المحشى المصرى

أيمن غالى

الحوار المتمدن-العدد: 8312 - 2025 / 4 / 14 - 10:36
المحور: كتابات ساخرة
    

إحنا كمصريين بنعشق ونموت فى حاجة إسمها محشى .. والمحشى ده من الأكلات المصرية إللى إبتكرها أجدادنا المصريين من قرون طويلة, وهى عبارة عن رُز مدفوس فى خُضار ..

وللمحشى تاريخ وحكايات طويلة وفيه عنه حكايات كتيرة عن أصله وفكرة إختراعه؛ منها إن واحدة ست ما كانش عندها معالق ولما كانت بتعمل لأولادها رز؛ كانوا بيقرفوا ياكلوا بإيديهم, وانهم كانوا بيحبوا ياكلوا الرز سُخن, وهو كان بيلسع ايديهم، ولأن الست كانت ذكية؛ فإخترعت حكاية المحشى دى، والفكرة إنك تدفس الرز فى أى حاجة وتداريه جواه ..
وفيه ناس قالوا إن القصة الحقيقية إن الست دى ما كانش عندها غير حلة واحدة ويا تعمل فيها خُضار يا تعمل فيها رُز، وعلشان تعمل الإتنين فى حلة واحدة دفست الرز فى الخضار وطلع لنا المحشى ..

طيب واحد يسأل ويقول: ينفع أى خضار يتعمل منه محشى ؟
هنا بقى كانت أهم التجارب الميدانية الحيّة فى عمايل المحشى ..
يعنى لو جايلك ضيوف غير مرغوب فيهم فى يوم معين وجايين لجوازة وانت عايز تفركش الجوازة دى وتطفشهم، يبقى تلعب بالخطة 35 و تاكل لهم محشى كرنب لمدة يومين قبل ميعادهم وتقفل كل منافذ وشبابيك البيت وتُنفخهم. ومبروك الفوركيشة ..
ولو كان عندهم إلتهاب فى الجيبوب الأنفية أو مناخيرهم مسدودة ومحشى الكرنب ما إشتغلش معاهم إبقى أدخل عليهم بالخطة 18 بمحشى ورق خروع ولما يشتغل معاهم الخروع إبقى قول لهم ما عندناش حمام ..
ولو جاي لك خطيب بنتك وحابب تسيطر عليه وتخليه خاتم فى صوباعك طُوسة بمحشى ممبار ..
ولو عايز تخنق مراتك أطلب منها محشى ورق عنب ..
ولو عندك ضيف أصلع وعايز تعمل معاه الواجب نادى على المدام قدامه وقول لها إعملى لنا محشى قرع ..
ولو كان رئيسك فى الشغل معزوم عندك وكان لك عنده مصلحه أعمل له محشى كوسة وهو حا يفهم ..

وأذكر حادثة تاريخية إن أم سعاد جارتنا كانت عازمة سِلفِتها على الغدا وقامت بينهم عركة شباشب وشد شعور بسبب إن أم سعاد كانت عاملة لضيفتها محشى فلفل، وسيلفتها قالت لها إنت قصدك تفلفليلى يا فوزية إللى هى أم سعاد بس قبل ما تجيب سعاد ..

وانا بأنصح كل واحدة عايزة تريّح دماغها تشترى حلتين وشوية معالق وتعمل حلة رز لوحدها وحلة خضار لوحدها. وتريّح دماغها من المحشى ووجع القلب ده ..
وأحب أقول لكم إعتبرونى معزوم عند أى حد منكم عامل محشى مهما كان نوعه حتى ولو كان بورق شجر برضه شغال معايا

#أيمن_غالى (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات