قناص قردحلي حكيم

رامي الابراهيم
كاتب، صحفي، مترجم، لغوي، سينمائي
(Rami Ibrahim)

الحوار المتمدن-العدد: 8156 - 2024 / 11 / 9 - 04:48
المحور: الادب والفن
    

( قصة بلهجة أهالي منطقة القرداحة في سوريا )

النقيب: وك اسميعيل تريك هالمحرس و تا شراب متي معي! عيزمك عالمتي يا غالي!
اسميعيل: سيدي معلش شراب هنت صحة عقلبك بس خليني معيّن علين اخوات هالشرم...خاف يطلعو من بين الحرش
النقيب:وك مقلك تعا ليكني راح ابعت ويد تاني محلك بدي اسألك كم سؤال ليكني نقعتلك كاسة المتي و حطيتلك فيا سكر متل أبيحبا قلبك! كيفك فيا لهادي؟ ما منيحة؟ هي معلمك مينقعلك كاسة المتي شو اسا بدك؟ اجازة؟ الوضع و هنت بتعرفوا هلق أفي إيجازات! لك لعيتو لقلبي تروك هالمحرس و تا تقلك! لك محسن روح روح محلو لاسميعيل. بحضي هنت أحول بس حاجتو اسميعيل روح وبعتلي هو!
محسن: حاضر سيدي!
اسميعيل: هيدني جيتك سيدي! ليش معزب حالك يا سيدي! يعني معقول تنقعلي كاسة المتي هنت؟ الله يسامحك يا سيدي!
النقيب: لك إي إي أنا بزات نفسي بدي صبلك كاسة المتة لك بطل هنت بطل! شو قليل ما اقتلت منن لإخوات هالشرم... بحضي هنت بتستيهل وسام الجندي المجهول مو بس كاسة متي بسكر.
اسميعيل: عراسي سيدي!
النقيب: بعدين أ من بيت ديب هنت؟ بيت المعلم اسود القرداحة و هنتوا الديابي فيا معقول ما انغنجك؟ لا بشرفي مو معقول؟ هلق شو بدي قلك! وين قلتلي كنت تخدم قبل الحرب؟
اسميعيل: بالقطيفة سيدي شوفيرو للواء سمير كنت سيدي!
النقيب: كنت مفيش آه؟
اسميعيل: إي و الله يا سيدي كنت مفيش عالأربعا وعشرين بس كان اللواء يتضايق من ريحة الدخان بالسيارة و غير مدري كم سيارة لإنو كنت دخنلو فيا! ( هاهاها)
النقيب: يعني غير السيارة و ماغير الشوفير! لك شقد مدعوم هنت معناها؟
اسميعيل: الحمد لألله يا سيدي هوي اللي بيحمي و هوي اللي بيدعم!
النقيب: لك إي ما قلنا لا بس ماقلتلي مين واسطك مين؟
اسميعيل: سيدي هداك وقت وهادا وقت! بهداك الوقت كان الشاطر يهرب من العسكرية هلق المدني ميركد ليحمل سلاح ويدافع عن أرضو وشعبو وناسو. يعني لو بهداك الوقت كنت بتشوفني حيمل هالقناص ليل نهار؟
النقيب: بحضي متحكي مزبوط! بس اسمعت إنك كنت تكتب تقارير باللواء سمير! لك ليكون متكتب تقارير فيني هنا كمان؟
اسميعيل: سيدي برجع و بقلك هداك وقت و هادا وقت هلق ماحدا فاضي لايكتب تقارير ولا يقرا تقارير! بعدين أنا دوبي بعرف اكتب اسمي يا سيدي بدك ياني اكتب تقارير؟
النقيب: لك بعرف بعرف كنت مإمزح معك! مو هاد الموضوع اللي بدي حكيك فيه! بصراحة يا اسميعيل إجاني فيك تقرير مو منيح!
اسميعيل: هنا سيدي بينكتب فيني تقرير؟ لك مينو أخو الشرمو... اللي ميكتب فيني تقرير واجهني فيه لشوف مين فينا خيدم وميخدم الوطن أكتر!
النقيب: لك مو هيك موهيك بس الحكي يا اسماعيل إنك يعني ديبي فيك الرحمي هالإييم و صارلتلك إز مرات فرصة تقوسو لقناصن لإخوات الشرموطة و أبعرف ليش ماقوستو! وهيدني أنا مقلك منشان اسمع منك!
اسميعيل: هلق هكيا؟ هيدا هوي التقرير! لك إي بشرفي يا سيدي هالحكي مزبوط وصرلي مو بس إز مرات بيجوز أربع مرات قوس قرعتو بس ماقوستو يا سيدي!
النقيب: حلو هالحكي و هنا قبل ما اسألك ليش ماقوستو بدي اسألك شو رايك فيه؟
اسميعيل: شو بدو يكون رأيي فيه يعني جحش ابن جحش!
النقيب: لك مو مإسالك عن ديانتو وديانة اللي خلفو مإسالك كيفو عسكرياً بالقنص يعني؟
اسميعيل: والله يا سيدي بالقنص و غير بالقنص هوي عند عقلي جحش ابن جحيش. يعني سيدي ماشايفو هنت قديش جحش؟ لك بمدلو تنكة زيت فاضي بالبارودة بتجي قد راسو للجحش و أبيصيبا بمدلو الخوزي و ابيصيبا اشتهيتو بهالعمر يصيبلو شي شغلة ويدي بس!
النقيب: لك ليش لكن ابتنيولو طلقة تفجلو السنطيحة وتخلصنا من ربو؟
اسميعيل: سيدي يعني بلا معلميي علاك يعني ماشايفنا قيعدين منشرب متي لإنو قناصن لهالجحيش أبيصيب الجحشي. هلق إذا اقتلتو لهالجحش و جابو قناص بيصيب الإبرة أبدو يخلينا هنا و هنت نمشي البطة بالروحة و الجيي؟
النقيب: ( وهوي ميضحك) أيلاي ما إزكالك! لك عيني ربك عيني! بشرفي هاي فاتيتو لمعلمك! بحضي المرة الجاي غير عرق مو سيقيك!

#رامي_الابراهيم (هاشتاغ)       Rami_Ibrahim#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات