قصص عن الخصخصة

صوت الانتفاضة

الحوار المتمدن-العدد: 7870 - 2024 / 1 / 28 - 00:49
المحور: مواضيع وابحاث سياسية
    

((خَصْخَصَةُ مُؤَسَّسَةٍ عُمومِيّةٍ: نَقْلُ تَسْيِيرِ إِدارَتِها وَشُؤونِها الْمَالِيَّةِ مِنْ مِلْكِيَّةِ الدَّوْلَةِ إلى قِطاعٍ خاصٍّ)) معاجم اللغة.

(مستشفيات أهلية، مدارس أهلية، مولدات كهرباء أهلية، مياه "ارو" أهلية، قطع أراضي سكنية أهلية "حواسم، زراعي"، أسواق أهلية "مولات"، جامعات أهلية، شركات نقل أهلية "كريم، بلي"، مصانع ومعامل أهلية، خدمات أهلية "تأسيس وتنظيف المجاري، نقل النفايات، تصليح مطبات الشوارع، تأسيس شبكات الماء"، مصارف وبنوك أهلية، شركات امن أهلية، محطات نعبئة وقود اهلية....).

- يعني انت كل عقلك تخلي زوجتك تولد بمستشفى "الزهراوي، الحبيبية، الكرخ"، مع كل الأسف عليك، ولك يابه لو هي تموت لو الطفل، مو هاي المستشفيات الاهلية أحسن، نظيفة ومرتبه وكل ساعه واحد يجيك، انت شايف مستشفى الجوادر لو الكندي، لو ما احجيلك على مستشفى القادسية، هاي مستشفيات عبارة عن خرابه، اول ما تدخل تحس عزرائيل يستقبلك؛ عمي شوفلك مستشفى اهلي أحسن، هي الحياة صارت هيج.

- زين ليش ما تتجمعون يم "أبو فلان" حتى تصفون على راي، لو تجمعون فلوس وتنظفون المجاري والكسر مال البواري وتصلحون هاي الخسفة بالشارع وبالمرة تسوون هاي المحولة اللي كل ساعة طاكه؛ لو تخلوهن وترى هن براسنا براسنا.

- صحيح انت ليش كاعد بهذا البيت الضيك، والولد كبروا، وصاروا حق زواج، ليش ما تشوفلك بيت "حواسم، زراعي" تشتريه، هاي البلديات مال الحلفي، وهاي ابودرع، وهسه حتى البوعيثة وبعد ما عرف وين، كلها صارت مناطق سكنية تخبل، وانجرّت الها خدمات كاملة، واسعارها زينه.

- شوف هذول العمال، يوميه متظاهرين، على شنو، يردون معاملهم القديمة يشغلوها، هسه هذا حجي، ما يعرفون الاستيراد أرخص وأسهل وبيه استفادة للجماعة، بعد على شنو كاتلين نفسهم، وبعدين معامل ارباب رؤوس المال الجديدين وين يودوها، وهم كلهم من السلطة.

- اني اعرف بيك محتاج سلفه، تروح للمصرف..... الإسلامي، هذا خوش ينطي سلف، ولو شويه بيها فايده عالية، بس استقطاعها الشهري زين، ولك هاي المصارف الإسلامية الجديدة نعمه، صحيح اغلبها أموالها مشبوهه وغسيل أموال، بس أحسن من الماكو.

- اكول ترى احنا كعدنا هواي، وشربنا هواي، وحجينا هواي، والدنيا صارت تمطر، ويمكن تغرك الشوارع وما نعرف نوصل، فليش ما تطلبنا "بلي" وتخلصنا، لأن بس نبقى راح نبات يم أبو ارام.

طارق فتحي

#صوت_الانتفاضة (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات