـــــــــــال نجديّــه
وأكلّــــــــــــك :
وين هالغيبه؟!!!
سنه..! وبالحلم منسيّه
الزوجة : شكد الوطن مهم عندك .. انت ماتشتري الوطن ببارة , رجلي واعرفك !!
راكب4 : يستاهل , وتستاهلين انت اكثر منّه . كلكم تكرهون الوطن
الراكبون ( وهم يدورون حولهما ) : لا .. لا ..
الزوجة : منو الوطن ؟ آنه وانت واخوي وأخوك وهاي الناس , وكلنه نحب الوطن وماكو واحد
مادافع عنّه , مو انت اللي يحدد الصح من الغلط .. صحح نفسك اول شي .. آنه مره
مامتعلمه لكن أعرف شنو الوطن . وأعرف انت تبوك الوطن .. ماخلّيت واحد ماسلّمته
وبهذلت عائلته....
وتاليهه مابقه غير أخوي اتسلمه , وتعرف كلّش زين ماأله علاقة
راكب4 : إلــه علاقة !!!!
الزوجة : طلّكني !!
راكب4 : أطلكج على مود واحد خائن باع وطنه ؟!
الزوجة : اسكت .. الوطن بريْ منك ومن أمثالك البعثيين .. شنو فرقك عن المسلبجية؟!
طلّكني نذل !
راكب3 ( مع نفسه ) : نذل !!
( يعود الراكبون الى مقاعدهم وتخرج الزوجة من حيث أتت )
السائـق ( للمرأة ) : انت وين بيتكم ؟
المرأة : بكيفك !
السائق : يعني كيفي .. كيفي ؟!!
المرأة ( بغنج ) : كيفك
راكب5 ( للسائق ) : أيدك بالدهن
السائق ( لراكب5 ) : المرة كيفهه , شنو حاط نفسك بالنص !
المرأة : أوي .. هذا صدك مايستحي !!
السائق : أكوم له بالتوثيه ؟ بس كولي ! هسّه أكوم له بالتوثيّه وأبط راسه والله
راكب5 : إي بويه , ليش لا .. هيّ صايره بالتواثي !!
عمّي وصّلنه لهلنه وخل توثيتك بمكانهه.. وبعدين شتريد تسوّي سوّي ..
أستغفر الله العظيم .
السائق : إي حسبالي ..
( للسكنـد ) ولك راح أنزلك يم بيتكم , راح أبنّد , عندي شغل !!
السكنـد : صار ستادي .. الروب والخس عندك بالجكمجه !!
السائق : انزين , افتهمت ..
( للمرأة) كومي كعدي عالكرسي , أشوف مفرزة من بعيد .
( تجلس المرأة على كرسي 1 )
( SPOT على المرأة مع زوجها الذي يدخل من مكان ما غير باب الباص )
المرأة : شوف ذنّي المايسون عانة شلون صاعدات بسوبرات !! متخليني اصير مثلهن ..
شبيك حظّي مكابلني وكاعد !!
الزوج : أزواجهن استشهدوا , وتكرّمت العوائل !
المرأة : لعد شبيك انت ؟!!
الزوج : تريديني أموت يامره .. الله يسامحج !!
المرأة : يعني الوطن مايستاهل تموت على موده ؟!
الزوج : تريديني أموت على مود الوطن لو على مود سيارة السوبر ؟!
الوطن يستاهل كل شي .. يستاهل حياتي ودمّي , بس انت ماتستاهلين السوبر اذا
اذا تفكرين هالشكل ..
الوطن مايدز شبابه يموتون على مود ينطي سيارات لأمثالج ..
المرأة : اسكت.. اسكت , هذه حجي مال واحد مايريد يدافع عن وطنه !
الزوج : آنه أدافع عن وطني , واذا اقتضى الامر اموت من أجله .. مو على مود تورثين
سوبر من وراي ! ثانيا" منو كلّج هاي الحرب اللي سواها صدّام على مود كرامة
الوطن !!!
المرأة : انت ماتريد مرتك تكعد بسيارة وتترحملك !
الزوج : هذا شلون حجي , تردين تسلبيني حياتي مثل صدّام !!
( يخرج الزوج )
المرأة ( مع نفسها ) : وتاليهه تتأسر ياطايح الحظ .. وتخلّي وجهي فاهي , لاسيارة
ولا فراش دافي !!
( رجوعا" الى مشهد الباص )
السكنـد : ستادي خفف مفرزة !!
راكب5 : شنو هاي مفرزة جديدة ؟ لازم حطّوها اليوم !
صوت خارج المسرح ( آمرا" ) : ثكّل وأوكف !!
السائـق : لك هاي مو مفرزة , هذوله مسلّبجيّة !!
