حكايات شعبية من مدينة يثرب 19

حسين سليم
(Hussain Saleem)

الحوار المتمدن-العدد: 8276 - 2025 / 3 / 9 - 16:47
المحور: الادب والفن
    

(21)
جبنالكم فينيسيا أبلا فيزا وباسبورت!

- سيد أنت والله على حق!
- اشلون!
- اليوم من شفتك لابس الچزمة الطويلة، اتذكرت دائماً تحچي وتدور مرّة على "چولة"، لو "فانوس" مرّة على "مهفة" لو "حِبْ" لو "ثلاجة خشب".
- (لإيلاف قريش، إيلافهم رحلة الشتاء والصيف، فليعبدوا ربّ هذا البيت، الذي أطعمهم من جوع وآمنهم من خوف). هاي سورة قريش في القرآن الكريم.
- المعنى؟
- تجار قريش كانت لهم رحلة لليمن، الجو فيها دافئ في الشتاء، ورحلة للشام، الجو فيها معتدل في الصيف، ويحمدون رب البيت.
- واحنا فقراء العراق لنا مصيبتان، واحدة في الشتاء نغرگ، وواحدة في الصيف ننچوي، وهم نحمد رب البيت.
- انت تدري اليوم حتى الچزمة ما فادت، طب بيها الماي، خو البيت اسكت وخليها، شلنا الغراض شي فوگ شي، وصعدنا للطابق الثاني.
- والعلوية خطية!
- شلناها فوگ. ودبرنا إلها تواليت غربي فوگ.
- مسكينة.
- الچزمة تذكرني بمدينة "الثورة" وبقطاع 43 قبل التبليط والمجاري، نلبس الچزامي من تمطر الدينا، تصير الشوارع ماي وطين. بس البيوت ما تغرگ بس الشوارع.
- وهسة؟
- سنوات مرت من انتقلنا منها إلى "يثرب"، اتبلطت وصارت شبكة مجاري مع مناطق بغداد الأخرى. گلنا خلصنا من الچزامي، وهسة بعد التغيير 2003، الشوارع غرگانة ويدخل الماي وطفح المجاري للبيوت بكل بغداد، رجعنا للچزامي.
- مصيبة العراق من المناطق الجافة، والمطر ماينزل بالشتاء يوم يومين، ويغرگ البلد، بس ما تسقط الحكومة ولا حتى مدير بلدية وحاشيته!
- طبعاً إذا الفساد ناخر الدولة والمجتمع كلشي توقع.
- هي فورة! الناس تاخذ صور ويه الغرگة وتنشر وتحچي بعد يومين كلشي ينتهي ومن يمرّ المسؤول، تهوس" مو غيرك، بس انت البلميدان تصول".
- وينتهي الفلم، مرّة شتائي ومرّة صيفي، وعل هلرنة طحينچ ناعم.
- الصيف الجاي أصعب، غاز ماكو من إيران، وچمالة إذا أسعار النفط هبطت، مشو بوزكم يا گرعان كهرباء ماگو. تتذكر من گلتلك نحفر بير الصيف المضى! وأنت تگول"يا بير يا صخام والله سيد عندك سوالف"
- اي وجاوبتك إذا بقى الوضع على ما عليه راح نحفر بير والحمد لله.
- يقال: الماي بيد تركيا، والكهرباء بيد ايران والفلوس بيد امريكا.
- والحل؟
- الجماهير حتى تكون قوى مادية تحتاج قبل الوعي قوى طليعية وتنظيم، جادة بالعمل. والجماهير الآن ليست قوى مادية. وإذا كان هناك شعور بأن الجماهير أصبحت قوى مادية، يحدث انقلاب داخلي أو شبه خارجي، وچنك يابو زيد ما غزيت.
- الانتخابات مثلا؟!
- إذا فاهم الأنتخابات على الطريقة الأوربية، أغسل ايدك، وحتى لو نجحت الانتخابات بفوز القوى المدنية، يصير "انقلاب" ليس بالضرورة أن يكون عسكرياً، بل يتم التدخل بقوى داخلية وخارجية. والخارجية كما تشير في وثائقها تحبذ الانتخابات لإنها تستطيع التدخل فيها وحرفها، ولذلك هي تحبذ العمل العلني المكشوف لقوى اليسار…
- يعني؟
- روح دور من هسة للصيف على "مهفة"، "حِبْ" ، "ثلاجة خشب"، "چولة"، "فانوس". هاذ الشتاء خلص، ولا تحچون على البلدية الي مسؤوليها كل واحد منهم صار عنده ثلاث بيوت وسيارات، وعقارات، من فضل رب البيت، ولا تحچون على الحكومة! جابتلكم فينيسيا أبلا فيزا وباسبورت!

#حسين_سليم (هاشتاغ)       Hussain_Saleem#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات