خلدون جاويد
الحوار المتمدن-العدد: 1936 - 2007 / 6 / 4 - 09:33
المحور:
الادب والفن
شماهجْرونه عراقيين
ومهما ضكنه المُر حلوين
رغم الجورْ ورغمْ المِحْنه
ورغم الأيام انظل احْنه
ذولاك الناس الطيبين .
*******
ياشعبي اصمدْ رغم الخيْبه
احنه نبات الأرض الطيْبه
والأُم الجابتنه احبيْبه
تنكُط ْ قدّاح وياسْمين
وتسكِينه الحب والحنين
*******
احنه الْ ماتمتْ فرحتنه
ضاعت بالظلمه سفينتنه
لكنْ ماطاحت ْ رايتنه
ولاخذلوهه الملاحين
وعزمك ياوطني مايلين
*******
ماظلتْ عين بلا دمعه
ولابيت إلْ مافارك شمعه
لكن شعبي شهِمْ ابطبعه
صامد رغم الجلادين
يفرحْ لا مايبقى حزين
********
لابد من شمعه اتصبحنه
بالخير وعيد ايفرّحْنه
ومهما الأشواك اتجرّحْنه
الجَرِح أقوى من السكين
صامد وطن المظلومين .
*******
عراقيين عراقيين
مهما ضكنه المر حلوين
رغم الجور ورغم المحنه
ورغم الأيام انظل احْنه
ذولاك الناس الطيْبين
**************
#خلدون_جاويد (هاشتاغ)
كيف تدعم-ين الحوار المتمدن واليسار والعلمانية
على الانترنت؟