السكنـد ( بجزع ) : مسلبجيّه , ستادي انتبه !
راكب4( بجزع ) : مسلبجيّه , لاتوكف .. أطلع !
راكب6 : بويه أطلع .. اطلع بسرعه
راكب5 : ارجع .. ارجع أحسن
السائـق ( وهو يناور بالمقود ) : أولاد الكلب ..!!
( المرأة تصرخ )
راكب4 ( بجزع ) : أنتبه للطريق لاننكلب , أخاف نموت !!
السائـق ( وهو يناور ) : سكتوا , خلّوني أشوف دربي !
السكنـد : ستادي راح ننكلب , ستادي ألله يخلّيك !!
السائـق : حاطّين طابوك , سادّين الطريق ..
دنكوا .. دنكوا جوّه الكراسي ..
( اطلاقات ناريّة )
( يضرب السائق على المقود بيأس )
( يبتعد السكند عن باب الباص مذعورا" )
( يصعد رجلان ملثّمان مسلّحان بالرشاشات )
ملثم 1 ( للسائق ) : ولك ليش ماوكفت جلب ! أحط جيله براسك ؟
( للراكبين ) وانتو لاتسوون ضجّه , سلموا شنو عدكم . ماأريد
حركة ..
( الى ملثم2 ) اخذ منهم , يلله بسرعة !!
( يتحرّك ملثم2 ويأخذ أقراط المرأة وأسورتها )
راكب3 : حرام عليكم , كل شي ماعدنه . هوّ اللي عنده فلوس يصعد بالباص ؟!
ملثم1 : أسكت .. لحّد يحجي . لاتضطرونه نستعمل السلاح !!
( يأخذ ملثم2 مالدى راكب5 , 6 , ليس لدى راكب 3 مايأخذه فيضربه بأخمص البندقية )
( يتحرك نحو راكب7 , 8 )
راكب8 : احجي وياك , احنه مو عراقيين ويمكن يطلع واحد من عدنه اقارب الكم ؟!
ليش هالشكل ! ثم ليش تضرب هذا الشايب.. مو بكد أبوك !!
ملثم2 ( صارخا" بوجهه ) : جيب شنو عندك ولاتتفلسف
( يمسك ملثم2 راكب8 )
راكب8 : شيل ايدك عني السائق ( لراكب8 ) : يمعوّد انطيه شنو عندك خل نطلع سلامات
( يهجم راكب7 على ملثم2 )
راكب7 : شيل ايدك عنّه , ولك هذا يسوه راسك !!
( يضرب ملثم 1 راكب7 بالاخمص . يسقط راكب7 )
راكب8 : حقير ! الرجّال يواجهني بدون سلاح
السائـق : يامعوّد دخيل الله انتبه.. ساحب أقسام !!
ملثم1 : سكتوا ماأريد واحد يحجي . سلموا اللي عدكم بسرعه !!
( يقوم راكب4 ويسلّم ملثم1 ماعنده)
راكب8 : ماتاخذ مني شي الاّ على جثتي . حقراء ..الناس بريئة منكم !
ملثّم1 : كلت لحّد يحجي . لاتضطرونه نستعمل السلاح
ملثّم2 ( للراكب8 ) : انطيني اللي عندك بسرعة والاّ والله أكتلك !!
راكب4 : انطي يمعوّد اللي عندك ليكتلونه كلنا .. واذا تريد تتعارك وياه انزل وخل نطلع !
راكب8 : وخّر ايدك عنّي حقير
ملثم2 : ولك منو الحقير ؟
( يبتعد ملثم2 فجأة ويطلق رصاصة على راكب8 . يسقط راكب8 مضرّجا" )
( ينزل ملثم1 من الباص مسرعا" يتبعه ملثم2 )
راكب7 ( محتضنا" راكب8 ) : يا آخوانّه ساعدوني , طلبوا اسعاف ....
" طلال " أخويه لاتموت . طلال انتبه لي .. طلال !!
صوت خارجي : يكضن .. وأرد ياديرتي
لحسنج وأموتن على التبن
شوكي الج شوك الكطه التايه
ومـوعـــــــات الدهـــــــن
هــم آنه أضوك أميّتــــج؟
وأركض بزخّات المـــزن
دونج يحز بلوزتي الخنجر
وأكـــــابر عيــــــــب أون
( صوت صفارة النجدة يأتي مقتربا" )
( ستــــــــــــــــارة )
ملاحظة : القصائد الشعبية للشاعر مظفّر النوّاب ضمن ديوانه " للريل وحمــد "
ـــــــــــ
جمان حلا ّوي
Email / [email protected]
#جمان_حلاّوي (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
