الفيلم الكوميدي الرائع الآنسة حنفي بطولة الفنان الكبير اسماعيل يس

احلام محمد

الحوار المتمدن-العدد: 8254 - 2025 / 2 / 15 - 12:34
المحور: الادب والفن
    

الآنسة حنفي

تخيل يا محترم، واحد ذكوري جدا رجعي لأقصى درجة في يوم وليلة بقى واحدة ست! بقول لك حنفي بقى فيفي ..

الفيلم انتاج سنة ٥٤ عمل القصة والسيناريو والحوار جليل البنداري وهو نفسه منتج الفيلم. البطولة لاسماعيل يس، ماجدة، عبدالفتاح القصري، زينات صدقي، عمر الحريري، سليمان نجيب ورياض القصبجي ووداد حمدي. الفيلم اخراج فطين عبدالوهاب

إحنا بعد ثورة ٥٢ أيام حكم محمد نجيب. لسه العلم المصري الملكي ماتغيرش بس كل حاجة تانية اتغيرت.

القصة زي ما قلت لكو كده، حنفي (اسماعيل يس) الشاب المصري الصميم ساقط ابتدائية اللي بيدير جزارة أبوه وعايش مع والده المعلم كتكوت (عبدالفتاح القصري) المهووس بتربية الحمام ومرات أبوه (زينات صدقي) وبنت مرات أبوه نواعم (ماجدة) اللي بتحب جارهم (عمر الحريري).

طول النهار حنفي يضايق ويخنق على ستات البيت ده “رغي في الشبابيك ممنوع، خروج من باب البيت ممنوع، المحزق اللي على جتتك ده ممنوع، التكنيكلر اللي في خلقتك ده ممنوع“ ، ومعترض على تعليم البنات وشايفهم درجة تانية. مع إن “المرأة دلوقتي لها نفس الحقوق الرجالي”.

المهم أبوه ومرات أبوه عايزين يجوزوه نواعم. وبالفعل بينجحوا في تظبيط الجوازة رغم ان نواعم بتحب واحد تاني، وحنفي مش عايز يتجوز أساسا.

في ليلة الجواز، حنفي بيجيله مغض، بيروح المستشفى، الدكتور بيقول محتاجين نعمل له عملية. بيخرج من العملية واحدة ست. الكوميدي إن حنفي ماتعقدش من اللي حصل أو اتضايق أو أي حاجة، هو اتعامل عادي جدا، بس العادي بتاع حنفي هو واحدة ست متحررة وعنادية.

هو/ هي عايز يتصرف بنفس الحريات اللي اتعود عليها أيام ما كان راجل، واللي بيتحرم منها ويتحاسب عليها لما بقى ست. مع إنه بردو لسه مقتنع إن الستات ملهاش تتعلم أو تخرج من البيت!! في الآخر، فيفي بتهرب مع حبيبها - اللي هو كان أصلا صديقة لما كان راجل!!!! - وبيخلفوا.

الفيلم كسر الدنيا في السينما..

بجانب القصة المسلية والتقدمية دي، الحوار كان كوميدي جدا، والسيناريو والتفاصيل لحارة مصرية وشخصيات مصرية واقعية مع إضافة صور مبالغة للضرورة الكوميدية. زي مثلا، الأب الممهوورس بتربية الحمام ولما حمامة تموت منهم بيحنطها.

ومرات الأب المهووسة بمعرفة الطالع واللي بتخطط للجوازة عشان ثروة المعلم ماتخرجش بره، وحسونة اللي دفع فلوس ومأخدش بيهم وصل عشان يحصل على لقب بك (لاحظ إن الفيلم بعد ثورة ٥٢ وبينتقد اهتمام الناس بالبكوية على حساب الشهادات والكفاءات أيام الملكية بيتملقوا الثورة يعني) … وصديق حنفي اللي طلق مراته وهي كل يوم والتاني ترفع عليه قضية وتيجي وفي ايديها المحضر.

بالنسبة لي الفيلم بيحلو أوي لما حنفي بيتحول فيفي واللي هو في نص الفيلم تقريبا. كل المشاهد الخاصة بحنفي ضحك في ضحك. لما فيفي بتقف في الشباك تتكلم مع حبيبها، ولا ع السلم..

ولما بتطلع فوق السطوح تعاكس حبيب نواعم، ولما جالها عريس ومعرفش إنها هي العروسة وسأل عنها.. فقامت فيفي خبطته على دماغه وقالت له بصوت رجالي جهوري “ما أنا قدامك أهو يا ابن الرفضي” :D ولما هربت مع حبيبها ورجعت لهم حامل :D

اسماعيل يس

نقدر نقول إن سنة ٥٤ هي السنة الأكثر انتاجا في حياة اسماعيل يس الفنية ب ١٨ فيلم دفعة واحدة! تقريبا اسماعيل يس بقى ظاهرة في السينما المصرية.

في الأربعينات اسماعيل يس عمل أفلام كتيرة جدا جدا دور تاني، ومع بداية الخمسينات ابتدى يعمل أفلام لوحده، مع استمراره في الظهور دور تاني مع أبطال آخرين زي فريد الأطرش وعزيزة أمير وكمال الشناوي. فمثلا يعمل فيلم بيت النتاش قدام شادية، وبعدها يشترك في فيلم الهوا مالوش دوا قدام كمال الشناوي وشادية.. من بعد سنة ٥٤ أصبح اسماعيل يس بطل سينمائي بشكل أساسي وده خلى عدد الأفلام أقل بطبيعة الحال. بدأت في المرحلة دي بردو سلسلة أفلام تحمل اسمه “اسماعيل يس في الجيش” مثلا. هو كان واحد من اتنين أفلامهم حملت اسمائهم (الأخرى كانت ليلى مراد).

بدأ اسماعيل يس مشواره في الفن كمنولوجست. صوته جميل جدا، ودمه خفيف. صحيح كان نفسه يكون مطرب عاطفي زي عبدالوهاب، بس القدر كان مخبي له مفاجأة تانية فبقى أهم مونولوجست في الأربعينات وأهم ممثل كوميدي في الخمسينات. كتير من أفلام الأربعينات فيها مونولوجات لاسماعيل يس. وفي الخمسينات عمل فيلم صاحبة العصمة وغنى فيه مجموعة كبيرة وجميلة من المونولوجات مع إنه كان بطل، بس دوره في الفيلم كان مونولوجست فطبيعي.

ماجدة

أيوة صحيح ماجدة في بعض الأفلام طريقة تمثيلها مستفزة ومسهوكة أوي وكده. بس ده بيتضائل ومابيبقالوش أهمية قدام دور ماجدة في السينما المصرية والأفلام اللي انتجتها برؤية امرأة مصرية بنتنصر لحقوق المرأة وحريتها. يعني ماجدة كانت أكثر ممثلات جيلها وعيا بقضايا المرأة، وهي الوحيدة اللي اهتمت تنتج أفلام بتعكس الرؤية دي، أفلام زي “أين عمري” وده أكيد هنتكلم عنه لأنه من أفلامي المفضلة، و “جميلة” عن المناضلة جميلة بوحريد والحقيقة العارية وزوجة لخمس رجال. ومن أهم ما انتجت أيضا فيلم هجرة الرسول والعمر لحظة.

ده بالنسبة للي انتجته، بس كمان اختياراتها بتدل على وعيها ده زي فيلم النهاردة الآنسة حنفي وزي فيلم المراهقات وقصة ممنوعة وحواء على الطريق.

حواديت هامشية:

١ اسماعيل يس لما صور الفيلم ده وهو عنده ٤٢ سنة، ماجدة كانت ٢٣ سنة.

٢ اللي كانت بترقص على أغنية “ياعروسة يا جنتلمان” دي نعمت مختار بس شكلها كانت صغيرة أوي لسه.

٣ ماجدة اتجوزت مرة واحدة بس، من إيهاب نافع، وأنجبت منه ابنتها غادة. ماجدة قدمت إيهاب نافع للسينما، وهو الحقيقة كان ممثل سيء جدا وثقيل الظل رغم وسامته. هو أصلا كان طيار مقاتل وكان له علاقة بالمخابرات وتزوج من أرملة رفعت الجمال - اللي هو رأفت الهجان.

٣ عمر الحريري نفس دفعة شكري سرحان في المعهد العالي للسينما، والاتنين اشتغلوا في فيلم كرسي الاعتراف ليوسف وهبي، لكن شكري سرحان أصبح جان في السينما وعمر لم يحالفه الحظ رغم قيامة ببطولة عدد من الأفلام القليلة، واستمر في أداء الأدوار التانية.

لمشاهدة الصور ارجو فتح الرابط
https://www.tumblr.com/cinemazei/133608765403/%D8%A7%D9%84%D8%A2%D9%86%D8%B3%D8%A9-%D8%AD%D9%86%D9%81%D9%8A

فيديو.. فيلم الآنسة حنفي – بطولة اسماعيل يس وماجدة - 1954
https://www.dailymotion.com/video/x8f5kfj

#احلام_محمد (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات